Chiindi Josefa kachili muntolongo, mwaami wakuEgepita Faro, wakalota ziloto zyakakachila bantu kuzipandulula. Umwi mubelesi waFaro wakamubuzya kuti Josefa ulakonzya kumupandulwida nchizyaamba. Kuzwa waawo, Faro wakalayilila kuti Josefa ayitwe.

Faro wakabuzya Josefa kuti: ‘Ulakonzya na kupandulula nzindalota?’ Josefa wakabuzya Faro kuti: ‘MuEgepita munooli chakulya chiingi kwaminyaka iili 7 pesi kwaminyaka iili 7 iitobela, kuzooba nzala. Nkinkaako, sala muntu ulaabusongo utayobolole zilyo kuchitila kuti bantu bako batafwi anzala.’ Faro wakasandula kati: ‘Ndasala nduwe! Uyooba wachibili mubweendelezi muEgepita!’ Niinzi chakapa kuti Josefa akonzye kupandulula ziloto zyaFaro? Nkaambo Josefa wakagwasigwa aJehova.

Kwaminyaka iili 7 yakatobela, Josefa wakabungika zilyo. Mpawo kwakazooba nzala munyika yoonse mbuli mbakaambide Josefa. Bantu bazwa kumasena asiyene-siyene bakali kusika kuli Josefa kuzowula zilyo. Jakkobo wisi waJosefa, wakamvwa kuti kuEgepita kuli zilyo, nkinkaako, wakatuma bana bakwe bali 10 kuti bakawule zilyo.

Bana baJakkobo bakiinka kuli Josefa, mpawo Josefa wakafwambaana kubaziba. Pesi bakulana bakwe teebakaziba pe kuti nguJosefa. Bakamukotamina mbuli mbaakalotede kachili muniini. Josefa wakali kuyanda kuziba kuti bakulana bakwe bakachili alunya na. Nkinkaako, wakababuzya kuti: ‘Muli basikulanga-langa nyika. Muza kulanga nyika yesu mbuyibeede.’ Bakati: ‘Peepe! Tuzyedwe katuli 12  alimwi tuzwa kuKkenani. Umwi mwanike wesu wakafwa alimwi muniini wakasyala andeende.’ Josefa wakababuzya kuti: ‘Amukeete mwanike wanu nkukuti ndimusyome.’ Nkinkaako, bakabweeda kulimbabo.

Nizyakamana zilyo zyabo, Jakkobo wakabatuma lubo bana bakwe kuti bakasunze kuEgepita. Kulweendo oolu, bakiinka aBbenjamini mwanike wabo. Josefa wakasunka bakulana bakwe kwiinda mukusisa nkomesi yakwe yansiliva musaka lyaBbenjamini lyazilyo mpawo wakababuzya kuti biibba. Babelesi baJosefa nibakiijana musaka lyaBbenjamini bakulana bakwe bakayoowa. Bakakumbila kuti Josefa asubule mbabo kutali Bbenjamini.

Chiindi eechi Josefa wakaziba kuti bakulana bakwe bakali bachincha. Josefa takachili kukonzya pe kuumuna. Wakalila akwaamba kuti: ‘Ndime Josefa mwanike wanu. Ndeende uchipona na?’ Bakulana bakwe bakagamba loko. Wakababuzya kuti: ‘Mutalikataazyi akaambo kazintu nzimwakandichitila. Leza nguwe wakandituma kuchitila kuti nzomufutule. Amufwambaane mukamweete okuno ndeende.’

Bakabweeda kulimbabo akubuzya wisi makani aaya mabotu, mpawo wisi bakamweeta kuEgepita. Josefa wakazoobonana lubo awisi kakwiindide minyaka miingi loko.