Si Job, i ma sahalak baoa na burju na manomba Jahowa. Tinggal di kota Us do ibana. Mamora do ibana jala godang keluargana. Diurupi ibana do na pogos, janda, dohot dakdanak na so adong be natua-tuana. Nang pe diulahon ibana na denggan, adong do sitaononna?

Sai diparrohahon Sibolis do ibana. Didok Jahowa ma tu Sibolis, ‘Diparrohahon ho do naposongku si Job? Ndang adong jolma na songon ibana di tano on. Ditangihon ibana do ahu jala diulahon do na denggan.’ Dialusi Sibolis ma, ‘Ala dipasu-pasu Ho do ibana jala dijaga Ho. Dilehon Ho do tano dohot angka binatang tu ibana. Alai molo dibuat Ho i, pasti ndang olo be ibana manomba Ho.’ Didok Jahowa ma, ‘Uji ma si Job, alai unang pamate ibana.’ Boasa dipaloas Jahowa Sibolis manguji si Job? Ala pos do rohana ndang na laho muba roha ni si Job.

Diuji Sibolis ma si Job. Na parjolo, dibahen Sibolis ma halak Seba manangko pinahan dohot keledai ni si Job. Dung i, ro ma api manutung sude domba ni si Job. Ro ma muse halak Kasdim manangko angka untana. Jala godang do pangurupina na mate. Ro ma muse bencana na mansai ngeri. Tingki marpesta anak ni si Job, marumpak ma inganan i, gabe mate ma sude anak ni si Job. Mansai lungun ma roha ni si Job. Alai, tongtong do disomba ibana Jahowa.

Lomo do roha ni Sibolis asa susa si Job. Alani i, dibahen ma bisulon sude  daging ni si Job. Hansit do i. Alai ndang diboto si Job boasa masa i tu ibana. Nang pe songon i, tongtong do ibana manomba Jahowa. Diparrohahon Jahowa do i, jala las do rohana tu si Job.

Dung i, dibahen Sibolis ma muse tolu baoa manguji si Job. Didok nasida ma, ‘Pasti na mangulahon dosa do ho, alai ditabunihon ho. Diuhum Debata ma ho.’ Didok si Job ma, ‘Ndang adong na sala na hubahen.’ Dung i, gabe dirimpu ibana ma Jahowa do na mambahen ibana susa, jala didok ibana ma ndang adil Jahowa.

Adong ma sahalak na poso na margoar si Elihu. Sai dibege ibana do pangkataion ni nasida. Didok ibana ma tu nasida, ‘Sala do sude hatamuna i. Ummalo do Jahowa sian na taboto. Ndang diulahon Ibana hajahaton. Diida Ibana do sude na tabahen jala diurupi do halak na marsitaonon.’

Dung i didok Jahowa ma tu si Job, ‘Didia do ho tingki hutompa langit dohot tano on? Boasa didok ho ndang adil ahu? Mangkatai do ho, alai ndang diantusi ho boasa masa on tu ho.’ Mangangku sala ma si Job. Didok ma, ‘Sala ma ahu. Nunga hubege taringot Ho, alai saonari lam huboto ma taringot Ho. Ndang adong na so tarbahen Ho. Sala ma ahu.’

Dung salpu sudena i, dibahen Jahowa ma si Job sehat muse. Jala dilehon Jahowa do muse arta umgodang sian na parjolo. Ganjang do umur ni si Job jala marlas ni roha do ibana. Dipasu-pasu Jahowa do ibana, ala ditangihon ibana Jahowa nang pe susa. Olo do ho maniru si Job?