Sa lugar na an apod Uz, may sarong lalaki na nagsasamba ki Jehova. Job an pangaran niya. Mayamanon siya asin dakul an aki. Mabuot siya, asin tinatabangan niya an mga pobre, an mga babaying gadan na an agom, asin an mga aki na dai nang mga magurang. Pero dai na daw siya magkakaproblema dahil marahay an piggigibo niya?

Dai aram ni Job na pigmamasdan siya ni Satanas na Diyablo. Sinabi ni Jehova ki Satanas: ‘Nahiling mo an lingkod kong si Job? Daing arog niya sa daga. Nagdadangog siya sako asin ginigibo an tama.’ Nagsimbag si Satanas: ‘Siyempre pigsusunod ka ni Job ta pig-iingatan mo siya asin binebendisyunan. Tinawan mo siya nin daga asin mga hayop. Pag hinarali mo iyan gabos, dai ka na niya sasambahon.’ Nagsabi si Jehova: ‘Sige, puwede mo siyang baluon. Pero dai mo sana siya paggadanon.’ Taano ta tinugutan ni Jehova si Satanas na baluon si Job? Nagtitiwala si Jehova na magdadanay na maimbod si Job.

Sunod-sunod na trahedya an ipinaabot ni Satanas ki Job. Inot, nagpadara siya nin mga tawo na inaapod na mga Sabeo para habunon * an mga baka asin mga asno ni Job. Dangan, nasulo an gabos na karnero ni Job. Saro pang grupo nin mga tawo, an mga Caldeo, an naghabon sa saiyang mga kamelyo. Ginaradan man an mga suruguon na nag-aataman kan mga hayop na idto. Dangan an pinakagrabeng trahedya, nagadan an gabos na aki ni Job. Narumpagan kaya sinda kan harong kan may handaan sinda. Grabe an pagmundo ni Job, pero dai siya nagpundo sa pagsamba ki Jehova.

 Gusto ni Satanas na pasakitan pa si Job, kaya pinano niya nin mga lugad an bilog na hawak ni Job. Grabeng kulog an namatian ni Job. Dai niya aram kun taano ta nangyayari an gabos na bagay na ini. Pero, nagsasamba pa man giraray siya ki Jehova. Dahil digdi, ugmahon an Diyos ki Job.

Sunod, nagpadara si Satanas nin tulong lalaki para paluyahon an pagtubod ni Job. Sinabi ninda sa saiya: ‘Siguradong nagkasala ka tapos pigtatago mo iyan, kaya pinapadusahan ka nin Diyos.’ Nagsimbag si Job: ‘Dai akong ginibong ano man na sála.’ Pero nagpuon siyang mag-isip na si Jehova an dahilan kan mga kasakitan na ini, asin nagsabi na may ginibo saiya an Diyos na bakong tama.

Sarong hoben na lalaki na an pangaran Elihu an silensiyong nagdadangog sa urulay. Dangan nagtaram siya: ‘Sala an gabos na sinabi nindo. Dai ta lang kaya lubos na naiintindihan an mga dalan ni Jehova. Dai siya nuarin man magibo nin maraot. Nahihiling niya an gabos asin tinatabangan an mga tawo sa mga problema ninda.’

Dangan nagtaram si Jehova ki Job. Sabi niya: ‘Hain ka kan gibuhon ko an langit asin an daga? Taano ta sinasabi mo na may ginibo akong bakong tama? Nagtaram ka, pero dai mo man aram kun taano ta nangyayari an mga bagay-bagay.’ Inako ni Job an saiyang sála asin nagsabi: ‘Nasala ako. Nadangog ko an manungod saimo, pero ngunyan midbid taka na talaga. Daing imposible saimo. Patawadon mo po ako sa mga nasabi ko.’

Kan natapos na an pagbalo, ibinalik ni Jehova an marahay na salud ni Job asin tinawan siya nin mas dakul pa kisa kan dati. Nagkaigwa siya nin halawig asin maugmang buhay. Binendisyunan ni Jehova si Job dahil dawa pa masakit, nagdangog ini saiya. Aarugon mo daw si Job asin padagos kang masamba ki Jehova ano man an mangyari?