Samtang priso hi Jose, an Paraon nga hadi han Ehipto nagkaada mga inop ngan waray nakagsaysay han kahulogan hito. Usa han iya surugoon an nagsiring nga maisasaysay ito ni Jose. Iginpatawag dayon han Paraon hi Jose.

An Paraon nagpakiana: ‘Maisasaysay mo ba an akon mga inop?’ Hi Jose binaton: ‘Magkakaada hura nga pagkaon ha Ehipto ha sulod hin pito ka tuig, tapos magkakaada pito ka tuig nga gutom. Pagpili hin maaramon nga tawo nga magtitirok hin pagkaon basi diri magutom an imo katawohan.’ An Paraon nagsiring: ‘Ikaw an akon ginpipili! Magigin ikaduha ka nga pinakagamhanan nga tawo ha Ehipto!’ Kay ano nga maaram hi Jose han kahulogan han mga inop han Paraon? Kay ginbuligan hiya ni Jehova.

Han sumunod nga pito ka tuig, nagtirok hi Jose hin pagkaon. Tapos nagkaada gutom ha bug-os nga tuna, sugad han iya ginsiring. An mga tawo ha iba-iba nga lugar pumalit kan Jose hin pagkaon. An iya tatay nga hi Jacob nakabati nga may pagkaon ha Ehipto, salit ginpakadto niya an iya napulo nga anak basi pumalit hin pagkaon.

Kumadto kan Jose an mga anak ni Jacob, ngan iya dayon hira nakilala. Pero an iya mga bugto, waray makakilala ha iya. Yinukbo hira ha iya sugad la han iya inop han batan-on pa hiya. Karuyag niya hibaroan kon nagbag-o na hira. Salit nagsiring hiya: ‘Mga espiya kamo. Karuyag niyo hibaroan kon ano an kaluyahan han amon nasud.’ Hira nagsiring: ‘Diri! Dose kami nga magburugto nga taga-Canaan. Usa han amon bugto patay na, ngan an  amon putó aadto ha amon tatay.’ Tapos hi Jose nagsiring: ‘Dad-a nganhi an iyo putó, ngan matoo ako.’ Salit umuli hira ha ira tatay.

Han naubos utro an pagkaon han pamilya ni Jacob, ginpabalik niya an iya mga anak ha Ehipto. Igin-upod na nira an ira putó nga hi Benjamin. Basi sarihan an iya kabugtoan, iginbutang ni Jose an iya silber nga kopa ha sako ni Benjamin nga ginsudlan hin lugas, ngan iya gin-akusaran hira ha pagkawat hito. Han nabilngan han mga surugoon ni Jose an kopa ha sako ni Benjamin, diri makatoo an iya kabugtoan. Nakimalooy hira kan Jose nga hira na la an sirotan imbes hi Benjamin.

Yana sigurado hi Jose nga nagbag-o na an iya kabugtoan. Waray na hiya makapugong. Nagtangis hiya ngan nagsiring: ‘Ako an iyo bugto, hi Jose. Buhi pa ba hi Tatay?’ Nahipausa gud an iya kabugtoan. Iya ginsidngan hira: ‘Ayaw kamo kasubo tungod han iyo ginbuhat ha akon. Iginpadara ako nganhi han Dios basi talwason kamo. Uli dayon kamo ngan ig-upod hi Tatay nganhi.’

Inuli hira basi sumatan an ira tatay hiton maopay nga sumat ngan ig-upod hiya ha Ehipto. Katapos hin damu ka tuig nga pagkabulag, nagkaupod gihap utro hi Jose ngan an iya tatay.