Uutsi yinanni gobbara mittu Yihowa magansiˈranno manchi no. Suˈmisi Iyyoobiiti. Isi dureessa manchooti, qoleno haammata ooso noosi. Isi shaqqadoho; qoleno buxane, galte shiiˈrino meentonna annunna ama noonsakki qaaqquulle kaaˈlannoho. Kayinni Iyyoobi dancha coye assanno daafira mittu qarrino diˈˈiillinosi yaateni?

Sheexaanu Iyyoobi busha illenni laino; Iyyoobi kayinni tenne diafino. Yihowa Sheexaane togo yii: ‘Soqqamaanchoˈya Iyyoobi laittoni? Uullate aana isi gedee manchi dino. Isi anera hajajamannoho, hattono dancha coye assannoho.’ Hakkiinni Sheexaanu togo yii: ‘Iyyoobi atera hajajamannoheta afoommo. Ati iso towaatattosi, hattono maassiˈroottosi. Isira lowo baattonna saada oottosi. Hanni afiˈrinore baala haadhe hooli laˈˈattona; isi ate magansiˈra aguranno.’ Hakkiinni Yihowa togo yii: ‘Iyyoobi fonqola dandaatto. Iso shaa calla shitooti.’ Yihowa Sheexaanu Iyyoobi fonqolara fajjinohu mayiraati? Iyyoobi Isira ammanamannota afino daafiraati.

Hakkiinni Sheexaanu Iyyoobira lowo qarri iillanno gede assi. Umo, Saabaawoota yinanni manni Iyyoobi lalonna harre moortanno gede assi. Hakkiinni Iyyoobi geˈreewo baala giira itte guddu. Keledoota yinanniti wole daga qolte gaalasi moortu. Tini mooraano Iyyoobi saada allaalte noo soqqamaano baala shite guddino. Hakkiinni waajjishshanno hombobalatte kaˈu. Hatte yannara Iyyoobi ooso baala jila ittanni no; hombobalatte kaˈuta jila ittanni noo mini aanansa uweenna reyite gooffu. Konni daafira Iyyoobi lowo geeshsha dadillino; kayinni isi Yihowa magansiˈra diagurino.

 Sheexaanu xaano Iyyoobi gawajja hasiˈrino; konni daafira bisisi baalu madiˈranno gede assi. Iyyoobi lowo geeshsha xiwamino. Isi kuni qarri baalu iillinosihu mayiraatiro diafino. Ikkirono isi Yihowa magansiˈra diagurino. Maganu, Iyyoobi hajajaminosi daafira lowo geeshsha hagiidhino.

Hakkiinni Sheexaanu Iyyoobi fonqolara sase manna soyino. Insa togo yitinosi: ‘Cubbo loosse maaxootto. Konni daafira Maganu qorochishanni noohe.’ Iyyoobi ‘Ani cubbo diloosoommo’ yii. Gedensaanni kayinni Iyyoobi qarra abbinoehu Maganoho yee hedi; hattono Isi baddalinoe yii.

Insa giddo maaˈniidihu Eelihu yinannihu insa hasaabbanna sammi yee macciishshino. Gedensaanni isi togo yee coyiˈri: ‘Kiˈne baalunku coyidhinoonniri digaraho. Yihowa baalunkura rooriidiho. Isi bushare horo diassanno. Isi baalankare laˈˈanno; qoleno mannu qarramanno yannara kaaˈlanno.’

Hakkiinni Yihowa Iyyoobi coyishiishi. Togo yiisi: ‘Ani iimanna uulla kalaqummo waro ati mama nootto? Ane baddaloottoe yiittoehu mayiraati? Afoottokki coye coyiˈrootto.’ Iyyoobi soˈrosi ammane togo yii: ‘Soˈroommo. Alba ate daafira macciishshoommo; xa kayinni ate seekke afoommo. Ati dandaattokkiri dino. Gara ikkinokkire coyiˈroommo daafira maarie ballo.’

Sheexaanu Iyyoobi fonqole kaita, Yihowa iso hursisi, hattono alba noosirinni roorinore uyinosi. Iyyoobi hagiidhanni lowo diro heeˈrino. Yihowa, Iyyoobi lowo geeshsha qarrame heeˈrenni Isira hajajamino daafira maassiˈrinosi. Ati Iyyoobi gede qarru iilliherono Yihowa magansiˈratto?