Иосиф кара-бажыңга олурда, Египеттиң чагырыкчызы, фараон, кымның-даа тайылбырлап шыдавазы дүштер дүжээн. Фараоннуң бир кулу ол дүштерни Иосиф тайылбырлап шыдаар дээн. Оон фараон Иосифти дораан кыйгыртып алган.

Фараон Иосифтен: «Мээң дүштеримни тайылбырлап бер» — деп дилээн. Иосиф аңаа: «Египетке чеди чыл ишти аъш-чем хөй боор, а ооң соонда чеди чыл ишти аш-чут боор. Чон аштавас кылдыр, хөй чемни шыгжап аар угаанныг кижиден шилип алыңар» — дээн. Фараон: «Мен сени шилип алыйн! Мээң-биле кады Египетти чагырар сен!» — деп чугаалаан. Иосиф ооң дүштериниң утказын канчап билип кааныл? Аңаа Иегова дузалаан.

Иосиф чеди чыл дургузунда шыгжамырларга аъш-чемни чыып келген. Соонда бүгү черге, Иосифтиң чугаалааны дег, аш-чут эгелээн. Чер бүрүзүнден улус Иосифтен чем садып алыр дээш кээп турган. Ооң ачазы Иаков база Египетте аъш-чем барын билип кааш, ынаар он оглун чоргузупкан.

Иосиф акыларын көрүп кааш, дораан танып каан. Акылары ону танываан. Акылары аңаа мөгеерге, Иосиф бичиизинде көрген дүжүн сактып келген. Иосиф оларның дашталган чүректери чымчаан бе деп хынаар бодаан. Ынчангаш ол оларга: «Силер шивишкиннер-дир силер. Бистиң чуртувуска хора чедирер дээш келген силер» — дээн. Олар аңаа: «Чок, бис Ханаандан 12 алышкы-дыр бис. Бирээвис чок апарган, а хеймеривис ачазы-биле артып калган» — деп харыылаан.  Иосиф оларга: «Ол хеймер дуңмаңарны бээр эккелиңер, оон силерге бүзүрээр мен» дээрге, алышкылар ачазынче дедир чорупкан.

Иаковтуң өг-бүлезинге аъш-чем төнүп каарга, ол оолдарын Египетче катап чоргузупкан. Бо удаада олар бичии дуңмазы Вениаминни эдертип алган. Иосиф оларны шенээр деп бодап алган. Ол Вениаминниң тараалыг шоодайынга мөңгүн саваны чажырып кааш, оларны оорланган деп буруудаткан. Вениаминниң шоодайындан саваны тып алырга, акылары корга берген. Олар Иосифтен Вениаминни эвес, а оларны кезедирин чаннып дилеп турган.

Ынчан Иосиф акылары өскерли берген деп билип каан. Ол минниишкиннерин чажырып шыдавайн, ыглай бергеш: «Мен силерниң дуңмаңар Иосиф-тир мен. Ачам дириг бе?» — деп айтырган. Акылары аажок кайгаан. Ол оларга: «Мээң-биле чүнү кылганыңар дээш сагыш човаваңар. Силерниң амы-тыныңарны камгалаар кылдыр, Бурган мени бээр чоргузупкан-дыр. Ам дүрген баргаш, ачамны эккелиңер» — дээн.

Акылары бажыңынче чедип келгеш, ачазынга Иосиф дириг деп дамчыткаш, ону Египетче аппарган. Дыка үр үе болганда, Иосиф биле ачазы катап ужуражып келген.