De Hiob isch en Diener vo Jehova. Er isch sehr riich und lebt mit sinere grosse Familie z Uz. De Hiob isch ganz en liebe Maa. Er hilft dene, wos nid liecht hend, zum Bispil hilft er de Fraue, wo kei Maa meh hend oder dene Chind, wo d Eltere gstorbe sind. Er macht alles richtig. Aber heisst das jetzt, dass er nie Problem wird ha?

De Hiob weiss nid, dass er vo Satan, em Tüfel, beobachtet wird. Da seit Jehova zum Tüfel: «Gäll, du hesch gseh, was de Hiob für en Maa isch. Uf de Erde gits keine wie ihn. Er lost uf mich und er macht, was richtig isch.» De Tüfel seit: «Isch ja logisch, lost er uf dich. Du beschützisch ihn ja und segnisch ihn. Du gisch ihm Land und Tier. Aber nimm ihm mal alles weg, denn hört er scho uf, dir z diene.» Jehova seit: «Also, du dörfsch de Hiob teschte. Aber töte dörfsch ihn nid.» Wiso seit Jehova, dass er das dörf? Er isch sich sicher, dass de Hiob d Prüefig wird schaffe.

Jetzt macht de Tüfel, dass eis Unglück nach em andere passiert. Zerscht schickt er d Sabäer, wo em Hiob sini Chüeh und Esel stehled. Nachher sterbed em Hiob sini Schaf imene Füür. D Chaldäer stehled sini Kamel und d Diener, wo uf d Tier gluegt hend, werded umbracht. Einisch, wo d Chind vom Hiob es Fescht fiired, passiert s Schlimmschte: S Huus kracht zäme und alli Chind sind tot. De Hiob isch eso truurig und trotzdem hört er nid uf, Jehova z diene.

De Tüfel wett, dass de Hiob no meh muess liide. Drum macht er, dass de Hiob am ganze Körper gruusigi Gschwür überchunnt. D Gschwür tüend em Hiob ganz fescht weh. Er weiss nid, wiso das alles passiert. Und gliich hört er nid uf, Jehova z diene. Gott gseht das alles und er isch richtig stolz uf de Hiob.

Nachher schickt de Tüfel drü Männer zum Hiob. Si wend ihn teschte und säged zu ihm: «Du hesch sicher gsündiget und gisch es nume nid zue. Jetzt bestraft dich Gott für das.» De Hiob seit: «Nei, ich ha nüt falsch gmacht.» Aber mit de Ziit het er gliich s Gfühl, dass Jehova schuld isch, dass er all di Problem het. Und er seit sogar, dass Gott unfair isch zu ihm.

En junge Maa, de Elihu, het di ganzi Ziit zueglost. Jetzt seit er au öppis: «Was ihr alli gseit hend, stimmt eifach nid. Jehova isch grösser und weiss vil meh als mir. Er macht nie öppis Böses. Er gseht alles und er hilft de Mensche, wenn si Problem hend.»

Denn seit Jehova zum Hiob: «Wo bisch du gsi, wo ich de Himmel und d Erde gmacht ha? Wiso seisch du, dass ich unfair bin? Du weisch ja gar nid, wiso das alles passiert.» De Hiob git sini Fehler zue und seit: «Ich ha vo dir ghört, aber erscht jetzt kenn ich dich würklich. Für dich isch alles möglich. Was ich gseit ha, isch falsch, das tuet mir sehr leid.»

Wo d Prüefig dure isch, macht Jehova de Hiob wider gsund. Und er git ihm vil meh, als de Hiob vorher gha het. De Hiob het es langs und glücklichs Lebe. Er wird vo Jehova gsegnet, wil er uf ihn glost het – au denn, wos ganz schwirig gsi isch. Wetsch du au so sii wie de Hiob und Jehova diene, egal, was passiert?