A vai ai Iosepha i te fare tapearaa, ua moemoeâ te arii no Aiphiti, o Pharao, i te mau moemoeâ aita ˈtu taata i nehenehe e faataa. Ua faaite hoê o ta ˈna mau tavini e e nehenehe Iosepha e faaite atu i te auraa o ta Pharao mau moemoeâ. Faaue atura Pharao ia haere oioi e tii ia Iosepha.

Ani atura Pharao ia ˈna: ‘Nehenehe anei oe e faataa mai i ta ˈu mau moemoeâ?’ Pahono atura Iosepha: ‘E itehia i Aiphiti e hitu matahiti auhune e i muri iho e hitu matahiti oˈe. A maiti hoê taata î i te paari no te haaputu i te maa ia ore to oe nunaa e pohe i te poia.’ Parau atura Pharao: ‘O oe ta ˈu e maiti! E riro ïa oe ei taata tiaraa teitei roa ˈˈe i Aiphiti, i raro aˈe noa mai ia ˈu!’ Nafea Iosepha i ite ai i te auraa o te mau moemoeâ a Pharao? Na Iehova i tauturu ia Iosepha.

I to muri aˈe na matahiti e hitu, ua haaputu Iosepha i te maa. I muri iho, ua tupu te oˈe i nia i te fenua atoa, mai ta Iosepha i parau. Ua haere mai ïa te mau taata na te ao nei e hoo mai i te maa ia Iosepha ra. Ua faaroo Iakoba, te metua tane o Iosepha, e e maa i ǒ Aiphiti. Tono atura oia i ta ˈna na tamaiti e ahuru no te haere e hoo mai i te maa.

Ua haere te mau tamaiti a Iakoba ia Iosepha ra. Ua ite oioi Iosepha o vai ratou. Aita râ to ˈna mau taeae i ite e o Iosepha tei mua ia ratou. Tipapa ˈtura ratou i mua ia ˈna, mai ta Iosepha i moemoeâ i to ˈna apîraa. Ua hinaaro Iosepha e ite e e mea ino noâ anei ratou. Parau atura oia ia ratou: ‘E mau taata hiˈo haere outou. Hinaaro outou e ite mea paruparu anei matou.’ Na ô atura ratou: ‘Aita! E 12 taeae matou no Kanaana. Hoê o to matou taeae tei pohe e te taeae apî roa ˈˈe, tei to matou metua tane ïa.’  Parau atura Iosepha: ‘Haere e tii i to outou taeae apî roa ˈˈe. E tiaturi ïa vau ia outou.’ Hoˈi atura ratou i ǒ to ratou metua tane ra.

I te taime aita faahou e maa ta te utuafare, ua tono faahou Iakoba i ta ˈna mau tamaiti i Aiphiti. I tera râ taime, ua rave atoa ratou ia Beniamina, to ratou taeae apî roa ˈˈe. No te tamata i to ˈna mau taeae, ua huna Iosepha i ta ˈna hapaina ario i roto i te pute tari huero a Beniamina. I muri iho, ua faahapa Iosepha i to ˈna mau taeae e ua eiâ ratou i ta ˈna hapaina. Imi atura te mau tavini a Iosepha i te hapaina e ua ite ratou i te reira i roto i te pute a Beniamina. Huru ê roa to ˈna mau taeae. Ua taparu ratou ia Iosepha ia faautua ia ratou, eiaha râ ia Beniamina.

Taa ˈtura ia Iosepha e ua taui iho â to ˈna mau taeae. Aita Iosepha i nehenehe faahou e huna i to ˈna mau huru aau. Ua taˈi roa oia e ua parau: ‘O vau o Iosepha, to outou taeae. Te ora noâ anei ra to ˈu metua tane?’ Ua maere roa to ˈna mau taeae. Parau atura oia: ‘Eiaha e inoino no ta outou i rave i nia ia ˈu. Ua tono te Atua ia ˈu i ǒ nei no te faaora ia outou. Haaviti, haere e tii i to ˈu metua tane e afai mai ia ˈna i ǒ nei.’

Hoˈi atura ratou i ǒ to ratou metua tane no te faaite i teie parau oaoa e no te afai ia ˈna i Aiphiti. A tau matahiti hoi i teie nei, aita Iosepha i ite aˈe i to ˈna metua tane. Ua amui faahou raua i teie nei.