Ipan tlali Uz, itstoya se tlakatl katli kiueyichiuayaya Jehová. Motokaxtiyaya Job, ya tlauel tlapijpixtoya uan kinpixtoya miakej ichampoyouaj. Job teikneliyaya uan kinpaleuiyaya teikneltsitsij. Nojkia kinpaleuiyaya siuamej katli ya miktoyaj ininueuejuaj uan konemej katli amo kinpixtoyaj inintatauaj. ¿Timoiljuia amo kema tlaijiyouiskia pampa kipixtoya kuali iyolo?

Maske Job amo kimatiyaya, Satanás kiitayaya kej monejnemiltiyaya. Jehová kiiljuik Satanás: “¿Tikitstok notlatekipanojka Job? Ipan nochi Tlaltipaktli amo itstok seyok kej ya. Nechneltoka uan kuali monejnemiltia”. Satanás kinankilik: “Mitsneltoka pampa tijmokuitlauia uan tijteochiua. Tijchijtok ma kipia miak tlali uan miakej itlapialjuaj. Xijkixtili nochi tlen kipia uan tikitas kenijkatsa ayokmo mitstekipanos”. Jehová kinankilik: “Uelis tiyejyekos, san amo xijmikti”. ¿Tijmati kenke Jehová kikajki Satanás ma kiyejyeko Job? Pampa motemachiyaya Job nochipa kineltokaskia.

Satanás kiyejyekok Job ika miak tlamantli tlen amo kuali. Achtoui, kichijki se keskij maseualmej katli kintokaxtiyayaj sabeos, ma kiichtekilikaj iuakaxuaj uan iburrojuaj. Teipa, ika se ueyi tlitl kichijki ma mikikaj iborregojuaj. Nojkia, nopa caldeos kiichtekilijkej icamellojuaj. Uan mijkej nochi itekipanojkauaj katli kinmokuitlauiyayaj itlapialjuaj. Teipa Satanás kichijki ma pano se tlamantli tlen tlauel kiyolkokok Job: nopa kali kampa mosentilijtoyaj nochi ikoneuaj, uetski ininpani uan kinmiktik. Maske Job tlauel mokuesok, amo kema kitlauelkajki Jehová.

 Satanás kinekiyaya Job nojua ma tlaijiyoui, yeka kimakak se kokolistli tlen kiasik ipan nochi itlakayo. Nopa kokolistli tlauel kitlaijiyouiltiyaya. Maske Job amo kimatiyaya kenke kipanoyaya miak tlamantli tlen amo kuali, nojua kiueyichiuayaya Jehová. ToTeotsij kitlachilijtoya Job uan tlauel kipaktik tlen kichijki.

Teipa, Satanás kichijki eyij tlakamej ma kiyejyekokaj Job. Inijuantij kiiljuijkej: “Uelis titlajtlakolchijtok uan tijneki tijtlatis motlajtlakol. Yeka toTeotsij mitstlatsakuiltia”. Job kinnankilik: “Na amo tleno nijchijtok”. Teipa pejki moiljuia toTeotsij kichiuayaya ma tlaijiyoui, uan kiijtok toTeotsij amo kichiuayaya tlen xitlauak.

Se telpokatl katli motokaxtiyaya Eliú, san kintlakakilijtoya. Teipa, kamanaltik uan kiniljuik: “Nochi tlen inkiijtojtokej amo melauak. Jehová tlauel ueyi uan tojuantij amo kuali tikixmatij. Ya amo kema kichiua se tlamantli tlen amo kuali. Kiita nochi tlen pano uan kinpaleuia maseualmej katli tlaijiyouiaj”.

Jehová nojkia kinojnotski Job uan kiiljuik: “¿Kanke tiitstoya kema na nijchijki iluikaktli uan Tlaltipaktli? ¿Kenke timoiljuia amo nijchiua tlen xitlauak? San tikamati uan amo tijmati kenke intlaijiyouiaj”. Job kimatki mokuapolojtoya, yeka kiiljuik toTeotsij: “Xinechtlapojpoljui, nimokuapolok. Amo kuali tlen nikijtok. Na nijkaktoya tlen ta, pero nama nelia nimitsixmati uan nijmati ta nochi tiueli tijchiua”.

Kema Satanás ayokmo kiyejyekok Job, toTeotsij Jehová kichikajki uan kichijki nojua tlauel ma tlapijpia. Job nojua uejkajki itstoya miak xiuitl uan tlauel yolpaktoya. Jehová kiteochijki Job pampa nochipa kineltokak maske kipixki tlaouijkayotl. Uan ta, ¿nojkia tijchiuas kej Job uan nochipa tijueyichiuas Jehová maske titlaijiyouis?