Munyika iitegwa Uzi, kwakali kukkala mwaalumi wakali kukomba Jehova. Zina lyakwe nguJobu. Wakali notede alimwi wakali ampuli mpati. Wakali amoyo mubotu alimwi wakali kugwasya bantu bafwaba, banakazi bakafwidwa balumi abana batachikwe bazyali. Pesi kuchita zintu zili kabotu zyakali kwaamba kuti Jobu taakali kuyooswaana mapenzi na?

Jobu taakazi pe kuti Saatani Dyabbulosi wakali kumubona. Jehova wakabuzya Saatani kuti: ‘Wamubona na mubelesi wangu Jobu? Taakwe muntu uuli mbuli nguwe munyika. Ulandiswiilila alimwi uchita zintu ziluleme.’ Mpawo Saatani wakasandula kuti: ‘Nisimpe kuti Jobu ulakuswiilila. Nkaambo ulamukwabilila alimwi ulamulongezya. Wakamupa busena bwakulima bupati alubono lwiingi. Ikuti wamutolela zintu zyoonse nzyali azyo ulaleka kukukomba.’ Mpawo Jehova wakati: ‘Ulakonzya kumusunka Jobu. Pesi utamujayi.’ Nkamboonzi Jehova naakazumizya kuti Saatani asunke Jobu? Nkaambo wakali achoonzyo kuti Jobu uyoozunda.

Kuzwa waawo, Saatani wakasaanguna kupenzya Jobu amapenzi asiyene-siyene. Wakapa kuti bantu bakuShebba babbe ng’ombe ambong’olo zyaJobu. Kuzwa waawo, mbelele zyaJobu zyoonse zyakapya amulilo. Alubo bamwi bantu bazwa kuKkasidi, bakabba nkamele zyaJobu. Nibaba babelesi bakali kweembela lubono oolo bakajayigwa. Kwakatobela limwi penzi pati. Chiindi bana baJobu nibakali kuchita pobwe, boonse bakafwa ng’anda niyakadilika. Jobu wakakataazikana loko mumiyeeyo, pesi taakaleka pe kukomba Jehova.

 Saatani wakali kuyanda kupenzya Jobu, nkinkaako, wakapa kuti Jobu abe azilonda mubili woonse. Jobu wakali mumachise miingi loko. Taakazi pe kuti nkamboonzi zintu eezi nizyakali kumuchitikila. Pesi Jobu taakaleka pe kukomba Jehova. Leza naakabona kusyomeka kwaJobu, wakabotelwa loko.

Saatani wakabelesya baalumi batatu kuti bakasunke Jobu. Bakamubuzya kuti: ‘Leza ulikukusubula nkaambo kuli zintu nzwaakabisya nzulikusisa.’ Pesi Jobu wakati: ‘Taakwe chibi nchindakachita pe.’ Alubo Jobu wakatalika kuyeeya kuti Jehova nguwe wakamweetela mapenzi alimwi wakati Leza taluleme pe.

Kuli umwi mwaalumi uutegwa Elihu wakali kuswiilila Jobu abeenzinyina kabalikwaambuula. Mpawo wakatalika kwaambula kati: ‘Nzimulikwaamba moonse teenzizyo pe. Jehova mupati kwiinda miyeeyo yesu. Tachiti zintu zibi pe. Ulazibona zintu zyoonse zichitika alimwi ulabagwasya bantu chiindi nibali mumapenzi.’

Mpawo Jehova wakaambuula aJobu. Wakamubuzya kuti: ‘Wakali kuli chiindi nindakalenga julu anyika? Nkamboonzi nulikwaamba kuti tandiluleme? Ulikwaambuula luzutu pesi tuzi pe kuti nkamboonzi zintu nizili boobu.’ Jobu wakazumina kubisya kwakwe alimwi wakati: ‘Ndabisya. Ndakamvwa atala anduwe, pesi lino ndakuziba. Taakwe zintu zikukachila pe. Undilekelele kuzintu nzindaamba.’

Chiindi Saatani naakaleka kusunka Jobu, Jehova wakaponia Jobu akumupa zintu zyiingi kwiinda nzyaakali azyo. Jobu wakapona kwaminyaka myiingi alimwi wakapona buumi bubotezya. Jehova wakamulongezya Jobu akaambo kakuswiilila nikuba kuti teekwakali kuuba kuchita oobo. Tuyandi na kukomba Jehova mbuli kwakachita Jobu nikuba kuti waswaana mapenzi?