Omu nsi ya Uuzi, hakaba nihatuurayo omushaija owaabaire naaramya Yehova. Akaba naayetwa Yobu. Akaba ari omugaiga munonga kandi aine eka mpango. Akaba aine embabazi, kandi akaba ahwera abooro, efaakazi, n’abaana abaabaire bataine bazaire baabo. Mbwenu shi ahabw’okugira ngu Yobu akaba naakora ebirungi, akaba atarikwija kuhikwaho oburemeezi?

Yobu ekyo akaba atarikukimanya, kwonka Sitaane Omuregi akaba naamureeba. Yehova akabuuza Sitaane ati: ‘Waayetegyereza omwiru wangye Yobu? Tihaine mushaija orikumushusha omu nsi. Naanyorobera kandi naayetantara ekibi.’ Sitaane akagarukamu ati: ‘N’amazima Yobu naakworobera. N’omurinda kandi omuhaire emigisha. Okamuha ekibanja n’amatungo. Kora aha bintu bye byona, naija kurekyera aho kukuramya.’ Yehova akagarukamu ati: ‘Noobaasa kugyeza Yobu. Kwonka torikwikirizibwa kumwita.’ Ahabw’enki Yehova yaikiriize Sitaane kugyeza Yobu? Akaba naahamya ngu Yobu tarikubaasa kuremwa.

Sitaane akatandika kugyeza Yobu n’ebigyezo bingi. Akabanza kwohereza Abaseeba baiba ente n’endogoya za Yobu. Bwanyima omuriro gukosya entaama za Yobu zoona. Kandi n’Abakaludaaya bakaija baiba engamira ze. Abaabaire nibareeberera amatungo ago nabo bakabaita. Ekyakuratsireho kikaba kiri kibi munonga. Abaana ba Yobu boona bakafa obu enju ei baabaire barimu nibashemererwa yaababandamirira. Yobu akagira enaku nyingi, kwonka tararekiire aho kuramya Yehova.

Sitaane akaba naayenda ngu Yobu abonabone  munonga, n’ahabw’ekyo akamurwaza ebironda aha mubiri gwe gwona. Yobu akaba aine obusaasi bwingi. Akaba atarikumanya ahabw’enki ebi byona byabaire nibimubaho. Kwonka nabwo, Yobu akagumizamu naaramya Yehova. Ruhanga akaba naabireeba byona, kandi akasiima Yobu.

Bwanyima Sitaane akoohereza abashaija bashatu kugyeza Yobu. Bakamugira bati: ‘Noobaasa kuba okozire ekibi kandi okateeraho kukishereka. Ruhanga ariyo naakufubira.’ Yobu akabagarukamu ati: ‘Tihaine ekibi ekinkozire.’ Kwonka bwanyima akatandika kuteekateeka ngu Yehova niwe yaabaire naamureetera oburemeezi obwo, kandi akagira ngu Ruhanga akaba atari w’oburyo.

Omushaija muto orikwetwa Elihu akaba ahurikiize barikugamba. Bwanyima akabagambira ati: ‘Mwena ebi mwagamba tibihikire. Yehova ni mukuru okukira itwe oku turikuteekateeka. Tarikubaasa kukora ekintu kibi. Naareeba buri kimwe kandi naahwera abantu abaine oburemeezi.’

Bwanyima, Yehova akagamba na Yobu. Akamugira ati: ‘Obu naataho iguru n’omusingi gw’ensi, okaaba orahi? Ahabw’enki noogira ngu tindi w’oburyo? Noogamba, kwonka torikumanya ahabw’enki ebintu nibibaho.’ Yobu akaikiriza enshobe ze reero yaagarukamu ati: ‘Ngambire ebitahikire. Nkaba nkuhuriza amatu, kwonka hati eriisho ryangye ryakwereebera. Tihariho ekirikubaasa kukurema. Ninyeteisa ahabw’ebingambire.’

Bwanyima y’okugyezibwa, Yehova akagaruka yaaha Yobu amagara marungi kandi yaamuha n’ebintu bingi ebirikukira aha bi yaabaire aine omu kubanza. Yobu akamara emyaka mingi ashemereirwe. Yehova akaha Yobu emigisha ahabw’okumworobera omu mbeera zoona. Niwe noija kuba nka Yobu ogumizemu nooramya Yehova, omu mbeera zoona?