Jobqa karqa Uz llaqtapi Jehova Diosta yupaychaqmi. Paymi tukuy imayuq hinaspa achka churiyuq karqa. Allin runa kaspanmi wakchakunata, viudakunata chaynataq mana tayta-mamayuqkunatapas yanaparqa. Chayna allin runa kaspanpas sasachakuypim tarikurqa.

Huk kutipim Jobmanta rimaspan satanasta Jehova Dios tapurqa: “¿Qawarqankichu yupaychaqniy Jobta? Payqa kasukuqmi, manam pay hinaqa pipas kanchu”, nispa. Jobtaqa satanasmi qawarqaña ñakarichinanpaq, chaymi nirqa: “Payqa chakrakunata, animalkunata hinaspa tukuy kapuqninkunata quykuptillaykim yupaychachkasunki. Sichum lliwta qichuruptikiqa manañam yupaychasunkiñachu”, nispa. Hinaptinmi Jehova Dios nirqa: “Saqikim munasqaykita Jobpa kapuqninkunawan ruwanaykipaq, Jobtam ichaqa ama wañuchinkichu”, nispa. Jehova Diosqa manam iskayrayarqachu imaña kaptinpas Job kasukunanmantaqa.

Satanasqa Saba lawmanta runakunawanmi Jobpa asnonkunata, vacankunata hinaspa toronkunata suwarachirqa. Ovejankunatapas ninam ruparurqa. Caldea runakunapas camellonkunatam suwarurqaku, michiqkunapas wañururqakum. Chaymantapas lliw churinkunam mikuchkaspanku wasi tuñiykuptin wañururqaku. Chayna llumpay llakipi kachkaspanpas Jobqa manapunim saqirqachu Jehova Dios yupaychaytaqa.

Satanasqa aswanraqmi Jobtaqa millakuypaq sarnawan tukurachirqa, chay unquyqa llumpaytam nanarqa. Jobqa manam yacharqachu imanasqa ñakarisqanmantaqa,  chaywanpas hinallam Diostaqa yupaycharqa. Chayta qawaspanmi Jehova Dios anchata kusikurqa.

aymantapas satanasqa Jobta astawan llakichinanpaqmi kimsa runakunawan nichirqa: “Huchallikusqaykiraykum Dios castigachkasunki”, nispa. Jobñataqmi nirqa: “Manam huchallikurqanichu”, nispa. Manapas unaymantam ichaqa piensarqa Dios ñakarichisqanta.

Chay kimsa runakunapa rimasqankuta upallalla uyariruspanmi Eliu nirqa: “Qamkunaqa pantachkankichikmi. Jehova Diosqa tukuy atiyniyuqmi hinaspapas kuyakuqllañam, payqa manam pitapas ñakarichinchu. Tukuy imatam rikun, hinaspapas sasachakuyniyuqkunatam yanapan”, nispa.

Jehova Diospas Jobtam nirqa: “¿Maypitaq karqanki hanaq pachatawan kay pachata ruwaptiy? ¿Imanasqam mana allin ruwaqpaqña hapiwanki? Mana yachaspam rimachkanki”, nispa. Hinaptinmi Jobqa pantarusqanta riqsikuspan nirqa: “Pampachaykuway, pantarullanim. Qanmantaqa uyarirqanim, kunanmi ichaqa astawan riqsiki, hinaspapas yachaniñam tukuy imapas atinallayki kasqanta”, nispa.

Jobta satanas manaña ñakarichiptinmi Diosqa sanoyarachirqa, hinaspam sasachakuykunapi hinalla kasukusqanrayku tukuy imata quykuspan astawanraq bendeciykurqa. Chaynapim Jobqa kusisqa una-unaytaraq kawsakurqa. Qampas, ¿Job hinachu sasachakuypipas Jehova Diosllata kasukunki?