Mu ntanda ya Uza, mwādi muntu umo wādi utōta Yehova. Dijina dyandi i Yoba. Wādi mpeta mukatampe kadi wādi na kisaka kikatampe. Wādi na mutyima muyampe, kadi wādi ukwasha balanda, bana-bakaji bafwilwe balume, ne bana bampikwa bambutwile. Nansha Yoba byaādi ulonga bintu biyampe, le ko kunena’mba kādipo wa kutanwa na makambakano?

Satana Dyabola wādi utala Yoba, inoko Yoba kuyuka mpika. Yehova wāipangwile Satana amba: ‘Le wadi ubamone mwingidi wami Yoba? I kutupu muntu udi bwa aye pa ntanda. Untejanga ne kulonga bintu biyampe.’ Satana wāmulondolola’mba: ‘I bya bine, Yoba i mukukōkele. Wi mumukinge ne kumwesela. Wi mumupe ntanda ne banyema. Abe muyate’byo, nandi ukaleka’byo kukutōta.’ Yehova wānena’mba: ‘Ubwanya kutompa Yoba. Inoko kokamwipaya.’ Mwanda waka Yehova wālekele Satana atompe Yoba? Yehova wādi ukulupile amba Yoba kakajilulapo.

Satana wāanza kutompa Yoba na byamalwa bivule. Dibajinji, wātumine bantu betwa bu bene Sabe bāye kwiba bañombe ne bampunda ba Yoba. Kupwa, mudilo wāonakanya mikōko yonso ya Yoba. Bene Kaladea nabo, kisumpi kikwabo kya bantu, bāiba bangamedia. Kupwa, wāfikilwa na kyamalwa kibi mpata. Bana bonso ba Yoba bāfwa pēbaponene njibo mobādi badya masobo. Yoba wātyumukilwe mutyima, inoko kālekelepo kutōta Yehova.

Satana wādi usaka Yoba asusukile’ko bininge, penepo wāmeneja Yoba bipote ngitu yonso. Yoba wādi na misanshi  mikatampe. Kādipo uyukile mwanda waka bino bintu byonso byādi bimufikila. Nansha nankyo, Yoba wādi’nka utōta Yehova. Leza wādi umwene bino byonso, kadi wāsangedile Yoba bininge.

Kupwa, Satana wātuma bana-balume basatu bakatompe Yoba. Kēbanena Yoba amba: ‘Udi bwa abe mulonge bubi, ubafi’bo. I Leza wakupa mfuto.’ Yoba wānena’mba: ‘Nkilongelepo kibi nansha kimo.’ Penepa wāshilula kulanga’mba i Yehova umuletela bino byamalwa, kadi wānena’mba Leza ke molokepo.

Nsongwalume umo witwa bu Edihu, wādi wibateja talala. Kupwa, wēbalombola’mba: ‘Byonso byomwanena’byo i bya bubela. Yehova i mukatampe kutabuka ne motumuyukīle. Kabwanyapo kulonga kintu kibi nansha kimo. Umwene bintu byonso, kadi ukwashanga bantu mu byamalwa byabo.’

Kupwa, Yehova wēsamba na Yoba. Kānena’mba: ‘Le wādi kwepi pōnapangile diulu ne ntanda? Mwanda waka unena’mba ami amba nkidipo moloke? Ubanena, inoko kuyukilepo mwanda waka bino bintu bilongeka.’ Yoba wāitabije kilubo kyandi ne kunena’mba: ‘Ne mulube. Nadi ngivwananga myanda yobe, ino pano nakuyuka bya binebine. I kutupu kintu kikukomena kulonga. Mfwile’ko lusa pa byonanenene.’

Matompo pa kupwa, Yehova wāpadile Yoba mpalo na kumupeteja monka ne kumupa bintu bivule kupita byaādi nabyo dibajinji. Yoba wāikele’ko myaka mivule kadi na būmi bwa nsangaji. Yehova wāesele Yoba pa mwanda wa kuteja kwaāmutejeje enka ne mu bitatyi bya makambakano. Lelo nobe ukendelela nyeke kutōta Yehova pamo bwa Yoba, nansha shi ubatanwa na makambakano?