Le kʼalaʼan José teʼ carceloʼ, faraón u reyil Egiptoeʼ tu wayakʼtaj kaʼapʼéel baʼaloʼob mix máak naʼatik kaʼachi. Juntúul tiʼ u j-meyajoʼobeʼ tu yaʼalajtiʼeʼ Joseeʼ jeʼel u páajtal u tsoliktiʼ baʼax u kʼáat u yaʼal u wayakʼoʼoboʼ. Faraón túuneʼ tu séebaʼanil tu yaʼalaj ka taasaʼak José.

Faraoneʼ tu yaʼalaj tiʼ: ‹¿Jeʼel wa u páajtal a waʼalikten baʼax u kʼáat u yaʼal in wayakʼoʼobeʼ?›. Joseeʼ tu núukajtiʼ: ‹Ich siete añoseʼ yaan u sen yantal baʼal jaantbil tiʼ tuláakal u luʼumil Egipto. Ken tsʼoʼokkeʼ yaan u yantal junpʼéel nojoch wiʼijil ich siete años xan. Kaxt juntúul máak jach yaan u naʼat utiaʼal u líiʼsik yaʼab janal utiaʼal maʼ u kíimil le kaaj yéetel wiʼijiloʼ›. Faraón túuneʼ tu yaʼalaj tiʼ José: ‹¡Teech ken a beet le meyajoʼ! Chéen baʼaleʼ ichiloʼoneʼ teen u maas nojchil, tumen teen le reyoʼ›. ¿Baʼaxten Joseeʼ páajchaj u yojéeltik baʼax u kʼáat u yaʼal u wayakʼoʼob faraón? Tumen Jéeoba áante.

José túuneʼ ich siete añoseʼ tu líiʼsaj yaʼab baʼal utiaʼal jaantbil. Ka tsʼoʼokeʼ béeychaj le baʼax tu yaʼalaj Joseoʼ, anchaj junpʼéel nojoch wiʼijil tuláakal yóokʼol kaab. Le beetkeʼ máakoʼob tiʼ jejeláas luʼumiloʼobeʼ ku binoʼob kaʼach maan janal Egipto. Jacobeʼ tu yojéeltaj yaan janal Egipto, le oʼolal tu túuxtaj 10 u túulal u paalaloʼob utiaʼal ka maanakoʼobiʼ.

U paalaloʼob Jacobeʼ bin u yiloʼob José, letiʼ túuneʼ tu séebaʼanil tu kʼaj óoltoʼob. Chéen baʼaleʼ letiʼeʼ maʼ kʼaj óoltaʼab tumen u sukuʼunoʼobiʼ. Letiʼobeʼ chinlajoʼob tu táan, bey béeychajik le baʼax tu wayakʼtaj José tu paaliloʼ. Letiʼeʼ u kʼáat u yojéelt wa láayliʼ pʼektaʼaneʼ, ka túun tu yaʼalajtiʼob: ‹Teʼexeʼ chéen taaljaʼaneʼex chʼúuk, chéen taaljaʼaneʼex a wileʼex máakalmáak le lugaroʼob maʼ jach kanáantaʼan tiʼ le luʼumaʼ›. Letiʼobeʼ tu  yaʼaloʼobtiʼ: ‹¡Maʼ taaljaʼanoʼon chʼúukiʼ! Toʼoneʼ kajaʼanoʼon tu luʼumil Canaán, 12 sukuʼuntsiloʼon kaʼachi, juntúuleʼ kíimi yéetel le maas chichnoʼ pʼáat tu yiknal k-papá›. Joseeʼ tu yaʼalajtiʼob: ‹Taaseʼex a wíitsʼineʼexoʼ beyoʼ yaan in creertik le baʼax ka waʼalikeʼexoʼ›. Letiʼob túuneʼ suunajoʼob tu yotoch u papaʼob.

U láakʼtsiloʼob Jacobeʼ pʼáat minaʼantiʼob janal tu kaʼatéen, le oʼolal tu kaʼa túuxtaj u paalaloʼob Egipto. Le ka binoʼobeʼ tu bisoʼob Benjamín. Utiaʼal u yilik wa tsʼoʼok u kʼexik u modos u sukuʼunoʼobeʼ, Joseeʼ tu taʼakaj u copa de plata tu costal Benjamín, ka tu yaʼaleʼ Benjamín okle. Le ka kaxtaʼab le copa tu costal Benjaminoʼ, jach jaʼakʼ u yóol u sukuʼunoʼob. Ka joʼopʼ u kʼáat óoltikoʼob tiʼ José ka castigartaʼak letiʼob, maʼ Benjaminiʼ.

Bey túun tu yilil José tsʼoʼok u kʼexik u modos u sukuʼunoʼoboʼ. Maʼ páajchaj u seguer u aguantartik bix u yuʼubikubaiʼ ka túupʼ u yokʼol. Tsʼoʼoleʼ tu yaʼalajtiʼob: ‹Teen José, ¿láayliʼ wa kuxaʼan in papaeʼ?›. U sukuʼunoʼobeʼ jach jaʼakʼ u yóoloʼob. Ka aʼalaʼabtiʼob tumen José: ‹Maʼ u yaatal a wóoleʼex yoʼolal le baʼax ta beeteʼexoʼ, Dios túuxten wayeʼ utiaʼal in salvartik a kuxtaleʼex. ¡Tu séebaʼanil! Taaseʼex in papá wayeʼ›.

Ka suunaj u sukuʼunoʼob tu yotochoʼobeʼ tu tsikbaltoʼob tiʼ u papá le baʼaxoʼob maʼalobtak úuchtiʼoboʼ, tsʼoʼoleʼ tu bisoʼob Egipto. Máan yaʼab tiempo úuchik u kaʼa ilkuba José yéetel u papá.