Haroho omusaija ayaikaraga omu nsi ya Uzi ayaramyaga Yahwe. Omusaija onu bamwetaga Yobu. Akaba ali muguuda muno kandi aine eka nkooto muno. Akaba aine embabazi kandi yakonyeraga abanaku, abafakati, hamu n’enfuuzi. Baitu kukora ebintu ebihikire kikaba nikisobora kutanga ebizibu kumuhikaho?

Setani Diabolo akaba n’arora ebintu binu kandi bitarukumusemeza baitu Yobu uwe akaba atakimanyire. Yahwe akagambira Setani ati: ‘Orozere omuheereza wange Yobu? Tiharoho muntu wena omu nsi yoona arukumusisana. Ampuliiriza kandi akora ebihikire.’ Setani akagarukamu ati: ‘Nkimanyire ngu Yobu akworobera habwokuba omulinda atahikwaho akabi kandi omuha emigisa. Okamuha itaka hamu n’ebisoro. Byona bimwiheho, n’aija kuleka kukuramya.’ Yahwe akamugambira ati: ‘N’osobora kulenga Yobu. Baitu otamwita.’ Habwaki Yahwe yaikiriize Setani kulenga Yobu? Yahwe akaba akimanyire ngu Yobu akaba n’agenda kusingura okulengwa kunu.

Setani akatandika kulenga Yobu n’akozesa ebigwererezi bingi. Eky’okubanza, akatuma abasaija abarukwetwa Abaseba okwiba ente n’enkaina ze. Hanyuma, omurro gukahwerekereza entaama za Yobu zoona. Abantu bandi abarukwetwa Abakalidaya bakaiba engamira ze zoona. Abaheereza be boona abalisaga ebisoro binu bakaitwa. Ekyahondiireho kikaba kigwererezi kibi muno. Abaana ba Yobu bakaterwa enju ei bakaba nibaliiramu obugenyi boona bafa. Yobu akagwerwa ihano ery’amaani baitu ataleke kuheereza Yahwe.

Setani akaba n’agonza Yobu abonabone n’okukiraho. Nahabweki akaletera Yobu ebizimba  omubiri gwe gwona. Yobu akatunga oburumi bwingi muno. Atamanye habwaki ebintu binu byona byali nibimubaho. Baitu nabwo, Yobu ataleke kuramya Yahwe. Ruhanga akaba narora ebintu binu byona, kandi obwesigwa bwa Yobu bukamusemeza.

Setani akongera yasindika abasaija basatu kulenga Yobu. Bakamugambira ngu: ‘N’osobora kuba wakozere ekibi kandi walengaho kukisereka. Ruhanga n’akufubira.’ Yobu abagarukamu ati: ‘Tinyine kintu kyona ekibi eki n’akozere.’ Kandi Yobu akatandika kutekereza ngu Yahwe nuwe akaba n’amuletera ebizibu binu, kandi yagamba ngu Ruhanga akaba atamutwaize omu mulingo ogw’obwinganiza.

Omusigazi omu arukwetwa Erihu akaba n’ahuliiriza abasaija banu obu bakaba nibabaza. Akatandika kubaza nagamba ati: ‘Inywena ebi mugambire byona bigwire. Yahwe mukuru n’okukira ebi byona ebitumanyire. Tasobora kukora ekintu kyona ekibi. Arora buli kimu kyona kandi akonyera abantu omu bizibu byabo.’

Hanyuma Yahwe akabaza na Yobu. Akamukaguza ati: ‘Okaba oli nkaha obu nahangire iguru n’ensi? Habwaki nogamba ngu tindi mwinganiza? Baitu iwe n’obaza kwonka otamanyire habwaki ebintu bibaho.’ Yobu akaikiriza ngu akaba akozere ensobi kandi yagamba ati: ‘Ebingambire tibihikire. Nkaba ninkuhurraho kwonka, baitu hati ninkumanya. Busaho ekitasoboka hali iwe. Onganyire habw’ebimbalize.’

Hanyuma y’okulengwa kunu kwona, Yahwe akakiza Yobu kandi yamuha itungo emirundi ebiri kukira ery’akaba aine omu kubanza. Yobu akomeera emyaka nyingi kandi yatunga okusemererwa. Yahwe akaha Yobu emigisa habw’okumworobera n’omu bwire obugumire. Naiwe oraaba nka Yobu oikale noramya Yahwe omu burungi n’omu bubi?