Saʼ jun li naʼaj li kixkʼabʼaʼi Uz, kiwank jun li winq li kixloqʼoni chaq li Jehobʼa. Aj Job xkʼabʼaʼ, jwal bʼihom ut nim li xjunkabʼal. Joʼkan ajwiʼ, chaabʼil xnaʼlebʼ ut kixtenqʼahebʼ li nebʼaʼ, li malkaʼan ut ebʼ li kokʼal li maakʼaʼebʼ xnaʼ xyuwaʼ. Laj Job naxbʼaanu li chaabʼil naʼlebʼ. Ma nakaakʼoxla naq saʼ xkʼabʼaʼ aʼin maajunwa kiwank xchʼaʼajkilal?

Laj Job inkʼaʼ naxnaw, abʼan laj Tza yook rilbʼal li xbʼaanuhom. Li Jehobʼa kixye re laj Tza: «Ak xaawil laj Job laj kʼanjel chiwu, peʼyaal? Maajun joʼ aʼan saʼ ruuchichʼochʼ. Naʼabʼink ut chaabʼil winq». Laj Tza kixye re: «Yaal naq nakatxpaabʼ, xbʼaan naq nakaakol, nakaawosobʼtesi, nakaakʼe xchʼochʼ ut xketomq... Maqʼ chiru chixjunil ut inkʼaʼ chik tixloqʼoni aawu». Li Jehobʼa kixye re: «Naru nakaayal rix, abʼan maakamsi». Li Jehobʼa kixkanabʼ naq laj Tza tixyal rix laj Job, abʼan ma nakaanaw kʼaʼut? Xbʼaan naq naxnaw naq maajunwa ttzʼeqtaanaaq xbʼaan laj Job.

Laj Tza yalaq chan re ru kixrahobʼtesi laj Job re xyalbʼal rix. Xbʼeenwa kiroksi wiibʼ oxibʼ li poyanam li nekeʼyeemank re Sabeo re naq teʼrelqʼa ebʼ li wakax, ebʼ li teelom wakax ut ebʼ li bʼuur. Chirix chik aʼan jun li xaml kixkamsi chixjunil ebʼ li xkarneer. Jun chʼuut aj Caldeo keʼrelqʼa ebʼ li kameey. Keʼkamk ajwiʼ ebʼ li xmoos li yookebʼ rilbʼal ebʼ li ketomq. Chirix chik aʼan kichalk li xnimal ru chʼaʼajkilal: naq chixjunilebʼ li ralal xkʼajol yookebʼ chi waʼak, keʼkamk naq kitʼaneʼk li ochoch saʼ xbʼeenebʼ. Laj Job kʼajoʼ kirahoʼk saʼ xchʼool, abʼan maajunwa kixkanabʼ xloqʼoninkil li Jehobʼa.

Laj Tza kiraj xrahobʼtesinkil chiʼus laj Job,  joʼkan naq kixkʼe xox chirix. Aʼin kikʼehok re xnimal ru xrahilal. Aʼan moko kixnaw ta kʼaʼut yook xkʼulbʼal naabʼal li maaʼusilal, usta joʼkan moko kixkanabʼ ta xloqʼoninkil li Jehobʼa. Naq li Yos kiril aʼin, jwal kisahoʼk saʼ xchʼool rikʼin li kixbʼaanu laj Job.

Chirix chik aʼan, laj Tza kixtaqla oxibʼ li winq re xyalbʼal rix laj Job. Ebʼ li winq aʼin keʼxye re: «Chʼolchʼo naq xatmaakobʼk ut anaqwan nakaawaj xmuqbʼal. Joʼkan naq, li Yos yook aakʼebʼal chi xtojbʼal aamaak». Laj Job kixsumehebʼ: «Laaʼin inkʼaʼ xinbʼaanu li maaʼusilal». Abʼan moqon chik kiʼok xkʼoxlankil naq saʼ xkʼabʼaʼ li Jehobʼa kichalk li xchʼaʼajkilal ut kixye naq li Yos moko us ta xnaʼlebʼ.

Jun li saaj al aj Elihu xkʼabʼaʼ kirabʼi chixjunil li kiyeheʼk re laj Job ut maakʼaʼ kixye. Abʼan naq kiʼok chi aatinak, kixye: «Chixjunil li nekeeye moko joʼkan ta. Nim li Jehobʼa, maaʼani naxtaw ru xnimal, aʼan maajunwa naxbʼaanu li maaʼusilal. Naril chixjunil ut naxtenqʼa ebʼ li poyanam naq wankebʼ saʼ chʼaʼajkilal».

Li Jehobʼa kiʼaatinak ajwiʼ rikʼin laj Job. Kixye re: «Bʼar wankat chaq naq kinyiibʼ li choxa ut li Ruuchichʼochʼ? Kʼaʼut nakaakʼoxla naq moko us ta innaʼlebʼ? Nakat-aatinak chi inkʼaʼ nakaanaw kʼaʼut nakʼulmank ebʼ li kʼaʼaq re ru». Laj Job kixkʼulubʼa li xpaltil ut kixye: «Xinsachk. Chaakuy inmaak xbʼaan li waatin. Yal wabʼihom chaawix, abʼan anaqwan relik chi yaal naq ninnaw aawu ut nawil naq chaawu naruhank chixjunil».

Naq kiraqeʼk li yalok ix, li Jehobʼa kixkʼirtasi laj Job ut kixkʼe naabʼal chik li kʼaru re chiru li kiwank chaq najter. Laj Job kiwank chiru naabʼal chihabʼ ut sa saʼ xchʼool. Li Jehobʼa kirosobʼtesi laj Job xbʼaan naq junelik kiʼabʼink, usta wank sut kichʼaʼajkoʼk chiru. Ut laaʼat? Ma chanchanaqat laj Job ut junelik taaloqʼoni li Jehobʼa, maakʼaʼ naxye kʼaru tchalq saʼ aabʼeen?