Cɛɛ dɔ tun be Usi jamana na, a tun be Jehova bato. A tɔgɔ ko Zɔbu. Nafolobatigi tun lo ani a ka denbayamɔgɔw tun ka ca. Mɔgɔ ɲuman tun lo ani a tun be fantanw, firiyamusow ani falatɔw dɛmɛ. Nka yala gwɛlɛya si tun tɛna Zɔbu sɔrɔ sabu a tun be koo tilennin kɛ wa?

Sutana tun be Zɔbu kɔrɔsira, nka Zɔbu tun t’o kala ma. Jehova y’a fɔ Sutana ye ko: ‘I ye ne sagokɛla Zɔbu ye wa? A ɲɔgɔn tɛ yen dugukolo kan. A be mɛnni kɛ ne fɛ ani a be koo tilennin kɛ.’ Sutana ye Jehova jaabi ko: ‘Tiɲɛn lo, Zɔbu be mɛnni kɛ i fɛ. I b’a tanga ani i b’a duga. I ye yɔrɔ ni bɛgɛnw di a ma. O bɛɛ bɔsi a la, i bena a ye ko a tɛna i bato tugun.’ Jehova ko: ‘I be se ka Zɔbu kɔrɔbɔ. Nka i kana a faga.’ Mun na Jehova y’a to Sutana ka Zɔbu kɔrɔbɔ? A tun lanin b’a la ko Sutana tɛna se Zɔbu kɔrɔ.

Sutana y’a daminɛ ka gwɛlɛya caaman lase Zɔbu ma k’a kɔrɔbɔ. A kɔnna ka mɔgɔ dɔw ci, minw be weele ko Sabekaw, ka taga Zɔbu ka misiw n’a ka faliw sonya. O kɔ, tasuma ye Zɔbu ka sagaw bɛɛ jɛni. Mɔgɔ wɛrɛw y’a ka ɲɔgɔmɛw sonya. Olu be weele ko Kalidekaw. Baaraden minw tun b’o bɛgɛnw dɛndɛna, u y’u faga. O kɔ, balawo dɔ cunna min ka jugu ni tɔɔw ye. Zɔbu ka deenw tun be ɲɛnagwɛra boon min kɔnɔ, a benna u kan k’u bɛɛ faga. Zɔbu dusu tiɲɛna kojugu, nka a ma Jehova batoli dabila.

Nka Sutana tun b’a fɛ Zɔbu ka tɔɔrɔ kosɔbɛ. O  kama a y’a kɛ joli jugu dɔw bɔra Zɔbu fari yɔrɔ bɛɛ la. Zɔbu tɔɔrɔla kosɔbɛ. A m’a lɔn mun na o koow bɛɛ b’a sɔrɔla. O bɛɛ n’a ta, a tora ka Jehova bato. Ala y’o bɛɛ ye minkɛ, Zɔbu koo diyara a ye kosɔbɛ.

O kɔ, Sutana ye cɛɛ saba ci ka na Zɔbu kɔrɔbɔ. U y’a fɔ a ye ko: ‘N’a sɔrɔ i ye koo jugu dɔ lo kɛ ani i b’a fɛ k’a dogo. Ala lo b’i ɲangira ten.’ Zɔbu ko: ‘N’ ma koo jugu si kɛ.’ Nka o kɔ, a y’a daminɛ k’a miiri ko Jehova lo b’o gwɛlɛyaw lasera ale ma. A ko Ala be min kɛra ale la, o bɛnnin tɛ.

Kanbele dɔ, min tɔgɔ ko Eliyu, ale tun jera n’a be lamɛnni kɛra. Kɔfɛ, a ye kuma ta ani a ko: ‘Aw bɛɛ ye min fɔ, o tɛ tiɲɛn ye. Jehova ka bon haali fɔɔ an tɛ se k’o faamu. A tɛ se ka koo jugu si kɛ. A ɲɛɛ be fɛɛn bɛɛ la ani a be mɔgɔw dɛmɛ u ka gwɛlɛyaw la.’

O kɔ, Jehova kumana Zɔbu fɛ. A ko: ‘Ne ye sankolo ni dugukolo dan tuma min na, i tun be min? Mun na i ko ne tilennin tɛ? I be kuma, nka i t’a lɔn mun na koow be kɛ.’ Zɔbu sɔnna a ka fili ma ani a ko: ‘Joo tun tɛ n’ fɛ. N’ tun ye i koo mɛn, nka sisan kɔni n’ b’i lɔn yɛrɛ yɛrɛ la. I tɛ dɛsɛ foyi la. N’ tun ye min fɔ, yafa n’ ma.’

Kɔrɔbɔli bannin kɔ, Jehova y’a kɛ Zɔbu kɛnɛyara. Fɛɛn minw tun b’a fɛ, Jehova y’o ɲɔgɔn caaman di a ma ka tɛmɛ fɔlɔ kan. Zɔbu ye sii jan sɔrɔ ani a ye ɲɛnamaya kɛ hɛɛrɛ la. Zɔbu ye mɛnni kɛ Jehova fɛ hali gwɛlɛya la. Jehova y’a duga o kosɔn. Koo o koo mana i sɔrɔ, yala i bena to ka Jehova bato i ko Zɔbu wa?