Na ini a kondre Us, wan man ben e libi di ben e anbegi Yehovah. En nen na Yob. A ben abi furu gudu èn a ben abi wan bigi osofamiri. A ben abi switifasi. A ben e yepi den pôtisma, den uma di masra dede èn den pikin di no ben abi papa nanga mama. Ma yu denki taki fu di a ben e du bun sani, meki noiti a ben o kisi problema?

Sondro taki Yob ben sabi, Satan ben e luku en. Yehovah taigi Satan: ’Yu si a futuboi fu mi Yob? Nowan sma na grontapu de leki en. A e arki mi èn a e du san bun.’ Satan piki Yehovah: ’A no fu soso Yob e arki yu. Yu e kibri en èn yu e blesi en. Yu gi en furu gron nanga meti. Efu yu teki ala den sani disi baka, dan yu o si taki a no o dini yu moro.’ Yehovah piki Satan: ’Yu kan du san yu wani nanga Yob. Ma yu no musu kiri en.’ Fu san ede Yehovah libi Satan fu tesi Yob? A ben de seiker taki Yob ben o tan dini en.

Satan bigin tesi Yob. A meki furu rampu miti en. A fosiwan, na taki a meki wan tu sma di den e kari Sabeisma, kon fufuru den meti nanga den buriki fu Yob. Baka dati a meki faya bron ala den skapu fu Yob. Ne wan tra grupu sma, den Kaldeyasma, fufuru den kameili fu Yob èn den kiri den wrokoman di ben e luku den meti disi. Baka dati a moro takru rampu miti Yob. Den pikin fu en ben e hori fesa na ini wan oso, ne na oso broko fadon kiri den alamala. Yob ben sari srefisrefi, ma a no tapu fu dini Yehovah.

Satan ben wani pina Yob moro srefi. A meki Yob kisi soro na en heri skin èn den ben e hati en.  Yob no ben sabi fu san ede den sani disi ben e miti en. Toku a tan dini Yehovah. Gado ben e si ala den sani disi èn a ben breiti nanga Yob.

Baka dati Satan seni dri man fu go tesi Yob. Den taigi en: ’A musu de taki yu sondu, dan yu e kibri en. Na Gado e strafu yu.’ Yob piki den: ’Mi no du nowan ogri.’ Ma Yob bigin denki taki na Yehovah ben meki den problema disi miti en èn a ben feni taki Gado no ben libi bun nanga en.

Wan yonguman di nen Elihu, ben e arki den man disi. Baka dati a taki: ’Nowan fu unu abi leti. Nowan sma kan sabi o bigi Yehovah de. Noiti a e du wan sani di no bun. A e si ala sani èn a e yepi sma te den abi problema.’

Baka dati Yehovah taki nanga Yob. A aksi en: ’Pe yu ben de di mi ben e meki hemel nanga grontapu? Fu san ede yu e taki dati mi no e du san reti? Yu e taki sani sondro fu sabi.’ Yob kon si taki a ben taki sani sondro fu denki. Dati meki a taki: ’Mi no abi leti. Mi ben yere fu yu, ma now mi kon sabi yu. Nowan sani de di yu no man du. Gi mi pardon fu den sani di mi taki.’

Baka di Yob miti ala den sani disi, Yehovah meki a kon betre baka èn a gi en moro gudu leki san a ben abi. Yob libi langa tu èn a ben de koloku. Yehovah blesi Yob fu di a ben arki en, srefi di bigi problema ben miti en. Yu o tan dini Yehovah awinsi san e pasa, neleki fa Yob ben du dati?