Андэ ԥув Уц жувэлас о мануш, саво любияс лэ Иеговас. Лэс ақарэнас Иово. Во сас фартэ барвало, и лэстэ сас баро ери. Во сас лашо мануш, поможыяс лэ чорорэнди, ԥивлянди и лэ бэятонэнди, кастэ на сас дад и дэй. О Иово терэлас вся драго. Важ када лэстэ со, на сас ԥаримос?

О Сатана диқэлас пала Иово, сар во пэс андярэлас. Но о Иово пала када на ӷанэнас. О Иегова ԥэндя лэ Сатанасти: «Дик пэ мэрно мануш по Иово? Пэ ԥув нинай кацавэс, сар во. Во кандэл ман и вся время терэл кода, со драго андэ мэрнэ яқа». О Сатана ԥэндя: «Во тут кандэл кати важ кода, кай ту лэс фэрис и дэс лэсти лашимос. Ту дян лэсти бут ԥув и ското. Залэ лэстар вся када и во парашэла тут тэ любий». О Иегова ԥэндя: «Камэс дик, сави кай о Иово вера. Кати на умар лэс». Васо о Иегова домэкля, кай о Сатана тэ диқэл, сави кай о Иово вера? О Иегова ӷанэнас, кай о Иово на парашэла тэ любий лэс.

О Сатана стердя, кай лэ Иовостэ тэ терэнпэ биды. Спэрва во стердя, кай тэ авэн и мануша, и савеяноря, тэ чорэн кай о Иово лэ ишаконэн и аврэ скотос. Тоди и яг сԥабардя всаворэ бакрэн кай о Иово. После када и халдеёря чордэ лэ верблюдонэн, ай лэ манушэн, савэ диқэнас пала верблюдоря, умардэ. Тоди стердяпэ само бари бида. Кала всаворэ лэ Иовостирэ бэятцэ стидэпэ андо цэр, кай тэ побэшэн, тэ хан и тэ пэн, кадэва цэр пэля пэр лэндэ и вонэ всаворэ мулинэ. Лэ Иовости сас фартэ ԥарэс, но во на парашэля тэ любий лэ Иеговас.

О Сатана камэлас, кай лэ Иовости тэ авэл инке май ԥарэс. Во стердя, кай  вся лэ Иовости тила ля тэ тернёл. Лэ Иовости сас фартэ дуқанэс. Во на ӷанэнас, васо стердэпэ лэстэ кадэла биды. О Иегова ценияс, кай даже андэ кацави ԥари время, о Иово всаек на парашэлас тэ любий и тэ кандэл лэс.

Тоди о Сатана подбишалдя каринг о Иово тринэ манушэн. Вонэ ԥэндэ лэсти: «Ту стердян варисо найлашо и камлян тэ гаравэс када. Важ када тут и марэл о Дэл!» О Иово ԥэндя: «Мэ на стердэм нисаво найлашимос!» После када о Иово ля тэ гиндой, кай када вся терэл о Иегова. Инке во даже ԥэндя, кай о Дэл терэл лэсти кода, со во на затердя.

Кода, со вонэ динэ дума, драго ашунэлас о тэрно мануш, савэс ақарэн Елиуй. Во ԥэндя: «Кода, со тумэ всаворэ ԥэндэ, най кадя. Амэ даже нащи полас, саво о Иегова. Во никасти на терэл найлашимос. Во вся диқэл и дэл зор, кала кай и мануша бида».

Тоди о Иегова ля тэ дэл дума лэ Иовоса. Во ԥэндя: «Кай ту санас, кала мэ теравас о нэбо и ԥув? Васо же ту ԥэнэс, кай мэ терав бида аврэнди, сар вонэ када на затердэ? Ту дэс дума, ай нисо на ӷанэс». О Иово поля, кай во гиндояс най кадя и ԥэндя: «Мэ дошало. Варикала мэ кати ашунавас пала тутэ, акана мэ ӷанав тут. Ту вся стерэса. Простисар ман важ мэрнэ алава».

После кода, сар вся стердяпэ лэ Иовоса, о Иегова упалэ дя лэсти зор и дя инке май бут кодэлэстар, со лэстэ сас. О Иово прожудя бут бэрша и сас бахтало. О Иегова дя бут лашимос лэ Иовости важ кода, кай во кандэлас лэс, даже кала лэсти сас фартэ ԥарэс. Камэс ту тэ авэс кацаво, сар о Иово? Кандэса ту лэ Иеговас вся время, даже кала тути авэла ԥарэс?