Vofeka yo Usi mua kala ulume umue wa enda oku fendela Yehova. Onduko yaye Yovi. Eye wa kala ulume umue wa kuatele ukuasi walua kuenda wa kuata epata linene. Eye wa kala ukuacisola kuenda wa kuatisa omanu valua ndeci olohukũi, akãi vana okuti alume vavo va fa kuenda omãla vana okuti olosiwe. Omo okuti Yovi wa enda oku linga ovina viwa, anga hẽ eci ci lekisa okuti ka laikele oku liyaka lovitangi?

Yovi ka kũlĩhĩle esunga lieci a talela ohali, pole, Satana Eliapu wa kala oku u lavulula. Yehova wa sapuila Satana hati: ‘Ove wa limbuka ukuenje wange Yovi? Ka kuli omunu wa lisoka laye kilu lieve. Eye o ndi yevelela kuenda o linga ovina via sunguluka.’ Satana wa kumbulula hati: ‘Ocili okuti Yovi o pokola kokuove. Ove o kasi oku u teyuila loku u sumũlũisa. Wa eca kokuaye osi kuenda ovinyama. Upa cosi a kuete kuenje eye o liwekapo oku ku fendela.’ Yehova wa popia hati: ‘Ove o kuete omoko yoku seteka Yovi. Pole, ku kuete omoko yoku u ponda.’ Momo lie Yehova a ecelela okuti Satana o seteka Yovi? Eye wa kolelele okuti Yovi ka konyõha.

Satana wa fetika oku seteka Yovi lovilunga vialua. Tete wa tuma omanu vamue va tukuiwa hati, va Seva oco va punde olongombe, lovimbulu via Yovi. Noke ondalu ya ponda olomeme viosi via Yovi. Ocimunga cikuavo comanu va tukuiwa hati, va Kaldea, va punda olongamelo viaye. Akuenje va kala oku lava ovinyama viaco va pondiwa. Noke kueya ocilunga cimue cinene. Omãla vosi va Yovi va fa, eci onjo va kala oku lingila ocipito ya va kupukila. Yovi wa sumuile calua, pole, ka liwekelepo oku fendela Yehova.

Satana wa yonguile okuti Yovi o tala ohali yalua  kuenje wa kokela apute ãvi vetimba liosi lia Yovi. Eye wa yeva evalo lialua. Yovi ka kũlĩhĩle esunga lieci ovina viaco via kalela oku pita laye. Pole, ndaño lovitangi viaco, Yovi ka liwekelepo oku fendela Yehova. Suku wa mola ovina viaco viosi kuenje wa sanjukila calua Yovi.

Noke Satana wa tuma alume vatatu oco va seteke Yovi. Ovo vo sapuila vati: ‘Citava okuti ove wa linga ekandu kuenda wa seteka oku seleka ekandu liaco. Suku o kasi oku ku kangisa.’ Yovi wa popia hati: ‘Sa siatele oku linga cimue civĩ.’ Omo liaco, Yovi wa fetika oku sima okuti Yehova eye wa kala oku u kokela ovitangi viaco kuenje wa popia okuti, Suku ka kasi oku lekisa esunga kokuaye.

Ulume umue umalẽhe o tukuiwa hati, Elihu wa kala lika oku yevelela osimbu vakuavo va vangula. Noke wa popia lolukandi hati: ‘Ovina viosi wa vanguli ka via sungulukile. Yehova wa velapo, ovisimĩlo vietu vi sule. Eye lalimue eteke a linga ovina ka via sungulukile. Eye o lete ovina viosi kuenda o kuatisa afendeli vaye eci va pita lovitangi.’

Omo liaco, Yehova wa sapuila Yovi hati: ‘Eci nda sovola ilu kuenda osi ove wa kala pi? Momo lie o popela okuti siukuesungako? Ove o ndi pisa, pole, kua kũlĩhĩle esunga lieci ovina viaco vi pitila love.’ Yovi wa limbuka oku lueya kuaye kuenje wa popia hati: ‘Nda popia ovina ka via sungulukile. Nda yeva ovina viatiamẽla kokuove, pole, cilo nda ku kũlĩha. Ka kuli lacimue okuti ka ci tẽliwa kokuove. Ngecele omo liovina nda popia.’

Eci oseteko ya Yovi ya pita, Yehova wa sakula oku vela kuaye kuenda wo wĩha ovina vialua okuti, evi a kuatele tete vi sule. Yovi wa kala komuenyo otembo yalua kuenda wa kuata esanju. Ndaño wa liyaka lovitangi vialua, pole, wa yevelela Yehova kuenje wa tambula esumũlũho omo liocituwa caco. Ove hẽ o pondola oku setukula ocituwa ca Yovi kuenda oku amamako oku fendela Yehova ndaño lovitangi vialua?