Dawe de nọgbẹ̀ to aigba Uzi tọn ji bo nọ sẹ̀n Jehovah. Yinkọ etọn wẹ Jobu. Dawe adọkunnọ de wẹ bọ e tindo whẹndo daho de. E jọmẹ bo nọ gọalọna wamọnọ lẹ, yọnnu he asu kú do lẹ po ovi he ma tindo mẹjitọ lẹ po. Amọ́, be nudagbe he Jobu nọ wà lẹ na zọ́n bọ e ma na tindo nuhahun depope wẹ ya?

Jobu ma yọnẹn dọ Satani Lẹgba to pinpọn emi. Jehovah dọna Satani dọmọ: ‘Be a ko doayi devizọnwatọ ṣie Jobu go ya? Mẹdepope ma tin he taidi ewọ to aigba ji. E nọ dotoaina mi bo nọ wà nuhe sọgbe.’ Satani gblọn dọmọ: ‘Jobu na setonuna we janwẹ sin. A nọ basi hihọ́na ẹn bo nọ dona ẹn. A na ẹn aigba po kanlin lẹ po. Eyin a bẹ enẹ lẹpo sọn e si din, e ma nasọ sẹ̀n we ba.’ Jehovah dọmọ: ‘A sọgan whlé Jobu pọ́n. Amọ́, a ma dona hù i.’ Naegbọn Jehovah dike bọ Satani whlé Jobu pọ́n? Na e deji dọ Jobu na yin nugbonọ wutu wẹ.

Satani jẹ nugbajẹmẹji voovo lẹ yizan ji nado whlé Jobu pọ́n. Jẹnukọn whẹ́, e do mẹhe nọ yin yiylọdọ Sabeanu lẹ hlan nado yì fìn oyìn po kẹtẹkẹtẹ Jobu tọn lẹ po. Enẹgodo, miyọ́n fiọ lẹngbọ Jobu tọn lẹpo. Mẹdevo lẹ, he nọ yin yiylọdọ Kaldeanu lẹ, fìn kanklosọ́ etọn lẹ. Devizọnwatọ he nọ penukundo kanlin lọ lẹ go lẹ sọ yin hùhù. Nuhe jọ bọdego lọ wẹ ylan hugan. Ovi Jobu tọn lẹpo to núdù dopọ to ohọ̀ de mẹ bọ ohọ̀ lọ họ́ jẹ yé ji bọ yemẹpo kú. Jobu jẹflumẹ pete, ṣigba e ma doalọtena Jehovah sinsẹ̀n.

Satani jlo dọ Jobu nisọ jiya dogọ, enẹwutu e hẹn  nutitẹ̀ fifiẹ lẹ tọ́n do agbasa Jobu tọn go gbọn filẹpo. Awufiẹsa Jobu tọn wá sinyẹn taun. Jobu ma yọ́n nuhewutu onú ehe lẹpo do to jijọ do e go. Sọgan, e zindonukọn nado to Jehovah sẹ̀n. Jiwheyẹwhe mọ nuhe to jijọ lọ lẹpo, podọ homẹ etọn hùn taun do Jobu go.

Satani sọ do sunnu atọ̀n delẹ hlan nado whlé Jobu pọ́n. Yé dọna ẹn dọmọ: ‘A na ko waylando de do nuglọ bo to zizewhla. Enẹ wẹ zọ́n bọ Jiwheyẹwhe do to yasana we.’ Jobu dọmọ: ‘N’ma ka wà nuylankan de nẹ.’ Amọ́, e jẹ linlẹn ji dọ Jiwheyẹwhe wẹ to nuhahun ehe lẹpo hẹnwa emi ji bo dọ dọ nuhe wà hẹ emi Jiwheyẹwhe te ma sọgbe.

Dẹpẹ de he nọ yin Elihu ko yí sọwhiwhe do dotoaina hodọdopọ lọ. Enẹgodo, e yihó bo dọmọ: ‘Nuhe mìmẹpo dọ wẹ ma sọgbe. Jehovah klohu nuhe mí sọgan lẹn. E ma gán wà nuylankan pọ́n gbede. E nọ mọ nulẹpo bo nọ gọalọna mí to nuhahun mítọn lẹ mẹ.’

Enẹgodo, Jehovah dọhona Jobu. E dọmọ: ‘Fie wẹ a te to whenue yẹn dá olọn po aigba po? Naegbọn a do dọ dọ nuhe wà hẹ we n’te ma sọgbe? Hodọ a te poun, a ma yọ́n nuhewutu onú ehelẹ do to jijọ.’ Jobu yigbe nuṣiwa etọn tọn bo dọmọ: ‘Nuhe n’dọ ma sọgbe. Nugbo wẹ dọ n’ko sèhó gando gowe dai, amọ́ din wẹ n’wá yọ́n mẹhe a yin taun. Nudepope ma glo we. Ma gblehomẹ na nuhe n’dọ wutu blo.’

To whenue whlepọn lọ wá vivọnu, Jehovah hẹn Jobu jẹgangan bo na ẹn nususu hugan nuhe e tindo dai lẹ. Jobu sọ nọgbẹ̀ dẹn bo do ayajẹ to gbẹzan etọn mẹ. Jehovah dona Jobu na e dotoaina ẹn, etlẹ yin to whenue nulẹ vẹawu. Be a na taidi Jobu bo na to Jehovah sẹ̀n zọnmii mahopọnna nuhahun depope ya?