Ɛnee nrenyia bie de Ɛɛze azɛlɛ zo mɔɔ sonle Gyihova. Bɛfɛlɛ ye Dwobu. Ɔle sukoavolɛ yɛɛ ɔlɛ abusua kpole. Ɔyɛ nyele, ɔboa ehyiavolɛma, ahunlanvolɛ yɛɛ nrisa. Noko kɛmɔ ɛnee Dwobu le sonlakpalɛ la ati, asoo ɔnrɛyia ngyegyelɛ biala ɔ?

Ɛnee Seetan Abɔnsam ɛlɛnea Dwobu, noko ɛnee Dwobu ɛnze. Gyihova bizale Seetan kɛ: ‘Wɔnwu me sonvolɛ Dwobu ɔ? Awie biala ɛnle kɛ ɔdaye wɔ azɛlɛ ne azo. Ɔtie me ne yɛɛ ɔyɛ ninyɛne mgbalɛ.’ Seetan buale kɛ: ‘Ɛhɛe, Dwobu tie wɔ. Ɛbɔ ɔ nwo bane yɛɛ wɔyila ye. Wɔmaa ye azɛlɛ nee nyɛmoa. Saa ɔ muala fi ɔ sa a, ɔnrɛzonle wɔ bieko.’ Gyihova hanle hilele Seetan kɛ: ‘Ɛbahola wɔazɔ ye wɔanlea. Noko mmaku ye.’ Duzu ati a Gyihova maanle Seetan adenle ɔmaanle ɔzɔle Dwobu ɔnleanle a? Ɛnee ɔze ye wienyi kɛ Dwobu bali nɔhalɛ.

Seetan bɔle ɔ bo kɛ ɔfa amaneɛnwunlɛ ngakyile yeazɔ Dwobu yeanlea. Mɔɔ limoa, ɔmaanle Sabima hɔwuale Dwobu nlankɛ nee ye asoaso. Akee ɔmaanle senle yelale ye mboane ne mɔ amuala. Eza Kaledeama hɔwuale Dwobu afunlumu ne mɔ kɔsɔɔti na bɛhunle ye azonvolɛ mɔɔ bɛnea ye nyɛmoa ne mɔ la. Akee ɔdele amaneɛbɔlɛ bie mɔɔ ɛnle kpalɛ fee la. Ɛnee Dwobu amra ne mɔ ɛlɛto ɛkponle wɔ sua bie anu na sua ne bule hunle bɛ muala. Dwobu lile nyane kpole noko yeangyakyi Gyihova ɛzonlenlɛ.

Ɛnee Seetan kpondɛ kɛ Dwobu nwu amaneɛ dɔɔnwo tɛla ɛhye bɔbɔ. Yemɔti ɔmaanle Dwobu anwo amuala dudule nganlɛ na ɔ nwo fofole ye kpalɛ. Ɛnee ɔnze deɛmɔti edwɛkɛ ɛhye mɔ amuala ɛlɛto ye a, noko yeangyakyi Gyihova ɛzonlenlɛ. Nyamenle nwunle mɔɔ ɛlɛkɔ zo la amuala na ɔ nye liele Dwobu anwo kpole.

Akee Seetan zoanle mrenyia nsa bie ɔmaanle bɛhɔzɔle Dwobu bɛnleanle. Bɛzele ye kɛ: ‘Ɔkɛyɛ kɛ wɔyɛ ɛtane bie wɔvea. Nyamenle a ɛlɛtua wɔ kakɛ a.’ Dwobu buale kɛ: ‘Metɛyɛle ɛtane biala.’ Akee ɔdele nganeɛ kɛ Gyihova a ɛlɛmaa yeanwu amaneɛ a, na ɔhanle kɛ Nyamenle nee ye anli ye boɛ.

Ɛnee kpavolɛ bie mɔɔ bɛfɛlɛ ye Ɛlaehu la ɛyɛ koonwu ɔlɛtie bɛ. Akee ɔhanle kɛ: ‘Mɔɔ bɛlɛka la amuala ɛnle nɔhalɛ. Gyihova le kpole tɛla yɛ adwenle ne. Ɔnrɛyɛ amumuyɛ ɛlɛ. Ɔnwu debie biala yɛɛ ɔboa menli mɔɔ bɛwɔ ngyegyelɛ nu la.’

Akee Gyihova nee Dwobu dendɛle na ɔbizale ye kɛ: ‘Mekɛ mɔɔ mebɔ anwuma nee aze la ɛnee ɛwɔ nienwu? Duzu ati a ɛse me ne wɔ anli ye boɛ ɛ? Wɔdendɛ, noko ɛnde mɔɔ wɔha la abo.’ Dwobu liele ye nvonleɛ dole nu na ɔhanle kɛ: ‘Meyɛ ɛtane. Mede ɛ nwo edwɛkɛ noko kɛkala, menwu wɔ kpalɛ. Ɛkola ɛyɛ debie biala. Fa mɔɔ meha la kyɛ me.’

Wɔ sɔnea ne anzi, Gyihova maanle Dwobu dele kpɔkɛ na ɔvale mɔɔ ɔminlinle la amuala mɔnwo ɔmaanle ye. Dwobu dɛnlanle anyelielɛ nu mekɛ tendenle. Gyihova yilale Dwobu kɛ ɔdiele ye wɔ mekɛ bɔbɔ mɔɔ ɔ nwo hyelele ye la anu la. Saa edwɛkɛ bie to wɔ a, asoo ɛbahɔ zo wɔazonle Gyihova kɛ mɔɔ Dwobu yɛle la ɔ?