Okathi Yosefe aari awe mukhatteya, Farawo, mwene a wEjiitu aahiloha, masi khuuvo aawenrye omuleela ele yaataphulela aya. Murumeyi mmosa a Farawo aahimuleela wira Yosefe anwerya otaphulela yooloha eyo. Nto moohipisa Farawo aahiruma wira aruuhiwe Yosefe.

Farawo aahimukoha wira: ‘Munoowerya otaphulela sooloha saka?’ Yosefe aahaakhula wira: ‘WEjiitu sinookhala iyaakha 7 sa yoolya yinceene, nuumala-vo sinookhala iyaakha 7 sa etala. Mmuthanle mutthu a miruku wira asuke soolya wira atthu anyu ehikhwe etala’. Nto Farawo aahimwaakhula wira: ‘Kinoothanlani nyuwo! Nyuwo munrowa okhala mukhulupale a nenli a wEjiitu!’ Yosefe aawenrye sai osuwela ele yaataphulela sooloha sa Farawo? Yehova taamukhalihenrye.

Mwa iyaakha 7, Yosefe aahithukumanya soolya. Nuumala-vo, yaahikhumelela etala ilapo sotheene ntoko aahimyale awe Yosefe. Atthu a ilapo sotheene yaanirowa wEjiitu wira yatumiheriwe soolya ni Yosefe. Tiithi awe, Yakobe aahiiwa wira wEjiitu saahikhala soolya sinceene, nto aahaaruma anaawe 10 wira yathume.

Anaawe Yakobe yaahirowa wa Yosefe, nto moohipisa Yosefe aahaasuwela, masi awo khiyaamusuwela. Awo yahuurama ohoolo wawe ntoko Yosefe aalonhe awe okathi aari awe mmiravo. Yosefe aaphavela oweha akhala wira nlelo axinnawe yaari ootakhala. Nto aahaaleela so: ‘Nyuwo mwa anamahottela. Nyuwo murwenle ohottela elapo ela wira mpwetexe’. Awosa yaahimwaakhula wira: ‘Nnaari! Hiyo niri 12 owannyihu oKanani. Mmosa ohookhwa, nave mwaana ookiseriwa ohanle ni apapihu  owaani’. Nuumala-vo, Yosefe aahaaleela wira: ‘Mmuruuhe munninyu yoowo ookiseriwa wira kikupali wira munlavula ekeekhai’. Nto awosa yaahitthikela owaani wira yaaleele apapaya.

Okathi yaamanle aya yoolya mweemusini mwa Yakobe, owo aahaaruma-tho otthikela wEjiitu. Nto mukwaha ola yaahimukuxa munnaya ookiserya oyeva, Beniyamini. Ophavelaka osuwela akhala wira axuulupale awe yaahirukunuxa murima, Yosefe aahivitha ekoopho awe ya eparatha mmurupani mwa Beniyamini ni aahiwootherya axuulupale awe wira yaarimwiiya. Okathi arumeyi a Yosefe yaaphwannye aya ekoopho ele mmurupani mwa Beniyamini, axuulupale awe yaahixankiheya vanceene. Awosa yaahinvekela Yosefe wira: ‘Xontte, muhimuhaaxe Beniyamini, masi munihaaxeke hiyo’.

Vano Yosefe aahiweha wira axuulupale awe yaahirukunuxa murima. Yosefe khaawerya-tho olipiha murima. Nto aahipacerya wunla ni aahaaleela wira: ‘Miyo ka Yosefe munninyu. Apaapa nlelo aakhala?’ Axuulupale awe yaahitikinihiwa vanceene. Yosefe aahaaleela wira: ‘Muhiriipiwe murima, mwaha wa etthu mwaakiirenle anyu khalai. Muluku tokiruuhale opuro ola wira kiwoopoleni. Xontte mwaarowele apaapa’.

Awosa yaahitthikela owaani wira yaaleele apapaya ehaali ele; nto yaahimuroiha Yakobe wEjiitu. Nnaamwi saavinre iyaakha sinceene, vano Yosefe ni Tiithi awe yaahitthikela-tho okhala hoothe.