Mucisi ca Uzi, kwakali mwaalumi iwakali kukomba Jehova. Izina lyakwe ngu Jobu. Wakalivwubide kapati alimwi wakajisi mukwasyi mupati. Wakali mubotu moyo alimwi wakali kugwasya bantu bapengede, mbuli bamakaintu bakafwidwa bamalumi babo alimwi abana ibakafwidwa bazyali babo. Sena Jobu tanaakali kupenga akaambo buyo kakuti wakali kucita zintu zibotu?

Saatani wakali kumulangilila Jobu, pesi walo Jobu taakwe ncaakazyi. Jehova wakabuzya Saatani kuti: ‘Sena wamubona mubelesi wangu Jobu? Taakwe muntu uuli mbuli nguwe anyika. Ulandimvwida alimwi ucita zintu zili kabotu.’ Saatani wakaingula kuti: ‘Masimpe kuti Jobu ulakumvwida, kayi ulamukwabilila akumulongezya. Wakamupa nyika alimwi abanyama. Komunyanga zyoonse, ulabona ulacileka kukukomba.’ Jehova wakaambila Saatani kuti: ‘Ikuti naa ulayanda, komusunka. Pesi utamujayi.’ Ino nkaambo nzi Jehova ncaakalekela Saatani kuti asunke Jobu? Wakalizyi kuti Jobu ulazumanana kusyomeka.

Saatani wakatalika kusunka Jobu kwiinda mukubelesya mapenzi aaindene-indene. Cakusaanguna, wakabelesya bantu ibaitwa kuti bana Seba kuti babbe ŋombe alimwi ambongolo zya Jobu. Mpoonya mulilo wakaumpa mbelele zya Jobu zyoonse. Kumane kwakaboola nkamu yaba Kasidi, balo ibakabba nkamela zyakwe. Babelesi ba Jobu ibakali kweembela banyama aabo bakajaigwa. Kumane kwakaboola penzi liinda kukomena. Bana ba Jobu boonse bakafwa ciindi noyakabawida ŋanda oomo mobakabede nobakali kusekelela pobwe. Jobu wakapenga kapati mumoyo, pele tanaakaleka kukomba Jehova.

Saatani wakali kuyanda kuti Jobu aindile kupenga, aboobo wakapa kuti aciswe zilonda mubili woonse. Jobu wakali mumacise  aataambiki. Kunyina naakazyi ikaambo zintu zyoonse eezyi ncozyakali kumucitikila. Nokuba boobo, Jobu wakazumanana kukomba Jehova. Leza wakazibona zyoonse izyakali kucitika, aboobo wakamukkomanina kapati Jobu.

Mpoonya Saatani wakatuma baalumi botatwe kuti basunke Jobu. Bakamwaambila kuti: ‘Kuli cibi ncookacita, pele yebo wakacisisa. Lino Leza ukusubula buya akaambo kacibi ncookacita.’ Jobu wakati: ‘Taakwe cibi ncondakacita.’ Mpoonya Jobu wakatalika kuyeeya kuti Jehova ngowakali kumuletela mapenzi, alimwi wakaamba kuti Leza tanaakali kumweendelezya kabotu.

Mwaalumi uucili mwana-mwana Elihu wakali kuswiilila nzyobakali kwaamba boonse. Mpoonya wakaamba kuti: ‘Nyoonse nzyomwaamba tazili zyamasimpe pe. Jehova mupati alimwi ulizyi zicitika kwiinda ndiswe. Takonzyi kucita cintu cibi. Ulabona zyoonse alimwi ulabagwasya bantu bapengede.’

Mpoonya Jehova wakaambaula a Jobu. Wakaamba kuti: ‘Ino wakali kuli ciindi nondakalenga julu anyika? Ino ncinzi cakupa kwaamba kuti tandikweendelezyi kabotu? Wiile kwaamba buyo, pesi tozyi zintu eezyi ncozicitikila.’ Jobu wakakuzumina kulubizya kwakwe alimwi wakati: ‘Ndalubizya. Ndakali kumvwa buyo kujatikizya nduwe, pele lino ndakuzyiba kabotu. Taakwe cintu cikonzya kukwaalila pe. Undijatile kumajwi ngondaamba.’

Mapenzi aaya naakamana, Jehova wakamuponya Jobu alimwi wakamupa zintu zinji kwiinda nzyaakajisi kumatalikilo. Jobu wakapona ciindi cilamfwu alimwi wakalikkomene. Jehova wakamulongezya Jobu akaambo kakumumvwida nokuba kuti cakali ciyumu kucita boobo. Sena uyooba mbuli Jobu akuzumanana kukomba Jehova nokuba kuti zintu zyayuma buti?