Uz llajtapimi Diosta adoraj Job runa causarca. Paica jatun familiayuj, yallitaj charij runami carca. Huajchacunata, viudacunata, yaya mama illaj huahuacunatapishmi ayudaj carca. ¿Paica alli runa cashpapish llaquicunata charinataca yachashcachu canga?

Jobca mana yacharcachu. Pero Diablomi paita ricucurca. Chaimantami Diosca Satanastaca, ‘¿ñucata sirvij Jobtachu ricucungui? Pai shinaca pi mana tiyanchu. Ñucata cazuj, allita ruraj runami can’ nirca. Satanasca, ‘animalcunata, allpacunata cushpa bendiciajpi cuidajpimi cantaca cazun. Can tucuita quichujpica ña mana cantaca adorangachu’ nishpami cutichirca. Chaita nijpimi Diosca, ‘pai imalla charishcacunaca cambaj maquipimi. Paillata amataj huañuchingui’ nircami. Jobta Diablo llaquichichunmi Diosca saquirca. ¿Imamanta? Job paita cazushpa catinatami Diosca alli yacharca.

Diabloca Jobtaca tucui layami llaquichirca. Puntapica Saba llajtamanta runacunami Jobpaj huagracacunata, burrocunata shuhuarcacuna. Qꞌuipaca nina urmashpami tucui ovejacunata huañuchirca. Caldeo runacunaca camellocunatami shuhuarcacuna. Animalcunata cuidajcunapishmi huañurcacuna. Chai qꞌuipaca paicuna micucujpi, huasi urmajpimi Jobpaj tucui huahuacuna huañurca. Jobca yallitaj llaquillami sintirirca. Shinapish Jehovamantaca manataj caruyarcachu.

Diabloca Jobta ashtahuan llaquichisha nishpami, chaqui puntamantaca coronacama caracha laya ungüihuan chugrichirca. Jobca achcatami nanachij carca. Imamanta achca  llaquicunata charishcata mana yachashpapish Jobca Diosta adorashpami catirca. Chaimantami Diosca cushilla sintirirca.

Qꞌuipaca Satanasca quimsa runacunatami cacharca. Paicunaca, ‘ima juchata rurashpami pacacungui. Chaimi Diosca canta castigacun’ nircacuna. Jobca, ‘ima juchata mana rurashcanichu’ nishpami cutichirca. Pero qꞌuipaca Jehová Diosmi chai llaquicunataca churacunga nishpami yuyai callarirca. Chaimantami, ‘Diosca mana cashcata rurajchu can’ nirca.

Elihú shuti jovenmi imata mana nishpa Job chai quimsa runacunahuan parlanacucujta uyacurca. Qꞌuipaca paipish parlashpami, ‘cancunaca pandarishcami canguichij. Diosca ñucanchij yuyashcatapish yalli jatunmari. Paica mana allitaca nunca mana ruranchu. Ashtahuanpish gentecuna llaquicunahuan cajpica ayudanmi’ nircami.

Diospish Jobtaca, ‘¿ñuca cai pachatapish jahua pachatapish ruracujpica, canca maipitaj carcangui? ¿Canca imamantataj ñucataraj juchachisha ningui imamí? Chai llaquicunata imamanta charishcata mana intindishcamantami chashna ningui’ nirca. Jobca pandarishca cashcata cuentata cushpami Diostaca, ‘pandarishcanimi. Ñuca imalla nishcataca perdonahuai. Ñucaca parlashcallatami canmantaca uyarcani. Cunanmi cantaca alli rijsini. Canca tucuita rurai tucuj cashcatami yachani’ nirca.

Chai tucui llaquicunata charishca qꞌuipaca, Diosca Jobtaca paipaj ungüitapish alliyachishpami, ñaupa charishcacunatapish yalli curca. Jobca achca huatacunatami cushilla causarca. Sinchi ricurijpipish paita cazushcamantami Diosca Jobta bendiciarca. ¿Canpish Job layachu ima llaquicunata charishpapish Diosta adorashpa catisha ningui?