Mwa naha ya Uzi, nekupila muuna yomuñwi yanaalapela Jehova. Libizo lahae neli Jobo. Neli muuna yanaafumile hahulu mi naanani lubasi lolutuna. Naanani sishemo, naatusize batu bane bali babotana, basali bane bashwezwi ki baana babona, ni banana bane basina bashemi babona. Nihaike kuli Jobo naezanga lika zelukile, kana taba yeo italusa kuli naasike akopana ni miinelo yetaata?

Jobo naasazibi kuli naakakopana ni miinelo yetaata, kono Satani Diabulosi kunani zanaalelile kueza. Jehova ali ku Satani: ‘Kana ulemuhile mutangaaka Jobo? Hakuna mutu yaswana ni yena mwa lifasi. Uezanga lika zelukile ni lika kaufela zeni mubulelela.’ Satani aalaba kuli: ‘Ki niti luli Jobo walatelelanga zeu mubulelela. Wamusilelezanga mi umufuyauzi. Umufile naha ni limunanu. Muamuhe lika kaufela zanani zona mi ukatuhela kukusebeleza.’ Jehova ali: ‘Wakona kulika Jobo. Kono usike wamubulaya.’ Ki kabakalañi Jehova hanaatuhelezi Satani kulika Jobo? Naaziba kuli Jobo naakazwelapili kusepahala ku yena.

Satani akala kulika Jobo ka mutahiseza miliko yemiñata. Sapili, naalumile Masabea kuyo uzwa likomu ni limbongolo za Jobo. Hasamulaho, mulilo watoyundisa lingu za Jobo kaufela. Sikwata sesiñwi sa batu bona Makaladeya, sauzwa likamele zahae. Batanga bane bababalela limunanu zeo nebabulailwe. Hamulaho, kwataha kozi yemaswe hahulu. Bana ba Jobo kaufela nebashwile muta ndu mone baezeza mukiti neibawezi. Jobo naautwile hahulu butuku kwa pilu, kono naasika tuhela kusebeleza Jehova.

Satani naabata kuli Jobo anyande hahulu nikufita,  kacwalo atahisa kuli Jobo abe ni litombo fa mubili kaufela. Jobo naautwa hahulu butuku. Naasazibi libaka lika zeo kaufela hane liezahala ku yena. Nihakulicwalo, Jobo naazwezipili kusebeleza Jehova. Mulimu naalemuhile lika zeo kaufela mi naatabiswa ki Jobo.

Hamulaho, Satani aluma baana babalaalu kuyo lika Jobo. Bamubulelela kuli: ‘Neuzize sibi mi neulika kusipata. Mulimu ki yena yakufa koto.’ Jobo ali: ‘Hakuna zenifosize.’ Kono hasamulaho, Jobo akala kunahana kuli Jehova ki yena yanaatahisa miinelo yetaata yanaakopana ni yona, mi naabulezi kuli Mulimu naasa muezi hande.

Mutangana yabizwa Elihu naateeleza ka tokomelo kwa puisano yabona. Cwale abulela ka kutiisa ali: ‘Zemubulezi kaufelaa mina lifosahalile. Jehova ki yomutuna kufita molukona kunahanela. Hakoni kueza lika zemaswe. Wabona lika kaufela mi watusanga batu habakopana ni butata.’

Jehova aambola ni Jobo. Ali: ‘Neuinzi kai hane nibupa lihalimu ni lifasi? Ki kabakalañi haubulela kuli haniyo hande? Wabulela, kono hauzibi libaka lika haliezahalanga.’ Jobo aitumelela mafosisa ahae, mi ali: ‘Nenifosize. Neniutwile feela ka za hao kono fa cwale nakuziba luli. Hakuna zeukona kupalelwa kueza. Uniswalele kabakala litaba zene nibulezi.’

Muliko hane ufelile, Jehova atusa Jobo kuba ni buikangulo bobunde hape mi amufa lika zeñata kufita zanaanani sapili. Jobo naapilile ka nako yetelele mi naaikozi bupilo. Jehova naafuyauzi Jobo bakeñisa kuli naamuutwile kusina taba ni kuli nekuli taata kueza cwalo. Kana mukaba sina Jobo ni kuzwelapili kusebeleza Jehova kusina taba ni zemuka kopana ni zona kaufela?