Ha tuna han Us, may usa nga tawo nga nagsisingba kan Jehova. Hiya hi Job. Riko gud hiya ngan daku an pamilya. Buotan hiya ngan mabinuligon ha mga pobre, ha balo nga kababayin-an, ngan ha ilo nga kabataan. Pero diri na gud ba hiya magkakaproblema kay ginbubuhat niya an husto?

Diri maaram hi Job nga gin-iinobserbaran hiya ni Satanas nga Yawa. Hi Jehova nagsiring kan Satanas: ‘Nakikita mo ba an akon surugoon nga hi Job? Waray pariho ha iya ha tuna. Namamati hiya ha akon ngan nagbubuhat han husto.’ Hi Satanas binaton: ‘Syempre nasugot hiya ha imo kay ginpuproteksyonan ngan ginbibendisyonan mo hiya. Gintatagan mo hiya hin tuna ngan mga hayop. Kuhaa ito ngatanan, ngan maundang hiya pagsingba ha imo.’ Hi Jehova nagsiring: ‘Puydi mo sarihan hi Job. Pero ayaw hiya pataya.’ Kay ano nga gintugotan ni Jehova hi Satanas nga buhaton ito? Sigurado hiya nga malalamposan ito ni Job.

Ginsarihan ni Satanas hi Job pinaagi hin mga trahedya. Siyahan, nagpadara hiya hin mga Sabeahanon basi kawaton an mga baka ngan mga asno ni Job. Tapos, nasunog an ngatanan niya nga karnero. Ginkawat han mga Kaldeanhon an iya mga kamelyo. An mga surugoon nga nag-aataman hito ginpatay. Katapos, nahitabo an pinakamaraot nga trahedya. Namatay an tanan niya nga anak; narumpagan hira han balay diin hira nagkakalipay. Duro gud an kasubo ni Job, pero waray hiya umundang pagsingba kan Jehova.

Karuyag ni Satanas nga mag-antos pa gud hi Job, salit iya ginpahinabo nga maputos hi Job hin hubag. Maul-ol gud ito. Diri hiya maaram kon kay ano nga  nahitatabo ini ngatanan. Bisan pa hito, nag-alagad la gihap hiya kan Jehova. Nakita han Dios ito ngatanan, ngan nalipay gud hiya kan Job.

Tapos, nagpadara hi Satanas hin tulo nga lalaki basi sarihan hi Job. Hira nagsiring kan Job: ‘Siguro nakasala ka pero gintatago mo la. Ginsisirotan ka han Dios.’ Hi Job nagsiring: ‘Waray ako ginbuhat nga sayop.’ Pero nagtikang hiya maghunahuna nga hi Jehova an hinungdan han iya mga problema, ngan nagsiring nga an Dios waray magpakita ha iya hin hustisya.

An burobata nga hi Elihu hilom nga nagpipinamati han ira iristorya. Tapos hiya nagsiring: ‘Sayop kamo ngatanan. Mas harangdon hi Jehova kay han mahimo naton masabtan. Diri gud hiya magbubuhat hin maraot. Nakikita niya an ngatanan, ngan ginbubuligan niya an mga tawo ha ira problema.’

Tapos hi Jehova nagpakiana kan Job: ‘Nakain ka han ginhimo ko an langit ngan an tuna? Kay ano nga nasiring ka nga waray ako hustisya? Nagyayakan ka, pero diri ka maaram kon kay ano nga nahitatabo an mga butang.’ Ginkarawat ni Job an iya sayop ngan nagsiring: ‘Sayop ako. Nakabati ako mahitungod ha imo, pero yana nakilala na gud ako ha imo. Waray imposible ha imo. Pasayloa ako han akon ginyakan.’

Han matapos na an pagsari, iginbalik ni Jehova an kahimsog ni Job ngan gintagan hiya hin mas damu pa kay han iya gintatag-iya hadto. Hi Job nagkaada hilawig ngan malipayon nga kinabuhi. Ginbendisyonan ni Jehova hi Job ha pagsunod ha iya bisan ha makuri nga sitwasyon. Pariho kan Job, padayon ka ba nga magsisingba kan Jehova anoman an mahitabo?