Iai te mwaane ae maeka n te aba ae Uti, ao e taromauria Iehova. Arana bon Iobi. Bon te mwaane ae rangi ni kaubwai ao a bati natina. E akoi ao e buobuokiia aomata aika maiu ni kainnano, aine ake a a tia ni mate buuia, ao ataei aika akea aia karo. Ma e nang akea ngkanne ana kangaanga Iobi ibukina bwa e kakaraoa ae raoiroi?

E aki ataia Iobi ae e teimatoa Tatan te Riaboro n tataraia. E taku Iehova nakon Tatan: ‘Ko a tia n iangoa au toro ae Iobi? Bon akea n ai arona n te aonnaba. E ongeaba irou ao e kakaraoa ae eti.’ E kaeka ni kangai Tatan: ‘E koaua bwa e ongeaba iroum Iobi. Ko kamanoa ao ko kakabwaiaa. Ko anganna abana ao ana nanai ni man. Anai mairouna ni kabane ao ane e na aki manga taromauriko.’ E taku Iehova: ‘Ko kona ni kataa Iobi. Ma ko aki riai ni kamatea.’ E aera Iehova ngke e kariaia Tatan bwa e na kataa Iobi? Bwa e ataia raoi ae e na bon aki bwaka Iobi.

E a moana kataakin Iobi Tatan ni kangaanga aika bati. Te moan, e kanakoia kaain Teba bwa a na kimoai ana kao ma ana taongki Iobi. Imwina, a bane ni mate ana tiibu Iobi n te ai. A kimoaaki ana kamero irouia aomata aika I-Kareria. Ao a tiringaki naba ana toro Iobi ake a kawakinia maan akanne. Imwina, e a riki te kangaanga ae moan te kananokawaki. Ngke a tabe n amwarake ao ni moi natin Iobi, ao a a bwakaraki naba n te auti are a mena iai ao a bane ni mate. E rangi n uruaki nanon Iobi ma e bon aki katoka taromaurian Iehova.

E tangiria Tatan bwa e na korakora riki rawawatan Iobi, ngaia are e a kaona rabwatana n taiani kaboa. E rangi ni  korakora marakin Iobi. E aki ataia bwa e aera ngkai a riki baikai nakoina. Ma e ngae n anne, e teimatoa n taromauria Iehova. E nori arona aikai ni kabane te Atua ao e rangi ni kukurei irouna.

Imwin anne, e kanakoia mwaane aika teniman Tatan bwa a na kataa Iobi. A taku nakoina: ‘Tao ko a tia ni bure ao ko kataia ni karabaa. E a katuuaaeko te Atua.’ E taku Iobi: ‘I tuai mani karaoa te bwai teuana ae bure.’ Ma imwina, e a moanna n iangoa Iehova bwa e karikii kangaanga aikai, ao e a taekinna bwa e ribuaka te Atua nakoina.

E ongongora te rorobuaka n ataei ae Eriu n te maroro. Imwina ao e taku: ‘A bane ni bure baika kam taekin. E kakannato riki Iehova nakon ae ti kona n ataia. E aki kona ni karaoa te bwai teuana ae buakaka. E nori bwaai ni kabane ao e buokiia aomata n aia kangaanga.’

Imwin anne, ao Iehova e a kataetaea Iobi. E taku: ‘Ko mena ia ngke I karika karawa ma aonnaba? E aera ngkai ko taekinna bwa I ribuaka? Ko taetae ma ko aki atai bukin rikini bwaai.’ E butimwaea Iobi kairuana ao e taku: ‘I boni kairua. I a tia n ongongo taekam, ma I a kinako raoi ngkai. Akea te bwai ae ko aki kona ni karaoia. Kabwaraa au bure n au taeka.’

Ngke e toki kataakin Iobi, e a manga kaoka marurungina Iehova ao e anganna baika bati riki nakon ake mai mwaina. E abwabwaki maiun Iobi ao e rauaki ni maiuna. E kakabwaiaa Iobi Iehova ibukin ongeabana irouna, e ngae naba ngkana e kangaanga. Ko na katotonga Iobi ao n teimatoa n taromauria Iehova n aki ongei baika riki nakoim?