Mu nyika yo Uzi, kwairarama mwanarume wainamata Jehovha. Zina rake ndi Jobe. Iyena wainga wakakhupuka maningi zve wainga no mbhuri huru. Wainga wakanaka mwoyo, zve waibesera varombo, vanakaji vakafihwa ngo mwamuna no vana vacina vabari. Asi zvinoda kureva kuti iyena aacaingepi no zvineso ngo ndava yo kuita zvakanaka?

Jobe aacaizviziva, asi Sathana Dhiabhu wainga ecimusota. Jehovha wakati kuna Sathana: ‘Wavona muranda wangu Jobe? Akuna umweni wakaezana naye, mundhu wakaperera no kururama. Anothya Mwari woramba zvakashata.’ Sathana wakadavira kuti: ‘Jobe anothya Mwari biresi here. Amuzivi kumungwarira zve momukomborera. Makamupa zvinyama zvinokwakwatija nyika yese. Bvisanyi zvese zvaanazvo anozoima kumunamata.’ Jehovha wakati: ‘Ejai Jobe. Asi andikutenderi kuti umuuraye.’ Ngenyi Jehovha wakatendera kuti Sathana aeje Jobe? Iyena waithemba kuti Jobe aacaizoposa.

Sathana wakatanga kueja Jobe ngo matambujiko akawanda. O kutanga, wakatuma vandhu vaidanijwa kuti vaShebha kuti vabe m’gombe jake no maburu ake. Tevere, muriro wakapisa mabvuta ese a Jobe. Cikwata cimweni co vandhu, vo ku Karadhia, vakamubira makamera ake. Vashandiri vaimangwarira vakapera kuuraiwa. Tevere akaguma masoko akashatisisa kupinda ese. Vana vese va Jobe vakapera kufa povakawihwa ngo nyumba povainga veciita mabuso avo. Jobe wainga ano mwoyo wakakhuvazika kamare, asi aazivi kuima kunamata Jehovha.

Sathana waida kuti Jobe atambujike kupinda izvi, ngo kudaro wakaita kuti  Jobe agare no mavonje akashatisisa mu muviri wake wese. Jobe waihwajihwa maningi muviri. Iyena aacaizviziva kuti ngenyi zviro zvese izvi zvaimuitikira. Ngokudaro, Jobe wakaramba acinamata Jehovha. Mwari waivona zvese izvi, zve waidakara maningi ndi Jobe.

Tevere, Sathana wakatuma vanarume vatatu kuti vaeje Jobe. Ivona vakati kwaari: ‘Kangaije wakashaishira Mwari woeja kumufisira. Mwari ari kukupanica.’ Jobe wakati: ‘Andizivi kuita ciri cese cakashata.’ Asi iyena wakatanga kurangarira kuti Jehovha ndiyena waitisa zvineso izvo zve wakananga kuti Mwari aacaimuitira zvakarungama.

Mujaha waidanijwa kuti Erihu wainga ecipurukira kubhuisana kwese kwaiithwaro ngo cinyararire. Perapo iyena wakaveketa kuti: ‘Zvese zvamuri kunangaro andizvopi. Jehovha wakakurisisa maningi. Narini iyena aazoiti zvakashata. Iyena anovona zvese zve anobesera vandhu pa zvineso zvavo.’

Perapo Jehovha wakabhuya na Jobe. Eciti: ‘Wainga kwapi, apo ndakadira maambo o nyika? Ndibvunjei, ngokuti unozivisisa. Unondovereketa, asi auzvizivi kuti ngenyi zviro zvinoitika.’ Jobe wakatenda kuti waishaisha zve wakati: ‘Ndainga ndecishaisha. Ndaimuziva ngo bzo vainanga vamweni; asi wari ndazomuziva kamare. Ndinoziva kuti munokwanisa bzese. Munondiregereravo ngo zvandakananga.’

Muejo pojakapera, Jehovha wakaita kuti Jobe ave no uhomi hwakakwana zve wakamupa zvizinji kupinda zvaainga nazvo kare. Jobe wakararama makore mazinji zve upenyu unodakajisa. Jehovha wakakomborera Jobe ngo kumuzwira kwake paaishanda no simba. Munozoitavo kudari inga ndi Jobe no kuramba mucinamata Jehovha, azvinenyi zvinoza?