Motjihuro Us mwa turire omurumendu ngwee rikotamene ku Jehova. Ena re rari Job. Eye wa ri omurumendu omutumbe tjinene ngwa ri neṱunḓu enene. Eye wa ri nomutima omuwa nu aa vatere ovandu ovasyona, ovakazendu mba zepaisa ovarumendu vawo novanatje mbe hi novanene. Nu hapo mape hee kutja Job kamaa kakara nomauzeu mena rokutja aa tjiti ouwa po?

Job kaa tjiwa kutja Satan Omudiaboli ee mu tarere. Jehova wa raera ku Satan a tja: ‘Ove wa muna omukarere wandje Job? Kape nomundu tjimuna ye kombanda yehi. Eye u puratena ku ami nu u tjita ousemba.’ Satan wa zira Jehova na tja: ‘Ii otjiperi kutja Job u puratena kove. Ove u mu tjevera nu u mu sera ondaya. We mu pa ehi novinamuinyo. Posiya mu yeka oviṋa avihe mbyo uriri nu u tarere tji ma isa okurikotamena kove.’ Jehova wa tja: ‘Perinawa me ku yandjere okurora Job. Posiya o mu zepa.’ Ongwaye Jehova tja yandjera Satan okurora Job? Omena rokutja Jehova aa tjiwa kutja Job ma ṱakama mu ye.

Satan wa uta okurora Job noviwonga ovingi. Rutenga wa hinda ovandu mbe tjiukwa otjOvasaba okuvaka ozongombe nousino waJob. Okuzambo omuriro wa zepa ozonḓu zaJob azehe. Otjimbumba tjarwe tjovandu mbaave tjiukwa otjOvakaldea va vaka ozongamero ze. Ovakarere mbaave tjevere ovinamuinyo mbyo, va zepewa. Okuzambo pa tjitwa otjiwonga otjivi tjinene. Ovanatje vaJob avehe va ṱa indu omututu wondjuwo maave tjitire omukandi tji wa wira ku wo. Job wa hihamwa omutima tjinene, posiya kena pa isa okukarera Jehova.

Satan aa vanga kutja Job ma mune ouzeu kombanda  yanao, okutja wa tjita kutja Job ma pite oviraro morutu rwe aruhe. Job aa hihamwa tjinene. Eye kaa tjiwa kutja ongwaye oviṋa avihe mbi tjaavi tjitwa ku ye. Posiya wa kayenda komurungu okukarera Jehova. Mukuru wa muna oviṋa avihe mbi, nu wa ri nonyuṋe mu Job.

Okuzambo, Satan wa hinda ovarumendu 3 okuyekurora Job. Owo va raera Job nave tja: ‘Ove ngahino wa tjita ouvi nu ohoreke. Mukuru nai me ku vere.’ Job wa tja: ‘Ami hi notjiṋa otjivi tji mba tjita.’ Posiya eye wa uta okuripura kutja Jehova onge mu pe omauzeu nga aehe. Nu Job wa tja Mukuru ke mu tjindire nawa.

Omurumendu omutanda wena Elihu wa ri a mwina uriri ama puratene kehungi rawo. Okuzambo wa hungira na tja: ‘Oviṋa amuhe mbi mwa hungire oposyo. Jehova omunene tjinene pomeripura wetu. Eye kamaa roro okutjita ouvi. Eye u muna oviṋa avihe nu u vatera ovandu momauzeu wawo.’

Okuzambo Jehova wa hungira kuna Job. Eye wa tja: ‘Ove wa ri pi indu tji mba ungura eyuru nehi? Ongwaye tji mo tja hi ku tjindire nawa? Ove mo hungire uriri posiya ko nakutjiwa kutja ongwaye oviṋa tji vi tjitwa.’ Job wa yakura ondjo ye na tja: ‘Ami mba zunḓa. Mba zuva ohunga na ove posiya nai tjiri me ku tjiwa. Kape notjiṋa tji tje ku ura. Ndji isira koviṋa mbi mba hungire.’

Omarorero nga tji ya kapita, Jehova wa verura Job ne mu pe oviṋa ovingi kombanda ya imbi mbya ri na vyo komurungu wanao. Job wa hupa orure nu wa ri nehupo ewa. Jehova wa sera Job ondaya mena rokutja wa puratena ku ye nandarire tja ri kehi youzeu. Ove mo tjiti otja Job nopanḓere pokukarera Jehova, kainatja kutja pe ya tjike?