Rao n da be Uts tẽngã pʋgẽ n tũud a Zeova. A yʋʋrã la a Zoobe. A ra yaa rakãagre, t’a zakã neb me yaa wʋsgo. A ra yaa nin-sõngo, n sõngd naong-rãmbã, pagb nins sɩdb sẽn ki wã, la kamb nins sẽn pa le tar baaba bɩ ma wã. A sẽn da maand sẽn yaa sõma wã, rat n yeelame t’a pa na n seg zu-loees bɩ?

A Sʋɩtãan ra nee a Zoobe, la a Zoob ra pa mi ye. A Zeova yeela a Sʋɩtãan yaa: ‘Fo yãa mam tʋm-tʋmd a Zoob bɩ? Ned ka be dũniyã zug n yaa wa yẽ ye. A kelgda maam la a maand sẽn yaa tɩrga.’ T’a Sʋɩtãan leok yaa: ‘A Zoob pa tõe n pa kelg foo ye. Fo kogend-a lame, la f ningd-a barka. Fo kõ-a-la pʋto, la rũmsi. Sãam rẽ fãa n gese, a pa na n le kelg foo ye.’ La a Zeova yeela a Sʋɩtãan yaa: ‘Fo tõe n namsa a Zoobe, la ra saag n kʋ-a ye.’ Bõe yĩng t’a Zeova bas t’a na n nams a Zoobe? Bala a Zeova ra miime t’a Zoob pa na n tol n bas yẽ tũub ye.

A Sʋɩtãan maana bũmb toor-toor n nams a Zoobe. Pipi, a kɩtame tɩ neb b sẽn boond tɩ Sabẽ-rãmb wa zu a niisã la a bõensã. Rẽ poore, bugum n dɩ a piisã fãa. Neb a taab me b sẽn boond tɩ Kalde rãmb wa n zuu a yʋgma wã, la b kʋ a tʋm-tʋmdbã sẽn da get rũmsã yellã. La yel-beed sẽn yɩɩd woto fãa n da wate. A Zoob kambã ra tigma taab roog pʋgẽ n dɩtẽ, tɩ roogã lʋɩ n kʋ-b fãa. A Zoob sũurã sãama hal wʋsgo. La baa ne rẽ, a pa bas a Zeova ye.

A Sʋɩtãan ra ratame t’a Zoob nams n paase. Rẽ n so t’a kɩt t’a yĩngã fãa lebg noada, tɩ ra zabd wʋsgo. A Zoob ra pa mi  bũmb ning sẽn kɩt tɩ woto fãa paamd-a wã ye. La baa ne rẽ, a ra ket n tũuda a Zeova. A Zeova sẽn yã rẽ wã, a sũur yɩɩ noog wʋsg ne a Zoobe.

A Sʋɩtãan kɩtame me tɩ rap a tãab wa gom goam sẽn nams a Zoobe. B yeel-a lame yaa: ‘Fo maana sẽn yaa wẽnga, n solge, yaa rẽ la Wẽnnaam sẽn sɩbgd foo wã.’ La a Zoob yeelame: ‘Mam pa maan sẽn yaa wẽng ye.’ La a wa n sɩng n tagsdame tɩ yaa a Zeova n kɩt t’a namsdẽ. A yeelame tɩ Wẽnnaam pa maan yẽ neer ye.

Rao a to yʋʋr sẽn boond t’a Eliyu ra maaga a yĩng n kelgd a Zoob rãmba. A wa n yeel-b lame yaa: ‘Yãmb fãa sẽn yetã pa sɩd ye. Tõnd pa tõe n wʋm a Zeova sẽn maandã fãa võor ye. A pa tol n maand sẽn yaa wẽng ye. A nee bũmb fãa, a sõngda nebã me tɩ b welgd b zu-loeesã.’

Rẽ poore, a Zeova yeela a Zoob yaa: ‘Mam sẽn wa n maand tẽngã ne saasã, fo ra bee yɛ? Bõe yĩng tɩ fo yeel tɩ mam pa maand foo neere? Fo gomdame bala, la fo pa mi bũmb ning sẽn kɩt tɩ fo namsdẽ wã ye.’ A Zoob sak n deegame t’a pa tar bʋʋm ye. A yeelame: ‘Mam tudgame. Mam wʋmame tɩ b gomd fo yelle, la masã, m bãnga foo sõma. Bũmb ka be fo sẽn pa tõe ye. Maan-m sugri.’

A Zeova wa n kɩtame t’a Zoob namsgã sa. A kõ-a-la laafɩ, la a le kɩt t’a paam arzɛk n yɩɩd pĩndã. A Zoob vɩɩmã ra noomame. A vɩɩmdame n kaoose. A Zeova ning-a-la barka, a sẽn sak yẽ baa ne a sẽn da namsd wʋsgã. Fo na n kell n saka a Zeova wa a Zoobe, baa sã n wa yaa toog bɩ?