Mucharu cha Uzu, mwajanga munthu munyaki yo wasopanga Yehova. Zina laki lenga Yobu. Iyu wenga ndi chuma kweniso banja likulu. Yobu wenga walisungu ndipu wawovyanga ŵanthu akavu, anthukazi wo arumu ŵawu angutayika kweniso ŵana alanda. Kumbi iyu watingi wakumanengi ndi masuzgu cha chifukwa chakuti wachitanga vinthu vamampha?

Yobu waziŵanga cha kuti Satana Dyaboli wawonanga vo wachitanga. Yehova wangukambiya Satana kuti: ‘Kumbi wamuwona muteŵeti wangu Yobu? Palivi pacharu chapasi wakuyanana nayu. Iyu watindivwiya ndipuso wachita vinthu vamampha.’ Satana wangumuka kuti: ‘Mbuneneska kuti Yobu watikuvwiyani. Mutimuvikiliya kweniso mutimutumbika. Mukumupasa malu kweniso viŵetu. Mulondeni vosi ndipu walekengi kukusopani.’ Yehova wanguti: ‘Ungamuyesa Yobu. Kweni ungamubayanga cha.’ Ntchifukwa wuli Yehova wanguzomereza kuti Satana wayesi Yobu? Iyu waziŵanga kuti Yobu walutirizengi kuja wakugomezeka.

Satana wangwamba kwesa Yobu ndi ngozi zakupambanapambana. Chakwamba, wangugwirisiya ntchitu ŵanthu wo adanikanga kuti Asabiya kuti akabi abulu ndi ng’ombi zaki. Pavuli paki, motu ungubaya mbereri zosi zaku Yobu. Gulu linyaki lenga la Akaldiya, ilu linguba ngamila. Ateŵeti aku Yobu wo aliskanga viŵetu venivi angubayika. Pavuli paki, Yobu wanguvwa nkhani yakuchitisa chitima ukongwa. Ŵana ŵaki wosi angufwa chifukwa nyumba yo achitiyangamu phwandu yinguŵawiya. Venivi vingumuŵaŵa ukongwa Yobu kweni wanguleka cha kusopa Yehova.

Satana wakhumbanga kuti Yobu wasuzgiki kujumpha penapa. Iyu wanguchitisa kuti liŵavu laki losi liŵi ndi vilonda ndipu wavwanga kuŵaŵa ukongwa. Yobu waziŵanga cha chifukwa cho ivi vamuchitikiyanga.  Chinanga kuti venga viyo, iyu wangulutiriza kusopa Yehova. Chiuta wawonanga vosi ivi ndipu wangukondwa chifukwa chakuti Yobu wangugomezeka.

Pavuli paki, Satana wangutumiza anthurumi atatu kuti akayesi Yobu. Yiwu angumukambiya kuti: ‘Utenere kuti wachita ubudi ndipu ubisa. Chiuta watikulanga.’ Yobu wangukamba kuti: ‘Palivi chiheni chechosi cho ndachita.’ Pavuli paki, Yobu wangwamba kuŵanaŵana kuti Yehova ndiyu wachitisanga masuzgu ngenanga ndipu wangukamba kuti watimuchitiya vinthu umampha cha.

Elihu wenga munamana paku wosi, iyu wavwisiyanga vo akambisananga. Pavuli paki, wanguti: ‘Vo mosi mwakamba, vaboza. Yehova we ndi nthazi ukongwa kuluska mo isi tingaŵanaŵaniya. Iyu wangachita cha chinthu chiheni. Wawona vosi ndipu watovya ŵanthu asani akumana ndi masuzgu.’

Pavuli paki Yehova wangukamba ndi Yobu. Iyu wanguti: ‘Kumbi wengaku po ndapanganga kuchanya ndi charu chapasi? Ntchifukwa wuli ukamba kuti ndichita umampha cha vinthu? Chinanga kuti ulongoro, kweni uziŵa cha chifukwa cho vinthu vichitikiya.’ Yobu wanguzomereza kunanga kwaki ndipu wangukamba kuti: ‘Ndingunanga. Ndinguvwa zaku yimwi, kweni sonu ndipu ndakuziŵani ukongwa. Palivi cho mungatondeka kuchita. Mundigowoke chifukwa cha vo ndingukamba.’

Mayeseru ngo Yobu wangukumana nangu ngati ngamala, Yehova wangumuchiza ndipu wangumupasa vinthu vinandi kuluska vo wenga navu pakwamba. Yobu wanguja ndi umoyu utali kweniso walikondwa. Yehova wangumutumbika chifukwa chakuvwiya chinanga kuti kwenga kwakusuzga kuchita viyo. Kumbi ujengi nge Yobu ndipu ulutirizengi kusopa Yehova chinanga ungakumana ndi masuzgu?