Shangoni ḽa Utsi, ho vha hu tshi dzula muṅwe munna we a vha a tshi rabela Yehova. O vha a tshi pfi Yobo. O vha o pfuma vhukuma nahone e na muṱa muhulwane. O vha e na vhulenda nahone a tshi thusa vhashai, a tshi thusa vhafumakadzi vho felwaho nga vhanna na vhana vha si na vhabebi. Fhedzi samusi o vha a tshi ita zwo lugaho, naa Yobo o vha a sa ḓo ṱangana na vhuleme?

Yobo o vha a sa zwi ḓivhi uri Sathane Diabolo o vha o mu sedza. Yehova a ri kha Sathane: ‘Naa mushumeli wanga Yobo no mu vhona? A hu na ane a fana nae ḽifhasini. U a nthetshelesa na u ita zwo lugaho.’ Sathane a fhindula a ri: ‘Ndi ngoho Yobo u a u thetshelesa. U a mu tsireledza na u mu fhaṱutshedza. Wo mu ṋea shango na zwifuwo. Mu dzhiele zwoṱhe nahone u ḓo litsha u rabela.’ Yehova a ri: ‘Ni nga linga Yobo. Fhedzi ni songo mu vhulaha.’ Ndi ngani Yehova o tendela Sathane a tshi linga Yobo? O vha e na vhungoho ha uri Yobo u ḓo fulufhedzea.

Sathane a thoma u linga Yobo nga maṱungu manzhi. O thoma nga u rumela vhathu vha vhidzwaho Vhaseba uri vha tswe kholomo na donngi dza Yobo. Nga murahu, mulilo wa vhulaha nngu dzoṱhe dza Yobo. Vhakaladea vho tswa gamela dzawe. Vha vhulaha vhalanda vhe vha vha vha tshi khou lisa zwenezwo zwifuwo. Ha tevhela khombo khulwane vhukuma. Vhana vhoṱhe vha Yobo vho fa musi nnḓu ye vha vha vha tshi khou ḽela khayo i tshi vha wela. Yobo o pfa vhuṱungu nga maanḓa, fhedzi ho ngo litsha u rabela Yehova.

Sathane o vha a tshi ṱoḓa uri Yobo a pfe vhuṅwe vhuṱungu, nga zwenezwo, a ita uri a bve zwilonda muvhilini wawe woṱhe. Yobo  o vha a tshi khou pfa vhuṱungu vhuhulwane. O vha a sa ḓivhi uri ndi ngani zwenezwi zwithu zwi tshi khou bvelela khae. Fhedzi Yobo o bvela phanḓa a tshi rabela Yehova. Mudzimu o vhona zwoṱhe nahone a takadzwa nga zwe Yobo a zwi ita.

Sathane a rumela vhanna vhararu u itela u linga Yobo. Vha ri khae: ‘Ni nga vha no ita tshivhi nahone na tshi dzumba. Mudzimu u khou ni pfisa vhuṱungu.’ Yobo a ri: ‘A thi na mulandu.’ Fhedzi nga murahu, a thoma u humbula uri Yehova ndi ene ane a khou bveledza honohu vhuleme nahone a amba uri Mudzimu ho ngo luga.

Muṅwe munna ane a pfi Elihu o vha o thetshelesa zwavhuḓi zwe zwa vha zwi tshi khou ambiwa. Nga murahu a ri: ‘Zwe noṱhe na zwi amba zwo khakhea. Yehova ndi muhulwane vhukuma. A nga si vhuye a ita vhuvhi. U vhona zwoṱhe nahone u thusa vhathu vha re na vhuleme.’

Nga murahu Yehova a amba na Yobo. A ri: ‘No vha ni ngafhi musi ndi tshi sika ḽiṱaḓulu na ḽifhasi? Ndi ngani ni tshi amba uri a tho ngo luga? Ni khou sokou amba, fhedzi ni sa ḓivhi uri ndi ngani zwithu zwo itea nga u rali.’ Yobo a tenda uri o khakha nahone a ri: ‘Ndo khakha. Ndo vha ndi tshi sokou pfa nga ha iwe, fhedzi zwino ndi a u ḓivha nga ngoho. A hu na tshine wa si tshi kone. Ndi humbela pfarelo kha zwe nda zwi amba.’

Musi u lingiwa hu tshi fhela, Yehova o dovha a ita uri Yobo a vhe na mutakalo wavhuḓi nahone a mu fha zwithu zwinzhi zwi fhiraho zwe a vha e nazwo u thomani. Yobo o tshila vhutshilo vhulapfu na vhu takadzaho. Yehova o fhaṱutshedza Yobo ngauri o mu thetshelesa naho zwi tshi khou konḓa. Naa ni ḓo fana na Yobo nahone na bvela phanḓa ni tshi rabela Yehova hu sa londwi zwine na ṱangana nazwo?