Su tempong i Yusuf su penjara, Firaun, arau datung Misirẹ̌, nakaěbạ ipi. Tawẹ apa taumata botonge makaul᷊ị apa mangal᷊ene ipi ene. Sěngkatau ělang i Firaun nẹ̌běke i Yusuf botonge maul᷊ị apa mangal᷊ene ipi ene. Firaun apidu někui si Yusuf.

Firaun naul᷊ị si Yusuf, ’Paul᷊ịko apa mangal᷊ene ipiku.’ Yusuf simimbahẹ̌, ’Karěngụe pitu taung, sarung piạ lawọ kaěng su Misirẹ̌, bọu ene sarung piạ pitu taung karal᷊unusẹ̌. Hakị u ene pilẹe sěngkatau matahuěna gunang měndesọ kaěng, tadeạu bangsang i Tuang tawe kal᷊unusang.’ I Firaun naul᷊ị, ’Iạ měmile si kau! I kau sarung makoạ taumata karuane mẹ̌kawasa su Misirẹ̌!’ Kerea i Yusuf nakasingkạ mangal᷊ene iping i Firaun? Yehuwa nẹ̌tul᷊ung si sie.

Karěngụe pitu taung, i Yusuf něndesọ kaěng. Bọu ene, su patikụ dunia piạ karal᷊unusẹ̌ nariadi, kere seng niwerang i Yusuf. Taumata bọu haghing tampạ diměnta gunang měměli kaěng si Yusuf. Papạe, i Yakub, nakaringihẹ̌ piạ kaěng su Misirẹ̌. Hakị u ene i sie něngoro mapul᷊o anạe gunang pěměli kaěng paị sene.

Manga anạ i Yakub nakoạ sarang i Yusuf. I sire běga i sie kai i Yusuf, katewe i sie nakakiral᷊a si sire. I sire kimakurung si sie, kere su iping i Yusuf su tempong mangudạ. Yusuf mapulu makasingkạ i sire bědang dal᷊akị arau seng tala. Hakị u ene i sie naul᷊ị si sire, ’I kamene mata-mata. I kamene mapulu masingkạ karal᷊omeng bangsang i kami.’ I sire naul᷊ị, ’Tala! I kami bọu Kanaan, kụ i kami 12 tahatuari. Sěmbaụ tuaring kami seng nate, kụ katuariange ene dingangi papạ  i kami.’ Bọu ene Yusuf nẹ̌bera, ’Bawa ramahi tuaring i kamene, buhudeng iạ mangimang si kamene.’ Hakị u ene i sire napul᷊ẹ.

Su tempong kaěng seng nasue, Yakub saụ něngoro manga anạe sarang Misirẹ̌. Su tempo ene i sire nẹ̌bawa si Benyamin, anạ katuariange. Yusuf něnesẹ̌ si sire. I sie nẹ̌taho mangkone wọu perak su karong i Benyamin, bọu ene něnoke i Benyamin seng nẹ̌tako mangko ene. Su tempong manga ělang i Yusuf nakaěbạ mangko ene su karong i Benyamin, manga tuhange himěkosẹ̌. I sire nẹ̌dorong i Yusuf pěhukungke si sire, bal᷊inẹ si Benyamin.

Su tempo ene, Yusuf nakasingkạ i sire seng nẹ̌bal᷊ui. I Yusuf seng tawe nakatahang. I sie simangị kụ naul᷊ị, ’Iạ i Yusuf tuaring i kamene. I Papạ bědang biahẹ̌?’ I sire sěbạe himěkosẹ̌. Bọu ene i sie nẹ̌bera, ’Abe kasusah naung ual᷊ingu apa seng nikoạ i kamene si siạ kangerẹ. Mawu něngoro si siạ sarang ini gunang pěnal᷊amatẹ̌ si kamene. Lighạe bawa i Papạ sarang ini.’

I sire napul᷊ẹ gunang mẹ̌běke si papạ i sire soal i Yusuf dingangu gunang mẹ̌bawa si papạ i sire sarang Misirẹ̌. Maning seng taunge nal᷊iu, samurine i Yusuf saụ nẹ̌sombang dingangi papạe.