Sa duta sang Uz, may isa ka tawo nga nagasimba kay Jehova. Sia amo si Job. Manggaranon sia kaayo kag madamo sila sa ila pamilya. Mabuot sia, kag ginabuligan niya ang mga pigado, ang mga balo nga babayi, kag ilo nga mga kabataan. Pero bangod ginahimo ni Job ang maayo, wala na gid bala sia sing problema?

Wala kabalo si Job nga ginatan-aw sia ni Satanas nga Yawa. Si Jehova nagsiling kay Satanas: ‘Nakita mo bala ang alagad ko nga si Job? Wala gid sing pareho sa iya sa duta. Nagapamati sia sa akon kag ginahimo niya ang maayo.’ Si Satanas nagsabat: ‘Siempre tumanon ka ni Job. Kay man, ginaproteksionan mo sia kag ginapakamaayo. Ginhatagan mo sia sing duta kag mga sapat. Kuhaa bala ina tanan, kay indi na sia magsimba sa imo.’ Si Jehova nagsiling: ‘Puede mo sia testingan. Pero indi mo sia puede pagpatyon.’ Ngaa ginpasugtan ni Jehova nga testingan ni Satanas si Job? Kay nagasalig gid si Jehova nga indi sia pagtalikdan ni Job.

Gintestingan ni Satanas si Job paagi sa pila ka problema. Una, ginpadala niya ang mga tawo nga Sabeanhon para kawaton ang mga baka kag asno ni Job. Dayon, nasunog ang mga karnero ni Job. Kag may mga Caldeanhon naman nga nagkawat sang iya mga kamelyo. Ang mga alagad niya nga nagabantay sa sini nga mga sapat ginpamatay. Dayon may mas malain pa gid nga balita. Ang tanan nga bata ni Job napatay sang narumpagan sila sang balay samtang nagakinaon. Grabe gid ang kasubo ni Job, pero wala sia nag-untat sa pagsimba kay Jehova.

 Gusto pa gid paantuson ni Satanas si Job. Ginpatubuan niya sing hubag ang bilog nga lawas ni Job, kag grabe gid ini kasakit. Wala kabalo si Job kon ngaa nagakatabo ini sa iya. Pero, ginasimba gihapon niya si Jehova. Nakita ini sang Dios, kag nalipay gid sia kay Job.

Dayon, nagpadala si Satanas sing tatlo ka lalaki para pabudlayan pa gid si Job. Ginsilingan nila sia: ‘Siguro may sala ka gid pero ginatago mo lang ini. Ginasilutan ka sang Dios.’ Si Job nagsiling: ‘Wala ako sing nahimo nga malain.’ Pero abi niya si Jehova ang naghatag sa iya sini nga mga problema, kag nagsiling sia nga indi husto ang ginhimo sang Dios sa iya.

Ang pamatan-on nga si Elihu nagahipos lang samtang nagapamati sa ila pag-istoryahanay. Dayon nagsiling sia: ‘Ang tanan ninyo nga ginhambal sala. Mas maalam si Jehova sangsa aton. Indi gid sia maghimo sing bisan ano nga malain. Makita niya ang tanan kag ginabuligan niya ang mga tawo sa ila mga problema.’

Dayon si Jehova nagsiling kay Job: ‘Diin ka sang ginhimo ko ang langit kag ang duta? Ngaa nagsiling ka nga may ginhimo ako nga malain sa imo? Nagahambal ka, pero wala ka kabalo kon ngaa nagakatabo ang mga butang.’ Ginbaton ni Job ang iya sala kag nagsiling: ‘Nagsala ako. Sang una, nabatian ko lang ang parte sa imo, pero subong kilala ko na gid ikaw. Wala sing imposible sa imo. Patawara ako sa nahambal ko.’

Pagkatapos matestingan si Job, gin-ayo sia ni Jehova kag ginhatagan sing mas madamo sangsa mga nadula sa iya. Naglawig kag nangin malipayon ang kabuhi ni Job. Ginpakamaayo ni Jehova si Job kay namati sia sa iya bisan pa mabudlay ang iya sitwasyon. Mangin pareho ka man bala kay Job, nga padayon nga magasimba kay Jehova ano man ang matabo?