Ki phuv Uz, živindža jekh manuš kova služindža e Jehovase. Oljeso nav hine Jov. Ov hine but barvalo hem hine lje bari porodica. Hine but šukar manuš, pomožindža e čorore manušendže, e romnjendže so mulje oljenge roma hem e čhavendže kola hine bizo roditeljija. O Jov čerdža šukar buča. Ama, da li odoljese na hine lje nisave problemija ko dživdipe?

O Jov na džandža so o Satana dikhela lje. O Jehova phendža e Satanase: „Dikhljan li me sluga e Jove? Nane nijekh sar oljeste ki phuv. Ov šunela man hem čerela šukar buča.“ O Satana phendža ljese: „Normalno so ka šunel tut. Tu zaštitineja lje hem nagradineja lje. Dindžan lje phuv hem životinje. Lje oljestar sa, pa ka dikhe da li ka služini tuče.“ O Jehova phendža: „Šaj te iskušine lje. Ama, na ismineja te mudare lje.“ Sose o Jehova mukhlja o Satana te iskušini e Jove? Odoljese so hine sigurno so o Jov ka ačhol ljese verno.

O Satana čerdža e Jovese nekobor phare nevolje. Prvo, bičhaldža e manušen kola vičindže pe Savejcija te čoren e Jovese guruven hem e heren. Palo odova, pojavindža pe jag ando nebo hem thabilje sa e Jovese bakre. A avera manuša, kola vičindže pe Haldejcija, čordže oljese kamilen. O sluge so arakhlje akalje životinjen hine mudarde. Palo odova, alji i najbari nevolja. Sa e Jovese čhave mulje ked upro ljende pelo o čher kuri čedisalje. E Jovese hine but pharo, ama na čhinavdža te služini e Jehovase.

 O Satana manglja o Jov te patini pobuter, odoljese čerdža te oven lje čirija ko celo telo. O Jov hine lje but bare dukha hem na džandža sose ovena ljese sa akala lošna buča. Ama, hem ponodri služindža e Jehovase. O Jehova dikhlja sa so ulo e Jovese hem hine but radosno so ačhilo ljese verno.

Palo disavo vreme, o Satana bičhaldža trinen manušen te iskušinen e Jove. On phendže ljese: „Sigurno čerdžan disavo greh, ama garaveja. Odoljese, o Devel kaznindža tut.“ O Jov phendža: „Na čerdžum ništa lošno.“ Ama, tegani počmindža te mislini soj tane o nevolje ando Jehova hem phendža so o Jehova nane pravedno premalo oljeste.

Jekh terno manuš kova vičindža pe Elijuj šundža so vačerena. Ko krajo, ov phendža: „Odova so vačerena nane tačno. O Jehova tano but pobaro ando odova so amen mislinaja. Ov niked na čerela diso lošno. Dikhela sa hem pomožini e manušendže ked isi ljen problemija.“

Tegani o Jehova počmindža te vačeri e Joveja hem phendža ljese: „Kaj hijan lje ked čerdžum o nebo hem i phuv? Sose vačereja so na hijum pravedno? But vačerdžan, ama na džaneja sose ovela sa akava.“ O Jov priznajindža so pogrešindža hem phendža e Jehovase: „Grešindžum. Me samo šundžum tutar, ama akana čače pendžarava tut. Tu šaj sa te čere. Kajinava man aso sa so vačerdžum.“

Ked sa odova završindža pe, o Jehova sačardža e Jove hem dindža lje pobuter nego so hine lje angljeder. O Jov živindža pana but berša hem hine bahtalo. O Jehova nagradindža e Jove so hine ljese poslušno, čak ked odova na hine lokho. Da li hem tu ka ove poslušno sar o Jov? Ka ačhove li verno e Jehovase bilo so te ovel?