Moshilongo Us, omwa li omulumenhu wedina Job, oo a li ha longele Jehova. Okwa li oshipuna nokwa li e na oukwaneumbo wa kula. Job okwa li omunalukeno, ha kwafele ovo va hepa, ovafiyekadi nosho yo eefiye. Ndele mbela molwaashi Job okwa li ha longo ouwa, osho osha hala okutya ka li ta ka hangwa komaupyakadi asha?

Satana Ondiaboli okwa li e wete ashishe osho Job ta ningi, ashike Job ka li e shi shii. Jehova okwa li a lombwela Satana a ti: ‘Owa didilika ngoo omupiya wange Job? Kombada yedu kaku na nande umwe ngaashi ye. Oha dulika kwaame nokulonga osho sha yuka.’ Satana okwa nyamukula ta ti: ‘Oshoshili kutya Job oha dulika kwoove. Owe mu amena, owe mu nangeka noupuna nowe mu pa epya noimuna. Kufa po oinima yaye aishe, opo nee ota ka efa po oku ku longela.’ Opo nee Jehova okwe mu nyamukula ta ti: ‘Oto dulu okuyeleka Job, ashike ino mu dipaa nandenande.’ Mbela omolwashike Jehova a li a efa Satana a yeleke Job? Omolwaashi okwa li e na elineekelo kutya Job ota ka pondola.

Satana okwa li a tameka okuyeleka oudiinini waJob nomaupyakadi mahapu. Tete, okwa li a tuma Ovasaba va vake po eengobe neendongi daJob. Opo nee omundilo owa li wa xwika po eedi daJob adishe. Natango, eengamelo daye oda li da vakwa po kOvakaldi. Ovapiya vaJob ovo va li tava lifa oimuna ova li va dipawa. Konima yaasho, opa ka holoka oshiponga shinyanyalifa neenghono eshi ovana vaJob aveshe va fya eshi eumbo omo va li tava li oitendele le va wila. Job okwa li a teka omukumo, ndele nande ongaho ka li a efa po okulongela Jehova.

Satana okwa li a hala Job a mone oixuna shi dulife opo, onghee okwa li a etela Job omukifi, a tumba oidinda olutu laye alishe nokwa li mouyahame munene. Ashike Job ka li e shii kutya  omolwashike ta ningilwa oinima ii. Ndele nande ongaho, okwa li a twikila okulongela Jehova. Jehova okwa li a hokwa Job molwaashi okwa li e wete oinima aishe oyo a li ta ningilwa.

Konima yaasho, Satana okwa li a tuma ovalumenhu vatatu opo va ka yeleke Job. Ovalumenhu ovo ova li va lombwela Job tava ti: ‘Shiimba owa nyona meholeko, nomolwaasho Kalunga e ku handukila.’ Job okwa li e va nyamukula a ti: ‘Inandi nyona sha.’ Opo nee okwa li a hovela okudiladila kutya Jehova oye a li ta etifa omaupyakadi, nonokutya ita ungaunga naye pauyuki.

Omulumenhu omunyasha wedina Elihu oo a kala ta pwilikine a mwena keenghundafana, okwa li a hovela okupopya ta ti: ‘Amushe inamu popya oinima i li mondjila. Jehova oku na eshiivo lihapu li dule letu, noke na efiku a longe owii. Oku wete keshe shimwe, noha kwafele ovapiya vaye ngeenge ve na omaupyakadi.’

Opo nee Jehova okwa li a pula Job ta ti: ‘Owa li peni eshi nda shita eulu nedu? Omolwashike to ula nge kutya nghi fi omuyuki? Oto popi ashike ndele ku shii kutya omolwashike oinima tai ningwa.’ Job okwa li a dimina kutya oku na epuko, ndele ta ti: ‘Onda li nda puka. Ohandi ku udu ashike, ndele paife onde ku shiiva nawa. Onda mona kutya iho nyengwa kusha, nonde livela ombedi omolwoinima oyo nda popya.’

Eshi Job a pita meyeleko, Jehova okwa li e mu kwafela a kale vali e na oukolele nokwe mu pa oinima ihapu i dule pwaayo a li e na nale. Okwa kala nomwenyo efimbo lile nokwa hafela okukalamwenyo, na Jehova okwa li e mu nangeka noupuna eshi a kala ha dulika kuye, nokuli naashi sha li shidjuu. Mbela oto ka twikila ngoo okulongela Jehova noudiinini ngaashi Job a li a ninga, kashi na nee mbudi kutya otashi pula shike?