Uz llaqtapin Diosta adoraq runa tiyaran, sutinmi karan Job. Payqa askha familiayoq qhapaq runan karan. Jinaspapas sumaq runan karan, wajchakunata, viudakunata, mana tayta-mamayoq wawakunata iman yanaparan. Ichaqa, ¿chayraykuchu mana sufriran?

Jobqa manan yacharanchu Satanás payta qhawamushasqanta. Jehová Diosmi Satanasta niran: “¿Rikushankichu kamachiy Jobta? Manan pipas pay jinaqa kanchu. Payqa kasukuwanmi, allintan portakunpas”, nispa. Satanastaq niran: “Yanapasqaykiraykullan kasukusunki, allpanpas animalninkunapas askhan. Llapanta qechuruwaq chayqa manañan adorasunkimanchu”, nispa. Jehová Diostaq niran: “Pruebay imawanpas, ichaqa ama wañuchinkichu”, nispa. ¿Imaraykun Jehová Dios dejallaran Job probasqa kananta? Payqa yacharanmi Jobqa probasqaña kaspapas kasukushanallanta.

Satanasqa Jobtan imaymana pruebaman churaran. Ñaupaqtaqa Sabá runakunan uywankunata asnonkunatawan suwaranku. Ovejankunatataq ninawan ruphachiran. Caldeo runakunataq camellonkunata suwaranku. Uywankunata michiq runakunapas wañuchisqan karanku. Jinaspapas Jobpa wawankunan wañupuranku wasiq ñit’isqan. Chaykunawanmi Jobqa sinchita llakikuran, chaywanpas servishallaranmi Diosta.

Satanasqa astawanmi Jobta llakichiyta munaran, chaymi llapa cuerponta sarna jina onqoywan jap’ichiran. Chaywanqa nishutan ñak’ariran,  manan yacharanchu imarayku chaykuna payta pasashasqanta, chaywanpas adorashallaranmi Jehová Diosta. Chayta rikuspan Diosqa anchata kusikuran.

Chay qhepamanmi Satanasqa kinsa runakunata kacharan Jobta pruebaman churanankupaq. Paykunan Jobta niranku: “Juchallikurankichá, jinaspa juchaykita pakayta munashanki. Chaymi Diosqa castigashasunki”, nispa. Jobtaq niran: “Manan ima mana allintapas ruwanichu”, nispa. Chay qhepamanmi Jobqa niran: “Diosmi kay llakiman churawan, mana chanintan kaytaqa ruwawan”, nispa.

Elihú waynataq ch’inlla uyarisharan rimasqankuta. Chaymantan ichaqa niran: “Llapaykichismi mana allintachu rimashankichis. Jehová Diosqa ancha sumaq Diosmi, payqa manan jayk’aqpas mana allintaqa ruwanmanchu. Tukuytan payqa rikumushan, yanapantaqmi llakikuypi tarikuq runakunatapas”, nispa.

Chay qhepamanmi Jehová Diospas Jobta niran: “¿Maypin kasharanki allpatapas cielotapas ruwashaqtiy? ¿Imaraykun ninki: ‘Diosmi mana allinta ruwawashan’, nispa? Mana allinta yachaspan rimashanki”, nispa. Jobqa reqsikuranmi pantasqanta, jinaspa niran: “Pantasqatan rimarani, perdonaykuway rimasqaymanta. Uyariranin qanmanta, kunanmi ichaqa allinta reqsiyki, qanpaqqa manan imapas mana atikuqqa kanchu”, nispa.

Chay qhepamanmi Diosqa Jobta qhaliyachiran, ñaupaqpi qhapaq kasqanmantapas aswantaraqmi qhapaqyachiran. Askha watakunataqmi kusisqa kausaran. Jehová Diosmi bendiciran kasukuq kasqanmanta. ¿Qanri? ¿Job jinachu Diosta adorashallanki ima llakipiña tarikuspapas?