Umu mpanga iya Uzi, mwali umuntu umwi uwapepanga Yeova. Izina lyakwe wali a Yobo. Wakweti sana ivyuma nu lupwa ulukulu. Wali ni cikuuku, nupya wazwilizyanga apiina, anaci aafwilwa ya iya, na ana aatakwata avyazi. Vino Yobo wacitanga ivisuma, uzye cikupiliula ukuti wene atatazile akwatepo intazi?

Yobo atamanyile ukuti Satana walolanga vyonsi vino wacitanga. Yeova wanenyile Satana ati: ‘Uzye watulola umuomvi wane Yobo? Kutaya uwaya wakwe Yobo umu nsi. Akanguvwila nupya akacita ivisuma.’ Satana watile: ‘Kwene Yobo akakuvwila pano ukamucingilila nu kumupaala. Wamupeela impanga ni nyama. Ukamupoke vyonsi, nawe alata ukukupepa.’ Yeova nawe watile: ‘Ukezye Yobo nomba utakamukome.’ U mulandu ci uno Yeova wazumilizizye Satana ukwezya Yobo? Pano wamanyile ukuti Yobo alacimvya.

Satana wezizye Yobo umu nzila zipusanepusane. Watandikilepo ukutuma Aina Sebeya ukuti yakiye ing’ombe na ya punda yakwe Yobo. Lyene umoto nao wosile imfwele zyonsi zyakwe Yobo. Iumba lyuze ilya Ina Kalideya livile ingamali zyakwe. Aomvi aasakamalanga iviteekwa vivi nayo yakomiilwe. Lyene palondeliile uzanzo uwipisye. Ana yakwe yonsi yafwile lino ing’anda ino yazevezyangamo umutebeto yayaponiile. Yobo wali sana nu landa, nomba atatiile ukupepa Yeova.

 Satana walondanga ukuti Yobo acule sana, fwandi wamulwalike ivilonda umwili onsi. Yobo wacuzile sana. Atamanyile icalenzile ukuti vintu vyonsi vyamucitikila. Nomba watwalilile ukupepa Yeova. Leza waweni vyonsi ivyacitikanga, nupya watemilwe sana pali vino Yobo wazizimizye.

Lyene Satana watumile aonsi yatatu kuti yakezye Yobo. Yamunenyile iyati: ‘Watuyembuka nupya ukufisa uluyembu. Leza aliwe akukufulula.’ Yobo nawe watile: ‘Ntacisile icipe icili consi.’ Nomba watandike ukwelenganya ukuti Yeova uwalenzile akwate intazi zii nupya walanzile ukuti Leza wamufyenzile.

Umonsi uwacance Eliu uvwanga vino yalanzyanyanga. Lyene walanzile ati: ‘Vino mwensi imulanda i vya ufi. Yeova wakwata sana amaka. Atanga acite icipe icili consi. Akalola vyonsi nupya akaazwa antu ali ni ntazi.’

Lyene Yeova wanenyile Yobo ati: ‘Uzye akuno wali lino naumbanga iyulu ni nsi? U mulandu ci uno utulandila ukuti naya nu lufyengo? Ukulanda sile, lelo utamanyile umulandu uno ivintu vikucitikila.’ Yobo wazumile ukuti waluvyanyizye nupya watile: ‘Naluvyanyizye. Nkauvwa sile pali wewe, lyene lelo nakumanya. Pasi vino ungafilwa ukucita. Unjeleleko pali vino nalanzile.’

Lino uwezyo wasizile, Yeova walenzile Yobo ukuya nu umi usuma, nupya wamupeezile ivintu ivingi kucila na pali vino wakweti. Yobo wikazile amanda aingi nupya wali ni nsansa. Yeova wapaazile Yobo pa mulandu wakuti wamuvwiliile nanti cakuti ivintu vyatazile. Uzye ulakolanya Yobo nu kutwalilila ukupepa Yeova nanti cakuti waya ni ntazi?