Uz shuti llactapimi Jehová Diosta adoraj Job runaguca causarca. Paica charij, ali alimi carca. Tauca huahuacunatapashmi charirca. Pobre gentecunata, viuda huarmigucunata, taita illaj huahuacunatapashmi ayudan carca. Shina ali ali cashpapash ¿nacha imapash llaquicunata charirca?

Job na yachajtami Diabloca paita ricujurca. Jehová Diosca Diablotaca nircami: ‘Ñucata sirvij Jobtaca ima pandatapash na ruraj, Taita Diostapash manllaj, nalita ruranamanda anchurishca cajtaca ¿nachu ali ricurcangui?’ nishpa. Chaimi Diabloca cashna nirca, ‘Jobca ¿yangamandachu Diosta manllan? ¿Nachu canllata paitapash, tucui imatalla pai charishcatapash, tucuilla muyundita cuidajungui?’. “Pai imatalla charishcacunata quichuyari”. Shina rurajpica candaca ñana adorangachu nishpa. Jehová Diosca nircami: ‘Ricui, pai imatalla charishcacunaca canba maquipimi. Shinapash paitaca ama’ huañuchinguichu nishpa. Shinami Diablo, Jobta llaquichichun Jehová Diosca saquirca. ¿Imamanda shina llaquichichun saquishcata yachanguichu? Job tucuipi cazunata ali yachaimandami Jehová Diosca shina llaquichichun saquirca.

Diabloca shuj shuj llaquicunahuanmi Jobtaca ninanda llaquichirca. Pundapica, Diabloca sabeo nishca runacunata utilizashpami Jobpa huagracunata, burrocunatapash shuhuarca. Jipaca nina japirishpami tucuilla llamacunata tucuchirca. Chai jipaca caldeo nishca runacunami camellocunata shuhuarca. Shinallata animalcunata cuidashpa sirvijcunapashmi huañurca. Chai jipaca ashtahuan llaquimi ricurirca. Huasi urmashpami Jobpa churicunata, ushicunatapash huañuchirca. Shina pasashcamanda llaquilla cashpapash Jobca Jehová Diosta adoranataca nimamanda na saquircachu.

Diabloca Jobtaca ashtahuanmi llaquichingapaj munarca. Chaimi Jobtaca “chaqui pundamanda, uma coronacaman jatun nali carachahuan chugrichirca”. Chai ungüihuanga Jobca ninandami sufrirca. Chai tucui llaquicunata imamanda  charishcata na yachashpapash, Jehovata adoranataca na saquircachu. Job shina rurashcamandaca Jehová Diosca ninandami cushijurca.

Jipamanga Diabloca quimsa runacunatami Jobta llaquichichun cacharca. Paicunaca nircami, imapash juchata pacalla rurashcamandami, candaca Taita Dios cashtigajun nishpa. Chaimi Jobca nirca, ñucaca ima nalitapash na rurashcanichu nishpa. Shinapash Jobca Jehová Diosmi llaquicunamandaca culpata charin, paica ñucahuanga na alichu cashca nishpami pensai callarirca.

Elihú jovenmi paicuna parlajujta upalla uyajushcarca. Jipamanga paica cashnami nirca, cangunaca pandatami ninajunguichi, Jehová Diosca ali alimi can. Jehová shinaca pipash na tianllu, ima horapash nalitaca na ruranllu. Jehová Diosca tucuitami ricujun, gentecuna llaquicunata charijpica paica ayudanmi nishpa.

Jehová Diosca Jobhuan parlashpaca nircami: “Cai pachata ñuca rurajujpica, canga ¿maipita carcangui?”. ¿Imamandata canga ñuca nali cashcata yuyangui? Imamanda llaquicuna japijta na ali yachashpatami shina nijungui nishpa. Shina nijpimi Jobca nirca, pandarishcanimi ima nali nishcatapash perdonahuai. “Ñucaca, parlajtallami canmandaca uyan carcani. Ashtahuangarin cunanga candaca, ñuca ñavihuambachami ricujuni”, canga tucuitami rurai ushangui nishpa.

Llaquicuna tucurishca jipaca Jehová Diosca Jobta jambishpami, punda imacunatalla charishcatapash yalita cararca. Shinami Jobca unaita cushilla causarca. Na fácil cajpipash Job tucuipi cazushcamandami Jehová Diosca paitaca bendiciarca. Quiquinga ¿ima pasajpipash Job shina Jehovata sirvishpa catinguicha?