Mu calo ca Usi, mwali umwaume uwalepepa Yehova. Ishina lyakwe ni Yobo. Ali ne fyuma ifingi sana kabili alikwete ulupwa ulukulu. Ali ne cikuuku, kabili aleyafwa abapiina, abanakashi abafwililwe abena mwabo, e lyo na bana abashakwete abafyashi. Bushe ifi Yobo alecita ifisuma, tali no kukwata amafya?

Yobo taishibe ukuti Satana Kaseebanya alemona fyonse ifyo alecita. Yehova aebele Satana ukuti: ‘Bushe naumumona umubomfi wandi Yobo? Pa calo tapaba umuntu uwaba nga Yobo. Alomfwa ifyo mweba kabili alacita ifisuma.’ Satana ayaswike Yehova ati: ‘Ee alacita ifyo mumweba, pantu mulamucingilila kabili mwalimupaala. Mwalimupeela incende apa kwikala ne nama. Nga mwamupoka fyonse ifyo akwata akaleka ukumupepa.’ Yehova amwebele ati: ‘Kanshi umupoke fyonse lelo wimwipaya.’ Cinshi Yehova alekele Satana ukucusha Yobo? Alishibe ukuti Yobo tali no kuleka ukupepa Yehova.

Satana alitendeke ukucusha Yobo. Abalilepo ukutuma abena Sebea ukuyaiba ing’ombe ne mpunda sha kwa Yobo. Lyena umulilo waocele impaanga sha kwa Yobo shonse. Na kabili abena Kaldi baileiba ingamila shakwe. Ababomfi ba kwa Yobo abalecema ishi inama balifwile. E lyo kwalicitike ne cintu icabipishe icacilile pali fyonse. Abana ba kwa Yobo bonse balifwile ilyo ing’anda balimo yabaponeene. Yobo alyumfwile sana ububi, lelo talekele ukupepa Yehova.

 Satana alefwaya ukuti Yobo acule sana, e ico alimulwalike, pa mubili ponse pali ifilonda. Yobo aleumfwa ubukali sana. Taishibe icalengele ukuti ifyabipa filemucitikila. Lelo Yobo alitwalilile ukupepa Yehova. Lesa alimwene fyonse ifyalecitika kabili alitemenwe ifyo Yobo acitile.

Na kabili Satana atumine abaume batatu pa kuti balande ifya kukalifya Yobo. Bamwebele ati: ‘Ufwile walicita ulubembu kabili walifishile ifyo wacitile. Lesa e ulekukanda.’ Yobo atile: ‘Nshacitapo icabipa nangu cimo.’ Nomba Yobo atendeke ukumona kwati Yehova e walengele alecula kabili alandile ukuti Lesa alemufyenga.

Umulumendo umo uo baleita ukuti Elihu ena alekutika fye ilyo Yobo na baume batatu balelanda. Lyena abebele ati: ‘Fyonse ifyo mwalanda fya bufi. Yehova mukalamba sana te kuti tulingane nankwe. Yehova te kuti acite ifyabipa. Alamona fyonse ificitika kabili alafwa abantu nga bali na mafya.’

Pa numa Yehova aebele Yobo ati: ‘Wali kwi ilyo nalepanga umuulu ne calo? Ninshi walandila ukuti nshaba bwino? Ulelanda fye lelo tawaishiba icilenga ifintu fimo filecitika.’ Yobo alisumiine ukuti alilufyenye, alandile ati: ‘Nalilufyenye. Nalyumfwa ifyo mwaba nomba e lyo namwishiba. Takuli ifyo mwingafilwa ukucita. Munjeleleko pa fyo nalandile.’

Ilyo Satana alekele ukucusha Yobo, Yehova alipeele Yobo ifyuma ifingi ukucila na pa fyo akwete kale. Yobo tafwile bwangu kabili ali ne nsansa. Yehova alipaalile Yobo pa fyo atwalilile ukucita ifyo alemweba nangu ca kuti calikosele. Bushe na iwe ukaba nga Yobo kabili ukatwalilila ukupepa Yehova nangu wakwata amafya?