Ipan ueyikalpan Uz, onen se tlakatl akin kiueyichiuaya Jehová. Itoka katka Job. Yejua kipiaya miyek tlemach tlen patioj niman ifamilia ueyi katka. Yolkuajli katka niman kinpaleuiaya akin xtlaj kipiayaj, siuamej kaualtsitsintin niman kokonej akin iknotsitsintin. Job kichiuaya tlen kuajli, ¿tiknemilia ika ipampa yejuin xkeman kipiyaskia tlaueltin?

Job xkimatiya, san ika, Satanás kitstoya. Jehová okijli Satanás: “¿Yotikitak notekipanojkauj Job? Xnemi okse ken yejua ipan tlaltikpaktli, nechkaki niman kichiua tlen melajki”. Satanás okinankili: “Kema, Job mitstlakamati. Tejua tiktlajpiya niman tikteochiua. Tikmaka tlaltin niman yolkamej. Xkuili nochi niman xok mitsueyichiuas”. Jehová okijli: “Uelis tiktlatlatas. San ika, maka tikmiktis”. ¿Tleka Jehová okikauili Satanás makitlatlata Job? Yejua kimatstoya ika Job xkitlalkauiskia.

Satanás miyek ken okitlatlatak Job. Kachtopa, okintitlan akin kimixmatiyaj ken sabeos, makichtekilitij ipolokouan niman iuakaxuan. Kuakon, tlitl okinmikti nochi iborregos Job. Oksekimej akin kimixmatiyaj ken caldeos okichtekilijkej icamellos. Noijki okinmiktijkej itekipanojkauan akin kintlajpixtoyaj iyolkauan. Sakin opanok tlen melak xkuajli. Nochimej ikoneuan omijkej pampa inpan ouets kajli kampa tlakuajtoyaj. Job melak onoyolkoko, san ika, xokikauj ika kiueyichiua Jehová.

Satanás kinekiya ika Job ok melak matlajyoui, ika yejon, okichiuj ika ipan nochi itlalnalkayo  makisakan tsotsomej. Job melak kikokouaya. Yejua xkimatiya tleka kixnamiktoya nochi yejuin. Maski ijkon, Job xokikauj ika kiueyichiua Jehová. ToTajtsin okitak yejon niman okiyolpakti tlen okichiuj Job.

Satanás okintitlan yeyi tlakamej makitlatlatakan Job. Yejuamej okijlikej: “Tejua otitlajtlako niman tikneki tikiyanas, toTajtsin aman mitstlajtlakolmaka”. Job okijto: “Xonikchiuj tlen xkuajli”. San ika, sakin okinemili ika Jehová kitlajyouiltijtoya iuan okijto ika xkichiuilijtoya tlen melajki.

Se telpochtli itoka katka Elihú kuajli tlakaktoya. Kuakon okijto: “Nochi tlen onenkijtokej xkuajli. Jehová melak ueyixtok xijkon ken tiknemiliaj. Yejua xkeman kichiua tlen xkuajli. Yejua nochi kitstika niman kinpaleuiya tlaltikpakchanejkej ijkuak kipiyaj ajmantli”.

Kuakon Jehová okinots Job. Yejua okijli: “¿Kanon tinemiya ijkuak onikchijchiuj iluikak niman tlaltikpaktli? ¿Tleka tikijtoua ika xnimelajki? San titlajtoua, nion xtikmati tlenon panotika”. Job okiseli ika onopopolo niman okijto: “Oninopopolo. Oniktekakilijka motech, san ika, aman melauak nimitsixmati. Xtlaj onka tlen xueli tikchiua. Xnechtlapopolui ipampa tlen onikijto”.

Ijkuak otlankej tlatlatalistin, Jehová okipajti Job niman okimakak melak miyek xijkon ken kipiaya kachtopa. Job onen melak miyek xiuitl niman oyolpak. Jehová okiteochiuj pampa okitlakamat maski okixnamik tlen melak ouijtika. ¿Tikchiuas ken Job niman ok tikueyichiuas Jehová maski san tlenon tikixnamikis?