Di Yosef ben de na strafu-oso, Farao, a kownu fu Egepte kisi dren di nowan sma ben man fruklari. Wan fu den futuboi fu Farao taigi en taki Yosef ben o man fruteri en san den dren fu en wani taki. Wantewante Farao meki sma go teki Yosef.

Farao aksi en: ’Yu man fruteri mi san den dren fu mi wani taki?’ Yosef taigi Farao: ’Bun furu nyanyan o de na ini Egepte seibi yari langa èn baka dati wan angriten o de seibi yari langa. Suku wan koni sma di o kibri nyanyan so taki a pipel no dede fu angri.’ Farao piki en: ’Mi o teki yu fu du a wroko dati! Yu o de a moro makti man na ini Egepte, baka mi!’ Fa Yosef ben sabi san den dren fu Farao wani taki? Na Yehovah ben yepi en.

Na ini den seibi yari baka dati Yosef kibri furu nyanyan. Baka dati wan angriten ben de na heri grontapu soleki fa Yosef ben taki. Sma fu ala sei ben kon bai nyanyan na Yosef. Di en papa Yakob yere taki nyanyan de na Egepte, a seni tin manpikin fu en fu go bai nyanyan drape.

Di den manpikin fu Yakob go na Yosef, dan wantewante Yosef si taki na den brada fu en. Ma den brada fu en no ben sabi taki na Yosef. Den boigi gi en, soleki fa a ben dren di a ben yongu. Yosef ben wani sabi efu den brada fu en ben abi takru maniri ete. Dati meki a taigi den: ’Unu kon dya fu kon luku pe a kondre swaki.’ Den taki: ’Nôno! Wi na 12 brada di e libi na Kanan. Wán fu den brada fu wi dede èn a moro  yonguwan de na wi papa.’ Yosef taigi den: ’Tyari un moro yongu brada kon gi mi, dan mi o bribi unu.’ Baka dati den drai go baka na den papa.

Di Yakob en famiri no ben abi nyanyan moro, a seni den manpikin fu en go baka na Egepte. Disi leisi den tyari Benyamin, a moro yongu brada fu den. Yosef ben wani luku efu den brada fu en kenki èn dati meki a kibri a solfru kan fu en na ini Benyamin aleisi saka. Ne a taki dati na den brada fu en fufuru a kan. Di den futuboi fu Yosef feni a kan na ini Benyamin saka, den brada fu en skreki. Den begi Yosef fu strafu den na presi fu Benyamin.

Now Yosef ben sabi taki den brada fu en kenki. Yosef no ben man hori ensrefi moro. A bari krei èn a taki: ’Mi na Yosef, un brada. Mi papa de na libi ete?’ Den brada fu en no ben man bribi taki na Yosef. Dan a taigi den: ’Un no musu sari fu a sani di unu du. Na Gado seni mi kon dya so taki unu kan tan na libi. Un go teki mi papa esi-esi tyari kon dyaso.’

Den drai go na oso fu fruteri den papa a bun nyunsu èn den tyari en go na Egepte. Baka someni yari, Yosef ben de makandra baka nanga en papa.