Iti daga ti Uz, adda maysa a lalaki nga agdaydayaw ken Jehova. Job ti naganna. Nakabakbaknang ni Job ken dakkel ti pamiliana. Nasingpet ni Job, ken tultulonganna dagiti marigrigat, dagiti babbai a natayan iti asawa, ken dagiti ubbing nga awanen ti nagannakna. Ngem saan ngatan a maaddaan iti problema gapu ta ar-aramidenna ti umiso?

Saan nga ammo ni Job nga isu ket palpaliiwen ni Satanas a Diablo. Kinuna ni Jehova ken Satanas: ‘Napaliiwmo kadi ti adipenko a ni Job? Awan ti kas kenkuana iti daga. Agtultulnog kaniak ken ar-aramidenna ti umiso.’ Insungbat ni Satanas: ‘Siempre agtultulnog kenka ni Job ta protprotektaram ken bembendisionam. Inikkam iti daga ken kadagiti animal. Alaem amin dagita, ket agsardengto nga agdayaw kenka.’ Kinuna ni Jehova: ‘Mabalinmo a suboken ni Job, ngem saanmo a mabalin a patayen.’ Apay nga impalubos ni Jehova a suboken ni Satanas ni Job? Ammona ngamin nga agtalinaed a matalek ni Job.

Sinubok ngarud ni Satanas ni Job. Umuna, imbaonna dagiti tattao a naawagan iti Sabeo a mangtakaw kadagiti baka ken asno ni Job. Kalpasanna, napuoran ti amin a karnero ni Job. Tinakaw met dagiti tattao a naawagan iti Caldeo dagiti kameliona. Napapatay pay dagiti adipen a mangay-aywan kadagita. Kalpasanna, napasamak ti kakaruan a trahedia. Natay ti amin nga annak ni Job idi narba ti balay a pangpangananda. Napalalo ti ladingit ni Job, ngem saan a simmardeng a nagdaydayaw ken Jehova.

Kayat ni Satanas a lallalo pay nga agrigat ni Job isu a pinaggaddilna ti intero a  bagi ni Job. Nakasaksakit dayta. Saan nga ammo ni Job no apay a mapaspasamak dagita, ngem nagdaydayaw latta ken Jehova. Nakita ti Dios amin dagita ket naragsakan unay ken Job.

Kalpasanna, nangibaon ni Satanas iti tallo a lallaki a mangsubok ken Job. Imbagada kenkuana: ‘Sigurado nga adda ilemlemmengmo a basol isu a dusdusaennaka ti Dios.’ Kinuna ni Job: ‘Awan ti inaramidko a dakes.’ Ngem idi agangay, pinanunotnan a ni Jehova ti nangted kadagiti problemana, ken imbagana a saan nga umiso ti panangtrato ti Dios kenkuana.

Agdengdengngeg idi iti saritaanda ni Eliu, maysa a lalaki nga ub-ubing ngem kadakuada. Idi kuan, imbagana: ‘Kamali ti amin nga imbagayo. Natantan-ok ni Jehova ngem iti kabaelantayo nga ammuen. Saan a pulos nga agaramid ti Dios iti dakes. Makitana ti amin ken tulonganna dagiti tattao kadagiti problemada.’

Kalpasanna, nakisarita ni Jehova ken Job. Kinunana: ‘Ayanmo idi inaramidko ti langit ken daga? Apay nga imbagam a saan nga umiso ti panangtratok kenka? Agsasaoka, ngem saanmo nga ammo no apay a mapaspasamak dagiti bambanag.’ Inamin ni Job ti kamalina ket kinunana: ‘Nagkamaliak. Adda idin nadamdamagko maipapan kenka, ngem ita, talaga nga am-ammokan. Awan ti imposible kenka. Pakawanennak kadagiti naibagak.’

Kalpasan a sinubok ni Satanas ni Job, pinaimbag isuna ni Jehova ken inikkanna iti ad-adu ngem iti dati nga adda kenkuana. Atiddog ken naragsak ti biag ni Job. Binendisionan ni Jehova ni Job ta nagtulnog kenkuana uray no narigat. Tuladem kadi ni Job ket agdayawka latta ken Jehova uray ania ti mapasamak?