Su wanua Uz, piạ sěngkatau esẹ měnẹ̌němbah si Yehuwa. Arenge i Ayub. I sie sěbạe makalạ dingangu piạ lawọ anạ. I sie mapia dingangu puluang mẹ̌tul᷊ung taumata masusah, wawine wal᷊u, dingangu anạ kasisi. Katewe, ual᷊ingu i sie mapia, apa i sie tawẹ apa masalane?

Setang měmẹ̌manda si Ayub, katewe Ayub běga. Yehuwa naul᷊ị su Setang, ’Apa i kau nakasilo si Ayub, ělang-Ku? Su dunia, tawẹ apa taumata kere i sie. I sie dụdaringihẹ̌ si Siạ dingangu měkẹ̌koạ barang nihino.’ Setang simimbahẹ̌, ’Tantu i sie matuhụ si Kau. I Kau měnděndiagạ dingangu něgělị al᷊amatẹ̌ si sie. Kěnang al᷊ạ kěbị ene, i sie sarung měngědo maněmbah si Kau.’ Yehuwa naul᷊ị, ’I kau botonge měnesẹ̌ si Ayub. Katewe, i kau tawe wotonge měmate si sie.’ Kawe Yehuwa němala Setang měnesẹ̌ si Ayub? Ual᷊ingu Yehuwa mangimang i Ayub sarung tatapẹ̌ masatia.

Setang něpakẹ piram baụ hombang gunang měnesẹ̌ si Ayub. Humotong, kěbị keledai dingangu saping i Ayub nitakong tau Syeba. Bọu ene, kěbị dombang i Ayub nitutung. Manga untane lai nitakong tau Khaldea. Taumata měnděndiagạ manga binatang ene nipate. Bọu ene, hombang sěbạe dal᷊akị nariadi. Kěbị anạ i Ayub nate ual᷊ingu bal᷊e tampạ i sire někoạ pesta nahaka. Ayub sěbạe nasusah naung, katewe i sie tatapẹ̌ masatia si Yehuwa.

Setang mapulu i Ayub sauneng masigěsạ. Hakị u ene i sie někoạ badang i Ayub napenẹu bisul᷊ẹ̌.  Ayub sěbạe natědụ-tědụ. I sie běga kawe kěbị ene nariadi. Katewe i Ayub tatapẹ̌ masatia si Yehuwa. Ual᷊ingu ene Mawu sěbạe mal᷊uasẹ̌ si Ayub.

Bọu ene, Setang něngoro tatělu esẹ gunang pěnesẹ̌ si Ayub. I sire nẹ̌bera, ’I kau tantu seng někoạ dosa kụ i kau němuni dosa ene. Mawu něhukung si kau.’ I Ayub naul᷊ị, ’Iạ tawe někoạ barang nẹ̌sal᷊a.’ Katewe kakạděngụe Ayub něnětạ nẹ̌pikirẹ̌ kěbị barang dal᷊akị nariadi si sie ene ual᷊ingu Yehuwa, kụ i sie naul᷊ị Mawu tawe adilẹ̌ si sie.

Sěngkatau anạ mangudạ arenge i Elihu dụdaringihẹ̌ bisarang i sire. Bọu ene i sie nẹ̌bera, ’I kamene kěbị nẹ̌sal᷊a. Yehuwa limembong makawasa bọu apa seng nikasingkạ i kitẹ. I Sie tawe měkẹ̌koạ barang dal᷊akị. I Sie nakasilo kěbị dingangu sěntiniạ mẹ̌tul᷊ung taumata apang nasigěsạ.

Bọu ene Yehuwa nẹ̌bera si Ayub, ’Su apa i kau su tempong Iạ někoạ langị dingangu dunia? Kawe i kau naul᷊ị Iạ tawe adilẹ̌? I kau kětạeng mẹ̌bisara, sěmbal᷊ia piạ lawọ hal᷊ẹ̌ i kau wěga.’ Ayub něngaku i sie nẹ̌sal᷊a kụ naul᷊ị, ’Iạ nẹ̌sal᷊a, kangerẹ iạ seng nakaringihẹ̌ soal i Kau, katewe orasẹ̌ ini iạ kahěngang-hěngang nakasingkạ i sai i Kau. I Kau botonge měkoạ lawọ hal᷊ẹ̌. Iạ mẹ̌dorong ampung.’

Su tempong ujian seng nasue, Yehuwa napakapia si Ayub kụ něgělị si sie limembong lawọ arětạ sul᷊ungu kal᷊imona. Ayub lai něbiahẹ̌ marěngụ dingangu mal᷊uasẹ̌. Yehuwa něgělị al᷊amatẹ̌ ual᷊ingu i Ayub matuhụ si Sie maning tawe gampang. Apa i kau mapulu kere i Ayub dingangu tatapẹ̌ masatia si Yehuwa, tawẹ soale apa mariadi?