Osimbu Yosefe a kala vokayike, Fareo soma yo Kegito, wa lota onjoi yimue okuti lomue wa tẽla oku situlula elomboloko liaco. Umue pokati kapika vaye, wa sapuila Fareo okuti Yosefe o pondola oku situlula elomboloko lionjoi yaye. Vepuluvi liaco, Fareo wa tuma oku vilikiya Yosefe.

Fareo wa pula Yosefe hati: ‘O tẽla hẽ oku situlula elomboloko lionjoi yange?’ Yosefe wa tambulula Fareo hati: ‘Vokuenda kuanyamo epanduvali, vofeka Yegito mu ka kala okulia kualua, pole, anyamo epanduvali a ka kuamamo, ku iya onjala yalua. Kaliye nõla omunu wa koleliwa haeye ukualondunge oco a seleke okulia okuti omanu vove ka va kala onjala.’ Fareo wa popia hati: ‘Ndu ku nõla muẽle ove! O kala omunu wavali wa velapo Kegito!’ Yosefe wa kũlĩhĩle ndati elomboloko lionjoi ya Fareo? Ocili okuti, Yehova wa kuatisa Yosefe.

Vokuenda kuanyamo epanduvali, Yosefe wongolola okulia kualua. Noke kueya oku kala onjala yalua vofeka yosi, ndomo Yosefe a ci popele. Omanu va tunda kolonepa vialua oco va lande okulia ku Yosefe. Isiaye Yakoba eci a yeva okuti Kegito kuli okulia, wa tuma ekũi liomãla vaye oco va endeko oku ka landa okulia.

Omãla va Yakoba va enda ku Yosefe kuenje eye wa va limbuka vonjanja yaco. Pole, va huvaye ka vo limbukile. Ovo va kekamẽla Yosefe ndeci a lotele vonjoi eci a kala umalẽhe. Yosefe wa yonguile oku kũlĩha nda va huvaye handi vo suvuka. Kuenje Yosefe wa va sapuila hati: ‘Ene vulondavululi. Weyi oku kũlĩhĩsa ekalo liofeka yetu.’ Ovo va tambulula vati: ‘Sio! Tu kasi 12 komãla kofeka yo Kanana.  Umue pokati ketu wa fa, pole, kuasula wa siala la isietu.’ Noke Yosefe wa va sapuila hati: ‘Ndi neneli manjene kuasula, oco ndi tave nda vu kasi oku vangula ocili.’ Omo liaco, va tiukila konjo ku isiavo.

Eci okulia kuepata lia Yakoba kua pua, eye wa tuma omãla vaye oku tiukila Kegito. Onjanja eyi ovo vambatavo Benjamini manjavo kuasula. Oco Yosefe a seteke va huvaye, wa kapa okopo yaye yopalata vonjeke ya Benjamini kuenda wa va lundila okuti va nyana okopo yaco. Eci apika va Yosefe va sanga okopo vonjeke ya Benjamini, va huvaye va saluka. Noke ovo va pinga ku Yosefe oco a va kangise, okuti Benjamini hayeko.

Cilo Yosefe wa limbuka okuti va huvaye va pongoloka kovituwa. Yosefe ka tẽlele vali oku likandangiya. Kuenje wa fetika oku lila loku va sapuila hati: ‘Ame manjene Yosefe. Isiange handi o kasi lomuenyo?’ Va huvaye va komõha calua. Pole, Yosefe wa va sapuila hati: ‘Ko ka liveteli evelo omo lieci wa ndingi. Momo Suku wa numa kulo oku popela ovimuenyo viene. Kaliye tiukili lonjanga kuenda neni isiange kulo.’

Ovo va enda konjo oco va sapuileko isiavo esapulo liwa kuenda oku u nena Kegito. Ndaño okuti Yosefe kuenda isiaye tunde eci va litepa pa pita anyamo alua, pole, veya oku kala vali kumosi.