Ta Oza tan̈y, nisy lelahy araiky nanompo Jehovah. Joba an̈arany. Izy pan̈arivo sady maro zanaka, tsara fan̈ahy, tia nan̈ampy olo masikiny ndreky man̈angy maty vady avio zaza kamboty. Joba olo marin̈y. Izy ma tsisy raha nanahiran̈a izy foeky?

Tsy hainy Joba fa Satana Devoly nandiniky izy. Ho Jehovah tamy Satana: ‘Asa anao mba fa nandiniky Joba panomponaka? Tsisy olo mira izy ambony tany. Izy mitandren̈y zaho sady man̈ano ny marin̈y.’ Ho Satana: ‘Joba mitandren̈y anao, fotony anao miaro izy sady mitahy izy! Anao nan̈amia izy tany ndreky biby maro. Adosoa baka raha jiaby zen̈y, fa izy tsy hanompo anao edy.’ Ho Jehovah: ‘Anao mety mitsapa jery Joba. Aza vonen̈a fo izy.’ Nan̈ino ma Satana nambelany Jehovah nitsapa jery Joba? Izy natoky fa Joba tsy hivadiky foeky.

Maro raha ratsy nataony Satana hitsapan̈a jery Joba. Voanalohany, nalefany iro Sabeanin̈y aby io hangalatra aombiny Joba ndreky borikinany. Nay koa ondrikondrikiny Joba jiaby. Nangalariny Kaldeanin̈y ramevanany, nivonendro koa piambin̈y biby aby io. Nisy koa vaovao ratsy. Zanaka Joba jiaby naty, fotony rongana tamindro tran̈o nan̈anovandro fety. Nalahelo Joba, fa izy tsy voly nanompo Jehovah.

Mbala tihampijaly Joba mare Satana. Nataony feno bay ain̈iny  Joba jiaby, ke nanehoko mare. Tsy hainy Joba foeky nan̈ino raha jiaby zen̈y navoa izy. Nanompo Jehovah fo ndraiky Joba. Hitany Zan̈ahary raha jiaby zen̈y, ke izy ravoravo tamy Joba.

Mbala nan̈iraka lelahy telo koa Satana hitsapa jery Joba. Volan̈indro: ‘Anao io sazìny Zan̈ahary, fotony tao fo fahotan̈a nataonao matoa anao avoa raha karaha io.’ Ho Joba: ‘Tsisy raha ratsy nataoko.’ Izy nieritreritry fa baka tamy Jehovah raha io, ke izy nivolan̈a fa tsy rariny raha nataony Zan̈ahary taminany.

Nisy lelahy tanora araiky zay, Eliho an̈arany, nitandren̈y tsarabe koran̈a nataondro. Hoizy: ‘Diso raha volan̈inaro zen̈y. Jehovah tsy man̈ano raha karaha zen̈y foeky. Izy tsy man̈ano raha ratsy. Izy mahita raha jiaby ataonolo, sady man̈ampy olo mijaly.’

Jehovah nan̈ontany Joba: ‘Taia ma anao tamy zaho nan̈amboatra lan̈itry ndreky tany? Nan̈ino anao mivolan̈a fa zaho man̈ano raha tsy rariny? Anao raha mivolan̈a fo fa tsy hainao aby raha mandalo.’ Nibebaka Joba, ke hoizy: ‘Diso zaho. Naharen̈y raha momba anao zaho, fa izioty zaho vo ten̈a mahay anao. Tsisy raha tsy hainao. Diso zaho tamy volan̈anaka in̈y.’

Koa fa vita fitsapan̈a io, Jehovah nampahivan̈a Joba ndreky nan̈amia izy fanan̈ana bebeny taloha. Izy ela velon̈o sady sambatra. Jehovah nitahy Joba fotony izy nitandren̈y volan̈anany fo ndray tsy mora. Anao ke, asa mba han̈ano karaha Joba, ke hanompo Jehovah fo ndray ino raha mandalo?