Eejachi wanee wayuu aʼwaajakai Jeʼwaa, kepiapuʼushi suluʼu wanee mma kanüliasü Uz. Job nünülia, washirü nia otta wainma nüchonnii. Wayuu anamia, nümüliajüin na maʼletsekana, nükaaliinjain na jieyuu outakana aʼwayuuse otta na tepichi mooʼutshiikana. ¿Nnojotsüche kasain alatüin nümüin süka wayuuin anamia nia?

Nnojotsü nütüjaain aaʼu Job nünajüin chi Yolujaakai naaʼu. «¿Pünaja aaʼuchi Job, chi aʼyataakai tamüin? Nnojoishi eein wanee wayuu eekai müin aka naaʼin. Jaa müshi tamüin otta laülaa aaʼinchi», nümaka Jeʼwaa nümüin Satanaa. Nusoutaka Satanaa: «Shiimainya jaa nümüin pümüin süka paaʼinmajüin nia, paapüin kasa anasü nümüin, koumainshi sümaa kamüʼlüin nia putuma. Püsüta nuulia tia süpüshuaʼa, nnojoleechika nuʼwaajüin pia». Nusoutakalaka Jeʼwaa: «Puuʼulaka naaʼin, nnojoipejeʼe puʼutuinjachin aaʼin nia». Nuuʼulaain Jeʼwaa nuuʼulakünüin aaʼin Job nutuma Satanaa, ¿pütüjaa aaʼu jamüin nuuʼulaaka Jeʼwaa tia? Shia süka nütüjaain saaʼu noonooin waneepia Job.

Watta saalii tü kasa naainjakat Satanaa nüka Job. Nüjütüin palajana wane wayuuinnua, sabeo münüshii, naʼluwajaka nüsachirat otta nüpüliise Job jee ajaʼlajaasü jotuin naʼanneetse Job. Nantaka mapa waneinnua wayuu chejeʼewalii Caldea, naʼluwajüin tü kameeyakalüirua otta noʼutaka naaʼin na nüchepchiakana Job. Süchikijee tia naapa achikichii outuin napüshuaʼa na nüchonniikana. Ojuttusü tü nepiakat naaʼu wanaa sümaa chajanain naya sünain ekawaa. Mojusü maʼin naaʼin Job sutuma tia, nnojoipejeʼe ooʼulaain nia suulia aʼwaajaa Jeʼwaa.

Müliasü maʼin naaʼin Job nutuma Satanaa, ajaʼttüsü maʼin nüta nutuma. Nnojotsü nütüjaain aaʼu Job jamüin sülataka wainma kasa  mojusü nümüin, ayatapejeʼe nia sünain aʼwaajaa Jeʼwaa. Niʼrüin Jeʼwaa tia, müshijeseʼe talatüin maʼin nia sutuma waneepiain Job nümaa.

Süchikijee tia, nuluwataaka Satanaa apünüinshii wayuu süpüla nuuʼulaküin naaʼin Job. «Aainjashi pia kasa mojusü, nnojotsü püküjeein süchiki. Süsalashi pia tia nutuma Maleiwa», namaka nümüin Job. Nusoutaka Job: «Nnojotsü kasain taainjalain». Niayaa Jeʼwaa naaʼinruʼu Job aainjaka tia kasa mojusükat otta nüküjaka nnojoluin lotuin nukuwaʼipa Maleiwa wanaa nümaa.

Eejachi wanee wayuu Elihú münüshi, naapajüin nanüiki naya wayuukana. Nümakalaka: «Nnojotsü shiimain tü jümakat. Anamia Jeʼwaa, matüjainsai nia aainjaa kasa mojusü. Niʼrüin kasa süpüshuaʼa otta nükaaliinjain wayuu kasale alatüin sümüin».

Nusoutakalaka Jeʼwaa nümüin Job: «¿Jalajachi pia wanaa sümaa takumajüin tü sirumatuʼukat sümaa tü mmakat? ¿Jamüshi tayaka kasirüin paashin tü alatakat pümüin? Aashajaashi neʼe pia sümaa nnojoluin pütüjaain saaʼu jamüin sülataka wanee kasa». Niyaawata aaʼu Job mojuin tü nümakat. «Mojusü tanüiki pümüin. Moto paaʼin taainjala. Taapüin püchiki paala, aluʼusaʼa jooluʼu teʼraajüichipa pia otta püinküin kasa süpüshuaʼa», nümakalaka Job nümüin Jeʼwaa.

Nuuʼulaapa Satanaa suulia nuuʼulaküin naaʼin Job, aawalaashi nia nutuma Jeʼwaa, wainma kasa naapaka nümüin suulialeʼeya tü eejatkat paala nümaʼana. Kakalia katüin noʼu sümaa talatüin nia. Wainma kasa anasü naapaka Jeʼwaa nümüin Job. Naainjain tia saaʼujee noonooin waneepia, mayaainjeʼe kapüleein tia. ¿Jama piakai? ¿Püshateerü nukuwaʼipa Job? ¿Puʼwaajeechi Jeʼwaa waneepia jaʼitasü kasain alatüin pümüin?