Mu buloba bua Usa muvua muntu mukuabu uvua utendelela Yehowa. Dîna diende divua Yobo. Uvua ne bubanji bua bungi ne bana ba bungi. Uvua muntu muimpe ne uvua wambuluisha bapele, bakaji bavua bafuishe ba bayabu, ne bana ba nshiya. Kadi Yobo kavua mua kupeta ntatu anu bualu uvua wenza malu mimpe anyi?

Yobo kavua mumanye ne: Satana Diabolo uvua umutangila to. Yehowa wakambila Satana ne: ‘Udi mumonaku muena mudimu wanyi Yobo anyi? Kakuena muntu bu yeye pa buloba to. Udi unteleja ne wenza malu makane.’ Satana wakandamuna ne: ‘Bushuwa Yobo udi ukutumikila. Udi mumulame ne mumubeneshe. Udi mumupeshe tshitupa tshia buloba ne nyama. Munyenga bintu bionso abi, ne yeye nealekele kukutendelela.’ Yehowa wakamba ne: ‘Udi mua kuteta Yobo. Kadi tshiena nkuanyishila bua kumushipa to.’ Bua tshinyi Yehowa wakalekela Satana uteta Yobo? Uvua mushindike ne: Yobo kavua mua kumubenga to.

Satana wakatuadija kutumina Yobo makenga bua kumuteta. Tshia kumpala, wakatuma bena Seba bua kuiba ngombe ne mpunda bia Yobo. Pashishe kapia kakabutula mikoko ya Yobo yonso. Bantu bakuabu, mmumue ne: bena Kasada, bakiba tumelu tuende. Bakashipa bena mudimu bende bavua balama nyama ayi. Pashishe dikenga dibi menemene diakamukuata. Bana ba Yobo bonso bakafua pavua nzubu uvuabu benzela difesto mubupukile. Yobo wakanyingalala bikole, kadi kakalekela kutendelela Yehowa to.

Satana uvua musue bua Yobo akenge bikole menemene, ke yeye kumutua biuwuja mubidi mujima. Biakasama Yobo bikole. Kavua mumanye bua tshinyi malu onso au  avua amufikila to. Kadi Yobo uvua anu utendelela Yehowa. Nzambi wakamona malu onso au, ne wakasanka bikole bua tshivua Yobo muenze.

Pashishe Satana wakatuma bantu basatu bua kuteta Yobo. Bakamuambila ne: ‘Udi ne bua kuikala muenze mpekatu ne mukebe bua kumusokoka. Nzambi udi ukunyoka.’ Yobo wakamba ne: ‘Tshiena muenze bualu bubi nansha bumue.’ Kadi pashishe wakatuadija kuela meji ne: Yehowa ke uvua umukebela ntatu ayi, kuambaye ne: Nzambi kavua umuenzela malu makane to.

Nsongalume mukuabu, diende Elihu, uvua uteleja muyuki au talalaa. Pashishe wakangata dîyi, kuambaye ne: ‘Malu anudi nuenu bonso bambe nga dishima. Yehowa mmunene, ne katuena mua kumumvua to. Kena mua kuenza bualu bubi nansha kakese. Udi umona malu onso ne wambuluisha bantu mu ntatu yabu.’

Pashishe Yehowa wakakula ne Yobo. Wakamuambila ne: ‘Uvua penyi pamvua mufuke diulu ne buloba? Bua tshinyi udi wamba ne: tshiena ngenza malu makane? Udi wakula, kadi kuena mumanye bua tshinyi malu adi enzeka nunku.’ Yobo wakitaba tshilema tshiende, kuambaye ne: ‘Mvua muenze bibi. Mvua mumvue lumu luebe, kadi mpindieu ngakumanyi bushuwa. Kakuena bualu budi mua kukukolela to. Mfuila koku luse bua bimvua muambe.’

Pakajika diteta dia Yobo, Yehowa wakamupesha kabidi makanda a mubidi mimpe ne bintu bia bungi kupita bivuaye nabi kumpala. Yobo wakalala matuku a bungi muikale ne nsombelu wa disanka. Yehowa wakabenesha Yobo bua muvuaye mumuteleje nansha pavuaye mu lutatu. Wewe pebe neufuane Yobo ne neutungunuke ne kutendelela Yehowa nansha bualu kayi bukufikile anyi?