A o iai Iosefa i le falepuipui, sa fai ai ni miti a Farao le tupu o Aikupito, ma e leai se tasi na mafai ona faamatalaina le uiga o na miti. Na fai atu se tasi o auauna a Farao iā te ia, e mafai e Iosefa ona faamatala le uiga o ana miti. O lea, na faavave ai loa ona auina atu Iosefa i luma o Farao.

Na fesili atu Farao iā Iosefa: ʻPe e mafai ona e faamatalaina mai le uiga o aʻu miti?’ Na faapea atu Iosefa: ʻE fitu tausaga o le a iai le tele o meaʻai i Aikupito. I le isi fitu tausaga e sosoo ai, o le a matuā leai ni meaʻai. Ia filifili se tagata poto e faaputu meaʻai, ina ia aua ai neʻi fia aai tagata.’ Na tali mai Farao: ʻOu te filifilia oe. O le a avea oe ma tagata lona lua e sili ona malosi i Aikupito.’ Na faapefea ona iloa e Iosefa le uiga o miti a Farao? Na fesoasoani Ieova iā Iosefa.

I le fitu tausaga na sosoo ai, sa faaputu ai e Iosefa meaʻai. Ona matuā leai ai lea o ni meaʻai i atunuu na lata ane, e pei lava ona faamatalaina e Iosefa. Na ō mai tagata mai i so o se vaipanoa e faatau atu a latou meaʻai mai iā Iosefa. Na faalogo lona tamā o Iakopo o loo iai meaʻai i Aikupito, o lea na ia auina atu ai ona atalii e toʻasefulu e faatau mai ni meaʻai.

Ina ua latou ō atu iā Iosefa, na vave lava ona iloa e Iosefa i latou, ae e latou te leʻi iloa Iosefa. Na latou ifo atu iā te ia, e pei lava o le miti a Iosefa i le taimi a o laʻitiiti. Na fia iloa e Iosefa po o feita pea ona uso. O lea na ia fai atu ai iā i latou: ʻO outou o sipai. Na outou ō mai e vaavaai i se mea e faigofie ona osofaʻia ai lo matou atunuu.’ Ua latou tali mai: ʻE leai. O i matou o se ʻauso e toʻa 12 mai i Kanana. O se tasi o o matou uso ua oti, ae o le uii o loo nonofo faatasi ma lo matou tamā.’ Ona fai atu lea  o Iosefa: ʻIa outou aumai lo outou uso laʻitiiti iā te aʻu ona ou talitonu ai lea iā te outou.’ O lea, na latou toe foʻi ai loa i lo latou tamā.

Ina ua toe leai foʻi ni meaʻai i le aiga o Iakopo, na ia toe auina atu foʻi ona atalii e ō i Aikupito. O le taimi lea na latou ō ai loa ma ave Peniamina lo latou uso laʻitiiti. Ina ia tofotofoina ona uso, na nanā ai e Iosefa lana ipu siliva i le ato na iai saito a Peniamina ma fai atu ua gaoia e se tasi o ona uso lana ipu. Na teteʻi uso o Iosefa ina ua maua e auauna le ipu i le ato a Peniamina. Na latou talosaga atu iā Iosefa e faasala i latou, ae aua le faasalaina Peniamina.

O lea na iloa ai e Iosefa ua suia uiga o ona uso. Na lē mafai ona toe taofi ona loimata ma ua tagi o ia ma faapea atu: ʻO aʻu o Iosefa lo outou uso. Po o soifua pea loʻu tamā?’ Na matuā teteʻi ona uso. Na fai atu Iosefa iā i latou: ʻAua tou te faanoanoa ona o le mea sa outou faia iā te aʻu. Na auina mai aʻu e le Atua i inei ina ia faasaoina ai o outou ola. O lea ia faavave ma toe foʻi e aumai loʻu tamā i inei.’

Na latou toe foʻi ma taʻu atu i lo latou tamā lea tala lelei ma ave o ia i Aikupito. Ua mavae le tele o tausaga, ae o lea ua iʻu ina toe faatasi Iosefa ma lona tamā.